YAKOP 1
1
Lox Nawb Bwan
1Yakop,#Mat 13:55; Mak 6:3; Cau 15:13; Ka 1:19 pa mawh siliex Siyiex mai Simiang Yesux Khrit tawx lox nawb hu ka pui kao ceu ra pa hoik prung prang roi rhuat kudah kudee heue.
Krax Yum Rhawm Mai Pingnya
2Puxaik aux khankix eue, yam yaox pex krax nyaw glaw miex ceu, sawn khawmuik mawh pa gaux rhawm, 3Mawh kheu tawng pex grawng ceu pa cheu ti yaox krax yum rhawm pex, tak baox yuh ti kieh koe pa gun yeung heue. 4Kieh pa gun yeung yuh kaing tix tom grum naog, sonsang grum naog grum mhawm pex mai ang koe dee taik dee cha heue.
5Phan pex tix kaux kaux kawn taik kawn cud pingnya, kieh nawh rawg ka Siyiex, pa koe rhawm sibieh ti tawx ka pui khawmuik mai pa ang chix map mai tak sang tawx ka nawh heue. 6Kieh nawh rawg ka daux krax yum rhawm mai paw keud jee blaong, mawh kheu kaw pa keud jee blaong awm puk pak rawm sigrit sigra pa phliah bhaung hu pa pukpliak lung lhiang heue. 7Pui pa yuh nan, paw kieh nawh ce ti sang pon tix ceu kawx khaing Siyiex. 8Pui pa koe rhawm ra mu ang kaux cong ka krax can pa yuh ti khawmuik heue.
Pui Hot Mai Caomi
9Kieh puxaik pa tiem yaw mai gaux rhawm, ka pa hoik yaog nawh ting. 10Kieh pa mi pa koe, yaw mai gaux rhawm ka pa hoik yuh nawh tiem, mawh kheu nawh tak sang grai hu awm tai rib tai riem heue. 11Grawh grawng nawh yam uik lih singaix mai kied hax koek, rib an fit mai kroh hu mai tai nawh cia#Isa 40:6,7 mai pa mhawm grang nawh laux heue. Awm an pui pa mi pa koe, tak sang laux sang grai ka daux krax pa yuh tix heue.
Pa Cheuk Cheu Mai Pa Nyaw Glaw
12Pui pa chix kham ka pa nyaw glaw ting bwanson heue. Grawh grawng nawh khaix hoik cheu ti yaox ka nawh, nawh tak sang pon mhok khri pa im ju, pa hoik deuh Siyiex lox sijax mukheu ti sang tawx ka pui pa moh ka Nawh khankix heue. 13Yam yaox nawh krax nyaw glaw, paw kieh pui ah tix kaux kawx, “Mawh Siyiex pa nyaw glaw aux.” Mawh kheu Siyiex ang chix nyaw glaw ka pa caox mai tokaux Nawh ang nyaw glaw ka pui tix kaux kawx heue. 14Kaux mawx kaux an yam yaox ti kham krax nyaw glaw, hoik mawh kheu alo nex nham tokaux tix, pa nyaw mai bluh nawh hu heue. 15Mawh kheu nan, yam hoik nghe alo nex nham, yam keh phimap lih mai yam uik die hwan phimap nawh viex krax yum lih heue. 16Puxaik pa moh aux khankix eue, paw kieh pie lhen ka pex. 17Totaix pa mhawm mai pa grum ku ceu kaoh khaing dee long mai lih hoek khaing Keeing pa riang, pa ang chix siyox mai ang koe veei pa tie heue. 18Nawh teei gum lox pa mawh pa meh, yuh ti kieh ex keh ti mawh awm koe alo Nawh, sonsang mawh ex, plix pa liang ti plix ka daux ceu pa hoik phan hoik yuh Nawh khankix heue.
Mhong Mai Yuh
19Puxaik pa moh aux khankix eue, pex hoik tawng grawng in, kieh pui ku kaux nied ti mhong laung laung mai kieh briex koi sikah mai paw kieh hax song rhawm heue. 20Grawh grawng nawh, pa song rhawm pui, ang chix yuh pa rahsee Siyiex heue. 21Mawh kheu nan tik pa seeing brai ku ceu khawmuik mai pa chax nie luan yuh pa caox mai viex rhawm awn rhawm tiem mai rieb ti teei gumlox pa hoik sum ka daux pex, pa chix taoh ju pex heue. 22Kieh mawh pui pa hawt yuh gumlox mai paw kieh mawh ngie pa mhong giex, pie lhen ka tokaux tix heue. 23Mawh kheu phan tix kaux kaux pa mhong gumlox mai ang mawh pa hawt ti yuh, nawh awm pui tix kaux pa yaox pakngai riang pakpeung tix ka daux siliak. 24Grawh grawng nawh khaix hoik jhak hoik yaox nawh tokaux tix, nawh lih hu krax hu tix mai dom mawx dom an nawh piawm grawng mawh nawh pui yaung pa yuh ka mawx heue. 25Pui mawx ang ah, pa jhak ka daux beenli pa grum mhawm pa chix kieh luan mai pa ca kawn yuh nan mai ang mawh pui pa mhong mai piawm, pa mawh pui pa hawt yuh, pa yuh kaing, pui an tak sang pon bwanson ka daux pa yuh tix heue. 26Ka daux pex phan pui tix kaux kaux, ce tokaux tix mawh pui pa keud plak been bwan mai ang chix rien chix thox dak tix, nawh pie lhen ka rhawm rhi tokaux tix, pa keud pui an plak bwanson mawh pa giex going heue. 27Ceu pa hawt yuh plak been bwan pa singax, pa ang kawb pa seeing brai sivoe Keeing ex mai Siyiex mawh nin. Mawh pa hu kia ka kawn doe mai miexmai khankix, ka daux krax kha rhawm kix mai ceu pa chix priex tokaux tix kieh luan khaing pa kawb pa seeing brai haktiex heue.
Currently Selected:
YAKOP 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012