ROMAX 1
1
Grawng Doh Keud
1Pawlux pa mawh siliex Yesux Khrit, pa hoik kok ti kieh mawh kawncau pa ting, pa hoik tiah ti deuh sonsang sidiex lox bwan gaux rhawm Siyiex, 2pa hoik grux tawx Nawh Cao lox mukheu ka cao jhai khankix ti tiiem daux phuk lai sigang khri pa singax singeh khankix, 3grawh grawng Kawn Nawh Cao, pa hoik keh awm pa khaw plak nex nham ka daux ru Davit, 4Phan mawh awm pa khaw plak khuan pa dex mai pa singax singeh, hoik sidawng mawh Kawn Siyiex tau mai sibrawm, ka pa deeh kaoh im khaing krax yum heue. Pa mawh Simiang ex Yesux Khrit. 5Mawh ka daux Nawh heue, pa pon ex bwanson mai ara kawncau pa ting, sonsang kieh ceu pui khawmuik koe krax cu nghiet ka krax yum rhawm, son ceu kaux Nawh Cao, 6pex kawx mawh ka daux kix, pa hoik kok tix mawh cie Cao Khrit heue. 7Tawx ka pui pa ot ka daux veng Romax khawmuik, can pa moh Siyiex kah, pa hoik kok ti kieh mawh pui singax singeh heue. Kieh pex koe bwanson mai pa nhim pa kaoh khaing Keeing ex Siyiex mai Simiang Yesux Khrit liak.
Yaogyaw Bwanson Mai Rawg Bwan
8Aux yaogyaw bwanson Siyiex aux Ka sivoe paox tix, ka daux Yesux Khrit, son pex khawmuik, kheu grawng krax yum rhawm pex hoik krai hoik tah ka piang haktiex ku dah dee khawmuik heue. 9Grawh grawng nawh, Siyiex mawh cao pa kham mhai rug aux, pa mawh Kaw pa yuh aux son Nawh ka daux khuan aux, ka daux lox bwan gaux rhawm Kawn Nawh Cao, grawh grawng pa simawd aux ka pex ang jud jai, ka daux pa rawg aux bwan ku jheung jheung. 10mai rawg mhaing, yuh ka mawx phan khaw mai alo Siyiex, aux tak sang pon hoek ka pex sax heue. 11Grawh grawng nawh, aux mie ti yaox pex, sonsang pon aux ti tawx totaix khuan tix ceu ceu ka pex, sonsang kieh pex kaux cong heue. 12Grawng ah nan sang ah nin, yuh ka mawx aux mai pex sang pon pa nyawm rhawm tau, ex ku kaux kheu krax yum rhawm paox tix tang kaux, khawm ka krax yum rhawm cie pex mai cie aux heue.
Sibrawm Lox Bwan Gaux Rhawm
13Puxaik khankix eue, aux ang rhawm kieh pex ang tawng, grawng pa yiag aux ti hoek ka pex #Cau 19:21 tom nie bawg viang mawh nan hoik kieh raw aux tom yam in, sonsang pon aux tix koe plix khawm ka daux pex ceeix, awm pa hoik koe aux ka daux pui tang ceu pa tang khankix heue. 14Aux mawh pa koe ceuk ka pui Helasax mai ka khawm pui pheem khankix mai ka pui koe pingnya mai ka khawm pui pa ang koe pingnya heue. 15Mawh kheu nan aux koe rhawm tix sang sidiex lox bwan ka khawm pex pa ot daux veng Romax heue. 16Grawh grawng nawh, ang aux kaig tua kheu lox bwan gaux rhawm, mawh kheu lox bwan an mawh sibrawm Siyiex, son can pui pa yum rhawm ku kaux sang hoek krax taoh, son pui Yudax ka paox tix mai khawm son pui Helasax heue. 17Grawh grawng nawh pa rahsee Siyiex plak sidawng ka daux lox bwan an, kheu krax yum rhawm, sonsang yum rhawm, awm hoik tiiem ti deuh ah nin, “Pui pa rahsee tak sang im kheu krax yum rhawm heue.”#Ha 2:4 Siyiex Song Rhawm Ka Pui Ang Rahsee
18Grawh grawng nawh pa song rhawm Siyiex plak sidawng khaing raoma, piang pui pa ang nab yam ka Siyiex mai pa ang rahsee khawmuik, pa mawh pa kieh raw ka pa mawh meh, ka daux pa ang rahsee heue. 19Mawh kheu can pa pon ti tawng grawng Siyiex hoik sidawng ka daux kix, grawh grawng nawh Siyiex hoik plak sidawng ka kix heue. 20Grawh grawng nawh ceu pa ang chix yaox cie Nawh Cao, tom yam jah ti kaw ti phan haktiex dix, pa mawh sibrawm leeing ju, cie Nawh mai pa mawh Nawh leeing ju, pon ti yaox sidawng, kheu pon ti yaox ka daux ceu pa hoik yuh Nawh Cao, mawh kheu nan ang kix koe dee du grawng phimap tix, 21mawh kheu viang kix hoik tawng ka Siyiex kawx, kix ang yaog yaw Nawh ting, awm pa khaw kix ti yaog yaw Siyiex mai ang kix deeh yaog yaw bwanson Nawh mai kix lih ti mawh pa ang koe bwanson ka daux ceu pa keud tix mai rhawm pa sivix pa ang kix chix tawng hoik vhaik hu heue. 22Viang kix dhua tokaux kix mawh pa koe pingnya cuyi, kix lih mawh pui daox aw, 23mai loh min pakngai Siyiex, pa ang chix laux leeing ka son riang grang pa yaung pui pa chix lau leeing mai riang grang yaung sim khankix mai riang grang yaung totiag pa koe caong pon khawn khankix mai riang grang yaung ceu pa chix mu hu khankix heue. 24Mawh kheu nan Siyiex tom grham kix ka daux alo nex nham rhawm kix, ti yuh ceu pa ang singax singeh, son sang hoek tokaux kix krax laux min plakngai ka paox tix tiru heue. 25Mawh kheu kix hoik loh pa mawh meh Siyiex ka son pie lhen mai krub mai yuh son ceu pa hoik phan hoik yuh mai ang krub ang yuh son Cao Phan Cao Yuh, Kaw pa koe bwanson leeing ju. Amen. 26Mawh kheu jao in Siyiex tom grham kix yuh alo nex nham pa seeing, grawh grawng nawh bun kix khankix deeh loh ceu pa khaw ti shiao tix awm pa khaw mai been nex nham, tix nieb yuh ka ceu pa ang khaw, 27mai awm an simex khankix kawx, kix tik been ceu pa khaw ti shiao ka bun mai koe rhawm kraing ka paox tix, tix kaux lai tix kaux mai nieb yuh pa ang doh khaw ka paox simex tix mai son pa lud an kix deeh pon ka daux tokaux kix, awm pa keung kix ti pon heue. 28Awm pa ang kix rhawm tawng ka Siyiex, Siyiex hoik grham kix koe rhawm pa keud pa ang keung ang khaw, sonsang yuh ceu pa ang khaw ang jiet heue. 29Kix naog ka can pa ang rahsee khawmuik, pa mawh pa caox mai pa ghoing mai pa koe rhawm ti sang yuh pui laux, pa naog ka pa boh rhawm mai pa pah pui yum mai pa simah simiang mai pie lhen mai pa koeng mai pa ah lox suksiep, 30mai pa nieb yuh plakngai pui laux mai pa koeng Siyiex kah mai pa ang chix nab yam mai pa ca nyhau ting rhawm mai pa nieb yaw tix mai pui pa lih ti keud ti yuh ceu pa caox mai pa ang chix cu nghiet ka lox miex keeing tix, 31mai pa ang chix tawng mai pa ang kaux sijax ka lox mukheu mai pa ang koe krax moh awm pasax koe been moh pui paox tix mai pa ang chix caux rhawm. 32Viang kix hoik tawng grawng pa prawng ca Siyiex, hoik een grawng pui pa yuh nan khaw ti yum kawx, tokaux kix ang joeng yuh ceu an khaing, viang mawh nan kix yaw mai caw rhawm khawm ka pui pa yuh nan heue.
Currently Selected:
ROMAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012