YAOGYAW 40
40
Lox Rhax Yaogyaw
(Yaog 70:1-5)
1Aux krox jun ka Siyiex mai Nawh veeh plakngai ka aux mai nghiet ka lox pa kok yo aux heue. 2Nawh cao taoh aux lih khaing daux tiex mai daux glaox pa caox caig heue. Deuh caong aux ka piang rang ting mai kieh rhoi khaix caong aux kaux cong heue. 3Nawh Cao teei lox rhax pa khraox sau ka daux jheeh aux, sonsang yaogyaw ka Siyiex heue. Yam pui hun yaox, kix lhat graung mai deuh rhawm ka Siyiex heue. 4Pui pa deuh rhawm ka Siyiex mai pa via hu khaing pui pa ting rhawm mai khaing pui pa krub riang grang khankix koe bwanson heue. 5Siyiex aux eue, ceu pa daox am mai pa keud Maix son ex, kied haoh hun heue. Ceu pa yiag pa bak Maix ti deuh sivoe ngai Maix ang doh uik, phan aux krai grawng ceu pa yuh Maix, kied haoh hun, tom ang aux lai uik simin heue. 6Maix ang simie ti cie ka kraung ceu pa tan pa lu, aux hoik paoh yhaok tix mai ang rawg ka kraung ceu pa gleeing tix tawx sonsang ploi phimap. 7Aux tak sang hu heue, awm pa hoik tiem aux ti deuh grawng aux, daux bua Phuk Lai heue. 8Siyiex aux eue, aux kied gaux rhawm sonsang hawt yuh alo Maix, gumlox beenli Maix kawx, ot ka daux rhawm rhi aux#He 10:5-7 heue. 9Aux hoik sidiex gumlox pa rahsee Maix, sinax pui hun hankix heue. Siyiex eue, Maix hoik tawng grawng pa ang aux thox jheeh tix heue. 10Lox beenli pa rahsee Maix kawx, ang aux lai mox ka daux rhawm tix mai aux hoik sidiex grawng krax taoh Maix mai pa kaux sijax, krax moh krax rhawm mai pa kaux sijax Maix, aux ang lai mox sinax pui hun khankix heue. 11Siyiex eue, paw gun krax pa caux rhawm pa moh Maix ka aux liak mai krax pa caux rhawm Maix mai sijax mukheu Maix kia ngien ka aux jheeing jheeng liak.
Lox Rawg Bwan Sonsang Teem
12Grawh grawng nawh krax khi rhawm haoh hun tom ang uik tawng hoik rob vung viang aux heue. Phimap hoik krup ka aux tom ang aux pon jhak, nie lheu khaing hauk kaing mai rhawm rhi aux hoik iak hu heue. 13Siyiex eue, Maix taoh ka aux liak, Siyiex eue, nied tix teem ka aux liak. 14Pui pa sawg tix plaux ju aux khankix, kieh kix kaig tua mai laux plakngai liak, pui pa simie ti yuh pa caox ka aux khankix, kieh kix lhat mai hoek krax pa kaig tua liak. 15Can pui pa ah nin ka aux, haha, haha, kieh voi rhawm rhi mai hoek krax pa kaig tua liak. 16Can pui pa sawg ka Maix khankix, kieh kix gaux rhawm ka daux Maix liak, can kix pa khaw rhawm ka bwanson krax taoh Maix mai kix ah nin, kieh min plakngai Siyiex ting lhaong jheung jheung liak. 17Phan mawh aux viang aux hot sibhawm kawx, Siyiex kawn doh keud ka aux heue, Maix mawh Cao pa teem aux mai taoh ka aux heue, Siyiex aux eue, paw lai koi.
Currently Selected:
YAOGYAW 40: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
