ISAYAX 1
1
1Grawng riang susai pa pon Isayax kawn simex Amok ti yaox, grawng pa dex dawd mai meung Yudax mai veng Yerusaliem ka daux baux singaix Uziyax, Yotham, Ahaza mai Hezakix, pa mawh simiang Yudax khankix.#2Sim 15:1-7, 15:32—16:20, 18:1—20:21; 2Been 26:1—32:33
Pa Caox Caig Meung Yudax
2Raoma eue, nghiet liak! mai haktiex eue, daong yhaok ka liak! grawh grawng nawh, Siyiex hoik ah nin; “Aux hoik eei liang kawn nyawm khankix ting lhaong mai kix hoik tieh feen ka Aux heue. 3Mawie tawng ka cao cie tix, mai la tawng ka kawg cao simiang tix, viang mawh nan, ceu pui Isarelax khankix ang tawng, pui aux khankix ang tawng ti keud heue. 4Eue!, ceu pui pa ting phimap phighram, cub pui pa klawm phimap phighram pa cien cub kawn praix pa yuh pa caox caig, kawn praix pa laux leeing; kix hoik tik vud ka Siyiex, kix hoik so kaoh pa song rhawm song rhi, ka Siyiex pa singax singeh ceu pui Isarelax, kix hoik deeh veeh ti ing ka plak khaix heue. 5Mawh kheu jao patix pex lai tieh feen tix bawg hoik tix bawg sonsang baox pon tix krax ciyang yuh ka mawx lie? Kaing pui khawmuik khawm leeing hoik saux kah mai rhawm rhi pui khawmuik hoik mao kah heue. 6Jah ka tiag caong tom hoek ka kaing, krax pa nyawm ot ang lai koe ka daux kix, viang mawh nan dee mat, dee uah mai dee leem khankix, ang nyang nyeep tix ang nyang fua tix mai ang nyang kraix moi ka bee heue. 7Haktiex pex mawh pa yiien, veng pex hoik gleeing tix ka ngu; pui tang meung khankix yuh haktiex pex laux leeing ka plak sivoe ngai pex mai an hoik mawh pa yiien, awm pa yieh pui tang praix ti tik heue. 8Mawh kheu nan, kawn bun Zion mawh pa hoik prah tix, awm nyiex gox tix lhang ka daux sipeem plix siiet tix gwang, awm nyiex gox tix lhang ka daux sipeem ma ke khankix, awm veng pa hoik lai lawm tix, tix veng heue. 9Phan ang mawh Siyiex Cao kru naing raoma, pa kawn prah kawn deuk ka ex ceeix ex hoik dawg awm veng Sawdom mai veng Gawmawrax heue. #Jah 19:24; Ro 9:29 10Pex pa mawh cao pa kwang piang veng Sawdom khankix eue, nghiet ka gumlox Siyiex heue, pex pa mawh pui ot daux veng Gawmawrax khankix eue, daong yhaok tix ka lox lai beenli Siyiex ex heue. 11Krax tan pa appong kied haoh hun cie pex khankix tak sang mawh krax tan pa koe grawng ceu patix ka son Aux lie? Siyiex ah nin, “Aux hoik koe krax tan pa gleeing kawn yung khankix mai klon bee tobrie pa hoik eei tix kluing khankix hoik grum naog heue. Aux ang koe krax khaw rhawm ka nham mawie mai nham yung iak mai nham pex khankix heue.#Amo 5:21-22 12Yam bleeh pex ka plak sivoe ngai aux, mawh pui mawx pa hoik mhaing ti cie in khaing daux tawm taix pex, sonsang dig ka daux biang nyiex Aux lie? 13Paw deeh viex krax tan pa appong pa giex going khankix hoek, ceu pa sioe bhawng mawh ceu pa seeing brai ka son Aux heue. Singaix haok khix khraox, singaix twah mai singaix kum cub pui hun, aux ang pon kham krax pa koe map koe grham ka daux bang kum pa singax an khankix heue. 14Singaix haok khix khraox pex khankix mai pawie pa hoik tat pex ti yuh khankix, khwan ju Aux koeng kah mai ceu ankix mawh pa tawx krax tuktiak tukte ka Aux, Aux hoik taug mao ka kham geu tix ceu an kix heue. 15Yam nyeu pex khawn taix tix khankix lih, Aux tak mox ngai khaing pex, pie viang pex yuh krax pa rawg tix bwan tom nie kawx Aux tak ang nghiet kah heue. Taix pex khankix mawh pa hoik naog ka nham heue. 16Sighrah tokaux cao pex yuh tokaux cao pex singax, teei ti tik can pa caox yuh pex khaing ka plak sivoe ngai Aux heue. Naox ka ceu pa yuh pa caox, 17gau ti yuh ceu pa mhawm, sawg ka pa rahsee, plak jhi ka phimap cao pa gut yeen, tieb tie ka son pa ang koe keeing, khyox khaw ka son miexmai heue. 18“Hoek yam in, ex ah grawng an kix tau mai paox tix, “Siyiex ah nin, viang phimap pex raoh rawt kawx, kix tak paing awm rawm rha, viang kix raoh awm raoh lung kawx kix tak awm hauk yung heue. 19Phan pex koe rhawm mai koe krax pa cu nghiet, pex tak yaox ti ih ceu pa mhawm khaing daux haktiex heue. 20Viang mawh nan phan pex thiang mai deeh tieh feen, pex tak laux leeing ka lawm vaig heue. Mawh kheu moing jheeh Siyiex hoik ah ti deuh heue.
Veng Pa Seeing Brai
21Veng pa kaux sijax hoik lih ti mawh bun pa coh kaux yuh ka mawx lie? An hoik mawh pa naog pa rahsee, krax pa mawh meh hoik ot ka daux nawh glang ka in heue. Viang mawh nan, yam in mawh deeh ot cao pa pah ju pui yum heue. 22Mau maix hoik lih ti mawh sivun, rawm plix siiet maix hoik mawh pa sikax tix tau mai rawm heue. 23Kawn lauxsimiang maix khankix hoik mawh pa deeh tieh feen mai mawh pa rom tix neuex tau mai pui briex pui ku kaux moh ka kraung pa cun praok khankix mai hawt ti hu khaix totaix khankix heue. Kix ang lai tiebtie ka son pa ang koe keeing mai yuh tix ang kieh grawng see miexmai hoek ka plak sivoe kix heue. 24Mawh kheu nan Siyiex cao kru naing raoma, Siyiex cao pa ting sibrawm ka daux ceu pui Isarelax, ah nin! an! aux tak kieh tokaux cao tix singai khaing daux pui pa tieh feen ka aux khankix mai deeh pawk bix tix ka piang pui pa koeng aux khankix heue. 25Aux tak deeh veeh khawn taix tix ka maix mai sigrhah sivun maix khawmuik mai teei tawng pa lheung maix khankix hu heue. 26Aux tak sang baox deeh tawx cao prawng see khankix ka maix phao voe mai cao pa tawx krax keud krax tawng khankix ka maix awm pa koe tom yam jah heue. Khaix an tak kok maix mawh veng pa rahsee mai veng pa kaux sijax heue. 27Veng Zion tak mawh pa pon krax taoh kheu pa rahsee mai pa deeh doh keud ka phimap tix ka daux pa mawh meh heue. 28Pui pa lud mai pui pa koe map koe grham khankix, tak sang laux leeing tau mai paox tix mai pui pa hoik tik vud ka Siyiex, tak mawh pa som pa nai heue. 29Mawh kheu kix tak koe krax pa kaig tua ka pang khaox piak van ka pa hoik koe rhawm maix ka heue mai tak mawh pa laux pakngai, kheu grawng sipeem pa hoik laug maix ti teei heue. 30Mawh kheu maix tak awm khaox piak van pa kroh lhax mai awm sipeem pa ang koe rawm heue. 31Pa ting riang tak sang awm keei saix ngu mai kaing jhaw yuh nawh tak awm situah ngu an khawm ra gleeing tau mai pui tix kaux kawx tak ang pon preet kah heue.
Currently Selected:
ISAYAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012