LIH HU 1
1
Krax Kham Geu Pui Isarelax
1In mawh ceu kaux kawn praix Isarelax, pa hoek ka meung Ejiptux, tau mai Yakop khawm pui daux nyiex ma nawh, 2pa mawh Rubin, Simion, Lewix mai Yudax, 3Isakha, Zebulun mai Binyamin, 4Dan, Napthalix, Gat mai Asha, 5doeh ru Yakop, koe atixgliah kaux, yam an Yosiep hoik ot sivoe kix ka daux meung Ejiptux. 6Khaix an Yosiep mai Puxke nawh mai doeh nyiex ma nawh khankix yum. 7Doeh ru pui Isarelax baox nie haoh hun#Cau 7:17 mai nied ti nie sipie mai kix haok hwan ting riang mai kix naog ka daux haktiex an. 8Yam an koe simiang pa khraox tix kaux daux meung Ejiptux, pa ang tawng ka Yosiep. 9Nawh ah nin ka pui tix, “Jhak heue, pui Isarelax hoik kied nie mai hoik kied ting riang khaing ex.” 10Hoek, kieh ex yuh cuyi tuktiaktukte ka kix, #Cau 7:19 phan ang mawh nan, ha kix nie haoh hun mai yam koe naing, kix tak hu sitoe ti mai pui koeng mai deeh puing ka ex, khaix an, kix tak lih hu khaing haktiex.” 11Mawh kheu nan, kix yaog cao kaing pa kwang piang kix. Tawx beeh glawm pa cien kieh yuh kaing pa kin daux pa khin mai kix yaox ti sum veng dee sang deuh kraung sinngao Pharaw#12:15 Pharaw: Dee bleeh mawh “simiang Ejiptux”, ang mawh ceu kaux kawn pui. , pa mawh veng Piton mai veng Ramase. 12Viang mawh nan, kix nie yeen ya piang kix mai pui Isarelax baox nie haoh hun mai nie pre sipie. Pui Ejiptux nie yaoh yee jao pui Isarelax. 13Mawh kheu nan, pui Ejiptux nie cau kix daux pa lang taung kin, 14Kieh kix yaox pa kin pa song daux pa cau kix yuh kaing, pa mawh kaing lon tiex sin mai kaing ma kaing kaung kuceu, ka daux pa cau pa khin kix yuh kaing. 15Khaix an simiang Ejiptux ah nin, ka bun pui Hebrie, cao priex keh ka daux kix pa kaux Shipharax mai Pu-a. 16“Yam yuh pax kaing priex keh ka bun Hebrie, jhak yam keh kix, phan mawh kawn simex pax tak pah nawh, viang mawh nan, phan mawh kawn bun deuh nawh im ju.” 17Cao priex keh an kiex lhat graung ka Siyiex mai kiex ang yuh awm lox pa tawm simiang Ejiptux, kiex deuh kawn nyawm simex khankix im ju. 18Simiang Ejiptux kok ka bun priex keh ah nin ka kiex. “Yuh ka mawh pax lai yuh nin mai deuh kawn simex khankix im ju lie?” 19Bun priex keh khankiex ah nin ka Pharaw, “Mawh kheu bun Hebrie ang awm bun Ejiptux, kix koe riang rao mai yie keh sivoe ang bun priex keh nyang hoek ka kix.” 20Siyiex yuh pa mhawm ka bun priex keh an kiex, mai pui nie haoh hun pre mai ting riang. 21Mawh kheu bun cao priex keh lhat graung ka Siyiex, Nawh Cao kieh kiex koe kawn praix. 22Pharaw tawx lox ka pui nawh khawmuik, “Can kawn nyawm simex pa keh khaing pui Hebrie ku kaux pex tak tik ka daux rawm klawng Nilax, #Cau 7:19 pex deuh ngie kawn nyawm bun ku kaux im ju heue.”
Currently Selected:
LIH HU 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012