Proverbios 1
1
U co'ojil u ca'ansajilo'ob Proverbios
1Ba'axo'ob tu ya'alaj Salomón, u paal David u ajawil Israel,
2u biilalil le t'aano'oba' u ti'al u dzáa ojéelajil yéetel ca'ansajil,
áantaj u ti'al u ma'alob ch'a'a nu'ucta'al t'aano'ob
3u ti'al u yantal ti' wíinic, utzil tuucul,
ti'ibil óolal, tojil cuxtal yéetel yiiyij tuucul;
4cu beetic u ma'alob tuucul le táanquelemo'ob j ma' na'ato'obo',
u ti'al xan u dzáa ti'ob kaj óolal yéetel u ti'al u máansic u tuuculo'ob.
5Le aj ojel, máax yaan u na'at yéetel cu qui' u'uyic t'aane'
yéetel cu yantal u yojéelaj cu ma'alob canbal xan
6u ti'al u ch'a'a nu'uct le ba'ax cu ya'alico'ob le aj ojéelajo'obo',
u t'aano'ob, u quet t'aano'ob yéetel u dzaa na'ato'ob.
7Le ojéelajo' cu chúunul yéetel u tzi'iquil Yuumtzil,
sle j ma' na'ato'obo' cu cúulpachtico'ob le ojéelajo' bey xan le ca'anbesajo'.
Tzol xiquin u ti'al táanquelemo'ob
8In j xibil paal, táan óolt ba'ax cu nu'uctic ti' teech a taata,
ma' xan a quex óoltic u ca'anbesaj a maama,
9tumen bíin a ti'alint bey jun p'éel qui'ichquelem ba'al cu jadzutzquinaje':
bey jun p'éel báakcaale', wa bey jun p'éel péet jo'ole'.
10Wa le aj kebano'ob u káato'ob u tuseche',
¡ma' a cha'ic u tusiquecho'ob in j xibil paal!
11Wa ca kuchuc u ya'alo'ob xan ti' teech: Co'oten t éetel;
chéen tu yo'olal mix ba'ale' cone'ex c dzic jun p'éel léech
u ti'al quíimsic wa máax j ma' si'ipil le quéen máanaque'.
12Yaan c lukic cuxa'ano'ob le máaxo'ob yaan subtalo'obo'
je'el bix u lu'ukul le quimeno'ob cu lúubulo'ob ichil le mucnalo'.
13Bíin anac ti' to'on tuláacal u jejeláasil ayikalilo'ob,
¡bíin c chup c najilo'on yéetel tuláacal le ba'alo'ob c ocoltmajo'!
14Co'oten a táacbes t éetel ba'ax cu taal u kiinil ti' teech
beyo' bíin anac ti' to'on jun p'éelili' ayikalil.
15¡Ba'ale' ma' a bin tu yéetelo'ob, in paal!
Náachcuntabáa ti' u kaakas cuxtalo'ob,
16tumen taac u beetico'ob loob;
¡taac xan u wequico'ob ki'ik!
17Quex mix jun p'éel utz cu taasic u dzabal jun p'éel léech
wa cu páajtal u yila'al tumen le ch'íicho'obo',
18le máaco'obo' cu dzico'ob léech u ti'alinto'ob
cu dzáico'ob xan u cuxtalo'ob tu chi' quíimil.
19Bey u dzo'ocol le kaakas aj dzíibolalo'obo';
cu quíimsa'alo'ob tumen u kaas dzíbolalo'ob.
Payal t'aan le ojéelalo'
20Ti' bejo'ob yéetel ti' kíiwico'ob
le ojéelajo' cu beetic u yu'uba'al u t'aan;
21cu ka'aytic u t'aano'ob tu jooltaquil naj,
ti' u cúuchilo'ob tu'ux cu sen much'tal caaj:
22Táanqueleme'ex mix ba'al a wojele'ex, j p'a'astaje'ex yéetel j ma' na'ate'ex,
¿tac ba'ax kiin bíin jáawac a yaacuntque'ex le x ma' ojéelajilo',
tac ba'ax kiin bíin a p'ate'ex u qui'imac óolalil a p'a'astaje'ex
bey xan a p'ectique'ex le ojéelajo'?
23Qui' u'uye'ex in nu'uc t'aano'obi',
téen túune' bíin in chupe'ex yéetel in pixan;
bíin in dzáa a kaj óolte'ex in tuuculo'ob.
24Tene' dzo'oc in t'anique'ex, dzo'oc xan in payal t'antique'ex,
ba'ale' te'exe' ma' a wóolte'ex a táan óoltene'exi',
25Ma' a káat a wu'uye'ex in tzol xiquino'ob;
ma' ta wóoltaje'ex a wu'uye'ex in nu'uc t'aano'obi'.
26¡Je'el u kuchul u kiinil in che'ej le quéen kuchuc te'ex le yaj óolalo'!
¡Bíin in che'ejte'ex le quéen in wila'a' táan quíimile'ex yéetel sajaquile'
27le quéen talac ta wóokole'ex sajaquilo'ob yéetel talam ba'alo'ob,
yaamyam óolal yéetel yaj óolal,
bey jun p'éel moson cu jutic tuláacal ba'ale'!
28Ti' le kiino' bíin a t'aanene'ex, ba'ale' ma' bíin in núuc a t'aani';
bíin a caxanten, ba'ale' ma' bíin a núuptantene'exi';
29tumen ca kex óotique'ex le ojéelalo',
ma' xan a káate'ex a tzique'ex Yuumtzili'.
30Ma' ta éejemtique'ex in tzol xiquino'ob;
ca kex óoltique'ex xan in nu'uc t'aano'ob.
31¡Yaan a mukyajtique'ex u tojol a kaakas cuxtale'ex!
¡bíin náacac a wóole'ex xan ti' a kaakas cuxtale'ex!
32Le máaxo'ob mix ba'al u yojelo'obo' cu quíimsa'alo'ob tumen u j ma' ojéelajilo'ob;
le j ma' na'ato'obo' bíin xu'ulsa'aco'ob tumen u j ma' dzaa óolalo'ob;
33ba'ale' le máax cu dzáic u yóol u yu'ubiquene' bíin cuxlac ichil jéedzel óolalil,
bíin cuxlac xan x ma' sajaquil ti' quíimil.
Currently Selected:
Proverbios 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992