Abdías 1
1
Cu pa'ajal u subtal Edom
1Bóobatil tu kamaj Abdías ti' Yuumtzil ich náayil.
Dzo'oc c u'uyic jun p'éel u péectzil Yuumtzil;
jun túul aj bisaj t'aane' dzo'oc u bin te j múuch' caajo'ob u ti'al u ya'alic ti'ob:
¡Xíimbalnene'ex! ¡cone'ex j ba'atelte'ex Edom!
Ku Yuumtzile' cu ya'alic ti' Edom:
2Bin in ca'aj in p'eexcuntech ichil le múuch' caajo'obo'
yéetel xan in noj pajic a subtal.
3A j ca'anal ichile' tu tusajech. Caja'anech tu cáap le chaway túuno'ob, ca'anal tu'ux caja'anech,
le t o'olale' ca tucultique' mix máac cu páajtal u léench'intiquech.
4Ba'ale' quex ca xiknalnaquech ca'anal bey jun túul j cóote'
yéetel ca a beet a ku' te j eeko'obo',
tac ti' bíin in beet ca lúubquecho'.
Yuumtzile' cu ya'alic:
5Wa ca talaco'ob le j oocolo'ob u yocoltecho'ob yéetel áakabe',
ma' bíin u biso'ob tuláacali';
wa ca talaco'ob le j mol uvaobo' bíin u p'ato'ob dze'edzequi'.
Ba'ale' a aj p'eeco'obe', mix u meendzulil bíin u p'ato'ob.
6¡Esaú, dzo'oc a seen ocolta'al!
¡Dzo'oc u yocolta'al tac u yalab a taakin!
7Tuláacal a wéet t'aano'obe' tu tusajecho'ob,
ca tu tojolch'itajecho'ob ta lu'um.
Tac a wéet bisajba'ob cu beetico'ob ti' teech kaas,
a wéet t'aano'ob xane' tu t'inajo'ob léech ta beel.
¡Edome' mina'an u na'at!
8Yuumtzile' cu ya'alic:
Le quéen in jadz Edome', bíin in xu'uls tuláacal u aj ojéelajo'ob yéetel bíin in lukes le na'ato'
ti' máaxo'ob caja'ano'ob te tu ca'anal lu'umilo'ob Esauo'.
9U aj ba'atelo'ob Temane' bíin quiquilnaco'ob yéetel saajquil,
ti' u ca'anal lu'umil Esaú xane' mix máac bíin p'áatac cuxa'ani'.
U si'ipil Edom
10Bíin pa'ajac a subtal, bíin xu'ulsa'aquech jun puli',
tu yo'olal ta loobiltaj yéetel ta quiimsaj a wíidzin Jacob.
11Le ca j taal le aj p'eeco'ob u jáanpayto'ob u ayikalil le caajo',
le ca j taal le j táanxel lu'umilo'ob aj ba'atelo'ob u pa'ob u jool najilo'ob Jerusalene',
¡teche' ta dzajabáa jun tzéel!
Le ca tu bulo'ob u nu'uculilo'ob u yoocolo'ob
yéetel ca tu bisajo'ob u ayikalilo'obe',
¡teche' ta beetaj ba'ax tu beetajo'ob!
12Ma' u najmal u qui'imactal a wóol le ca ta wilaj a wíidzin
tu kiinil táan u bin kaasil ti'i',
mix u najmal u qui'imactal a wóol le ca ta wilaj Judá tu kiinil u yóotzilali',
mix u najmal ca'ach che'ejtic u kiinil u yaj óolali'.
13Ma' u najmal a wocol ca'ach tin caajal tu kiinil u yaj óolali',
mix u najmal ca'ach a che'ejtic tu kiinil u yóotzilili'
mix tu kiinil binic kaas ti'i',
mix u najmal a wocoltic ca'ach u ayikalil tu kiinil u noj yajili'.
14Ma' u najmal a wa'atal ca'ach tu xa'ay u bejilo'ob
u ti'al a quiims le máaxo'ob cu púudzulo'obo',
mix u najmal a kubic ca'ach le j púudzo'ob tu kiinil le yaj óolal.
15Le ba'ax ta beetaj ti' u láako'obe', bey xan bíin beeta'ac ta wéetelo':
¡bíin a kam ba'ax ca najmatic!
U nojbe'encunsa'al Israel
Dzo'oc u náadzal u kiinil Yuumtzil
u ti'al tuláacal le múuch' caajo'obo'.
16Je'el bix káajil le ukul ta wukaje'ex tin quili'ich jo'ol lu'umo',
bey káajil xan le ukul cu bin j ukbil
tumen le u láak múuch' caajo'obo';
bey bíin u yuko'ob jujun xúuchil.
17Ba'ale' u witzil Sione' bíin béeyac jun p'éel quili'ich cúuchil
tu'ux bíin páatac u ta'acbesicuba'ob dze'edzequi'.
U ch'i'ibal Jacobe' bíin u ti'alinto'ob u lu'umo'ob tu ca'a téen;
18u ch'i'ibalo'ob Jacob yéetel u ch'i'ibalo'ob Josee'
bíin suunaco'ob káakil, bíin suunaco'ob xan tóoch'bal káakil,
u ch'i'ibalo'ob Esaue' bíin suunaco'ob kuuchil
kuuch cu bin láaj tóocbil tumen le káako'.
¡Mix jun túul ti' u ch'i'ibal Esaú cu bin u tocubáa!
Téen Yuumtzil, teen j a'ale.
19-20U israelitailo'ob Négueve' bíin cajlaco'ob tu pu'uquilo'ob Esaú, le j p'aatalo'ob te j táax lu'umo' bíin u ch'a'ob u lu'umilo'ob le j filisteobo'. Bey xan bíin u ch'a'ob u lu'umilo'ob Efraín yéetel u lu'umilo'ob Samaria, le j Benjaminilo'obo' bíin u ch'a'ob xan u lu'umilo'ob Galaad. U nojoch múuch'ul le j israelitaob j bisa'abo'ob táanxel lu'umilo' bíin u ch'a'ob u lu'umilo'ob le j cananeob tac Sarepta, yéetel le Jerusalenilo'ob j palitzilta'ano'ob Sefarado' bíin u ch'a'ob u noj caajilo'ob Néguev. 21Bíin na'acaco'ob qui'imac u yóolo'ob tu witzil Sión u ti'al u xot kinto'ob le máaxo'ob caja'ano'ob te tu ca'anal lu'umilo'ob Esaú, Yuumtzil túune' leti' bíin ajawnac.
Currently Selected:
Abdías 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992