1 THESALONIX 2
2
Grawng Kaing Yuh Pawlux
1Puxaik khankix eue, tokaux pex hoik tawng grawng pa laig ex ka pex ang mawh pa giex going. 2Awm pa hoik tawng pex, viang ex hoik yaox ti kham geu mai viang hoik yuh pa ang cee ang cak ka ex ka daux veng Philippix kawx,#Cau 16:19-24 ex viex rhawm kwa ka daux Siyiex ex ti sidiex gau lox bwan gaux rhawm Siyiex ka pex, ka daux pa kied nie ngah paox tix heue.#Cau 17:1-9 3Lox pa sidiex ex ang mawh ceu pa lud, pa ang singax singeh, ka daux pie lhen, 4awm pa hoik khaw hoik caw ex ka rhawm Siyiex ti sang tawx sang pong lox bwan gaux rhawm ka ex, ex tom sidiex sonsang khaw ka rhawm kawn pui ang mawh, sonsang khaw ka rhawm Siyiex, kaw pa cheu ti yaox rhawm rhi ex heue. 5Awm pa hoik tawng pex, ang ex sax shiao lox pa nieb lak yaw tix bawg kawx, ang sax sawg son sang nieb mi koe, grawng in Siyiex mawh mhai ruk kah heue. 6Mawh kheu mawh ex kawncau pa ting Cao Khrit, viang ex teei chix mawh beeh glawm kawx, khaing pex ang ah, khaing tang kaux ang ah, ang ex sax sawg min plakngai khaing kawn pui heue. 7Yam ot ex sinax pex, ex hoik yuh pa awn pa nge, awm miex pa kawn kieh kawn tix peuex, kia ngien ka kawn tix khankix heue. 8Awm an, kheu kied moh ex ka pex, ex gaux rhawm ti tawx lox bwan gaux rhawm Siyiex ka pex khaing ang joeng mawh khawm ju ex kawx simie ti tawx kah, mawh kheu kied moh ex ka pex heue. 9Puxaik khankix eue, pex doh keud ka pa hoik nyhap hoik mao ex, yam yuh ex kaing ku ngaix, son ang ex sang mawh beeh glawm ka pex tix kaux kawx mai ex sidiex gau lox bwan gaux rhawm ka pex heue. 10Pex mawh pa kham mhai ruk, khawm Siyiex kawx kham mhai ruk, grawng pa singax singeh mai pa rahsee, pa ang koe dee deuh phimap, ka daux ceu pa hoik yuh tokaux ex ka pex pa yum rhawm khankix, mawh pa yuh ka mawx. 11Awm pa hoik tawng pex grawng hoik yuh ex ka mawx ka pex ku kaux, awm yuh keeing ka kawn praix tix, sidiex gau jeeh nyaw kham mhai ruk ka pex, 12sonsang hu pex awm pa keung ka Siyiex, kaw pa hoik kok pex laig ka daux meung mai min pakngai cie tokaux Nawh Cao heue. 13Mawh kheu in, ex kawx yaogyaw ka bwanson Siyiex ang jud ang jai, kheu hoik rieb pex ti teei gumlox pa mhong khaing ex, pa mawh gumlox bwan Siyiex, pa ang rieb ti teei awm mawh gumlox kawn pui, hoik rieb awm mawh gumlox Siyiex pa mawh pa meh, pa yuh kaing ka plak daux pex pa yum rhawm khankix heue. 14Puxaik khankix eue, pex hoik lih ti mawh pa hawt jawh, awm ceu cao Siyiex pa ot ka daux meung Yudax, daux Yesux Khrit, mawh kheu pex kawx hoik yaox ti kham geu ceu pa awm paox tix khaing tawm taix pui meung tokaux pex,#Cau 17:5 awm kix kawx hoik yaox ti kham geu khaing tawm taix pui Yudax khankix, 15pa mawh pui pa hoik pah ka Simiang Yesux mai khawm cao jhai khankix yum, ka ex kawx kix tuktiaktukte kah,#Cau 9:23,29, 13:45,50, 14:2,5,19, 17:5,13, 18:12 kix ang khaw ka rhawm Siyiex, mawh pa ang caw ka kawn pui khawmuik. 16Kix kieh raw ka pa sidiex ex ka pui tang ceu sonsang hoek kix krax taoh, sonsang grum naog phimap kix jheung jheung, pa song rhawm songrhi hoik hoek ka piang kix tom grum naog heue.
Pawlux Simie Ti Baox Hu Fi
17Puxaik khankix eue, viang ex yaox ti siyang ot khaing pex ti vud ti cu daux tokaux, rhawm ex ang siyang ot khaing pex, ex kied byaong mai simie ti yaox pex, nie lheu lang teung coca sonsang yaox pakngai pakbaox pex heue. 18Mawh kheu nan ex tom simie ti hoek ka pex, aux Pawlux simie ti hoek ka pex tix bawg hoik tix bawg, viang mawh nan Satan kieh raw ka ex heue. 19Pa keud pot jun pot ex, phan ang mawh nan pa gaux rhawm ex, phan ang mawh nan mhok khri pa yaw rangdi ex kah, mawh pa yuh ka mawx? Pex mawh pa yuh nan ka sivoe Simiang ex Yesux Khrit yam sang hoek Nawh ang mawh lie? 20Pex mawh min pakngai ex mai pa gaux rhawm ex heue.
Currently Selected:
1 THESALONIX 2: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
