2 THESALONIX 3
3
Rawg Bwan Ka Son Ex
1Lox pa deuk mawh nin, puxaik khankix eue, rawg bwan ka son ex, gumlox bwan Simiang Siyiex sang to tah hu mai koe min pakngai, awm hoik mawh mai pex, 2mai sonsang taoh ex khaing pui pa nieb keud pa ang khaw mai pa caox khankix, grawh grawng nawh ang pui khawmuik doh koe krax yum rhawm heue. 3Simiang Siyiex mawh pa kaux sijax, pa tak sang kieh pex kaux cong mai pau pex sonsang luan khaing kaw pa caox heue. 4Ex yum rhawm ka daux Simiang, ka grawh grawng pa hawt yuh pex yam in mai grawng baox sang hawt yuh pex, ceu pa hoik tawm ex ka pex khankix heue. 5Kieh Simiang thong jhi rhawm rhi pex laig ka daux pa moh Siyiex mai ka daux pa gun pa yeung Cao Khrit liak.
Tawx Satix Ka Pui Nieh
6Puxaik khankix eue, yam in ex tawm lox ka pex, ka daux ceu kaux Simiang ex Yesux Khrit, sonsang gwieh pex ti lih khaing puxaik pa hu ang khaw, pa ang hawt lox been pa hoik rieb kix khaing ex heue. 7Tokaux pex hoik tawng, grawng pa khaw pex ti hawt jawh ex, mawh kheu ang ex lai yuh pa ang khaw ka sinax pex, 8mai ang ex sax ih giex blah khaing tawm taix pui tix kaux kawx, ex nyhap mao yuh kaing ku singaix, son ang ex sang mawh beeh glawm ka pex tix kaux kawx, 9pa yuh ex nan ang mawh kheu ang ex koe akhwang, yuh sonsang kieh tokaux ex mawh mhai ti hawt jawh ka son pex, sonsang hawt jawh pex ka ex heue. 10Yam ot ex tau mai pex kawx, ex hoik tawm lox pa ah nin ka pex, “Phan pui tix kaux kaux ang cu ti yuh kaing, paw kieh nawh sawm. ” 11Ex mhong grawng hu pui tix blah ka sinax pex, daux pa yuh pa ang khaw, pa ang yuh kaing tidtix, pa nieb ah nieb yuh ceu pa ang dex ka tokaux tix heue. 12Ex tawm lox mai jeeh nyaw ka kix pa yuh kix kaing yiien yiien mhawm mhawm, tang ih blah cie tokaux tix heue. 13Puxaik khankix eue, paw laux rhawm rhi kheu yuh ceu pa mhawm mhiem heue. 14Phan pui tix kaux kaux ang cu ang nghiet ka lox ex, daux lai in, een ti tawng pui an, paw yuh paox pie mai nawh, sonsang kaig tua nawh kah heue. 15Paw sawn nawh mawh pui koeng, tawx satix ka nawh, awm mawh puxaik heue.
Lox Ghoik
16Kieh tokaux Simiang pa nhim, tawx pa nhim ka pex ka daux grawng ku ceu, ku jheung jheung liak, Kieh Simiang Siyiex ot tau mai pex khawmuik liak.
17Aux Pawlux teei ti tiiem lox nawb in ka taix tix, pa mawh mhai ka daux lai ku phuk, aux tom tiiem yuh nin heue. 18Kieh bwanson Simiang ex Yesux Khrit ot tau mai pex khawmuik liak, Amen.
Currently Selected:
2 THESALONIX 3: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
