1 THESALONIX 5
5
Rien Rhawm Ka Singaix Sang Hoek Simiang
1Puxaik khankix eue, grawh grawng bawg yam khankix, ang pex lo pa tiiem tidtix ka pex heue. 2Mawh kheu tokaux pex hoik tawng mhawm mhawm grawng singaix sang hoek Simiang Siyiex awm hoek pui briex yam pon sawm heue.#Mat 24:43; Luk 12:39; 2Pe 3:10 3Yam kawn tak ah kix “Koe pa nhim mai ang koe dee lhat,” yam an dom mawx dom an pa laux pa leeing sang hoek ka piang kix, awm pa saux yha hoek ka piang bun pa koe kaux mai ang kix tau ti pon luan heue. 4Puxaik khankix eue, pex ang ot ka daux pa faik, singaix an sang krup pex awm pui briex, 5pex khawmuik mawh kawn pa riang mai kawn ponngaix, ang ex mawh kawn ponsawm mai kawn pa faik heue. 6Mawh kheu nan paw kieh ex laig it awm pui pa deuk khankix, viang mawh nan kieh ex pau ti jhak mai priex rhawm tix heue. 7Kix pa laig it, laig it yam ponsawm, kix pa yoek, yoek yam ponsawm, 8viang mawh nan kheu mawh ex pa dex dawd mai ponngaix kieh ex priex rhawm tix mai ceep kraung naing pa tie naok pa mawh krax yum rhawm mai krax moh krax rhawm mai son mhok rhiem ceep ka krax keud pot jun pot sonsang hoek krax taoh heue.#Isa 59:17 9Siyiex hoik ciak ti deuh ex sonsang pon pa song rhawm songrhi ang mawh, hoik ciak ti deuh ex sonsang pon krax taoh kheu Simiang ex Yesux Khrit, 10pa hoik yum son ex, viang ex siduad ang ah, laig it ang ah, ex sang pon ti im tau mai Nawh Cao heue. 11Mawh kheu nan jeeh nyaw ka paox tix, yuh ti kieh paox tix haok huan, awm pa yuh pex yam in heue.
Lox tawm Mai Lox Nawb Bwan
12Puxaik khankix eue, ex khyox khaw ka pex, sonsang tawng pex ka kix pa yuh kaing ka sinax pex mai giex kaing ka piang pex ka daux Simiang Siyiex, pa sidiex ti tawx satix ka pex, 13sonsang yungyi ka kix, ka daux krax moh krax rhawm pa kied ting, kheu kaing jhaw pa yuh kix heue. Kieh koe pa nhim mai pa ang simah simiang ka tokaux pex awx. 14Puxaik khankix eue, ex jeeh nyaw ka pex, sonsang tawx satix ka kix pa yuh pa ang khaw mai sonsang tawx riang ka kix pa iak rhawm mai sonsang teem ka kix pa iak riang iak rao mai kieh koe rhawm pa lang gun lang yeung ka pui khawmuik heue. 15Son ang pui sang deeh pawk pa caox, ka son pa caox tix kaux kawx, hawt ti yuh pa mhawm jheung jheung ka paox tix, tix kaux lai tix kaux mai ka pui khawmuik heue. 16Gaux rhawm jheung jheung heue. 17Rawg bwan ang jud ang jai. 18Yaogyaw bwanson ka daux ku ceu, in mawh alo Siyiex ka daux Yesux Khrit ka son pex heue. 19Paw preet yeet ka Khuan Cao. 20Paw een lox jhai khankix ang koe ceu. 21Tiag cheu ti yaox ka ku ceu khawmuik, jhawp ka pa mhawm tom kaux. 22Paw dex paw yuh, via khaing pa caox ku ceu awx.
23Kieh tokaux Siyiex Cao pa nhim, kieh pex grum singax khawmuik, sonsang priex khuan pex mai ju pex mai tokaux pex khawmuik, son ang sang koe dee deuh phimap kah, yam hoek Simiang ex Yesux Khrit heue. 24Kaw pa hoik kok pex, mawh pa kaux sijax, Nawh tak sang yuh nan heue.
25Puxaik khankix eue, rawg bwan ka son ex liak. 26Nawb ka puxaik khankix khawmuik ka pa ngheut pa singax singeh heue. 27Aux tawm lox ka pex ka daux Simiang Siyiex, sonsang kieh phat lai in ka puxaik pa singax singeh khawmuik heue.
28Kieh bwanson Simiang ex Yesux Khrit ot tau mai pex liak. Amen.
Currently Selected:
1 THESALONIX 5: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
