Miqueas 1
1
U p'is óolal Ku tu yóokol Samaria
1Lela' leti' le túuchi' t'aan tu ya'alaj Yuumtzil ti' Miqueas j moresetil, bey xan le j e'esa'ab ti' tu yo'olal Samaria yéetel Jerusalén, tu kiinilo'ob u ajawilo'ob Jotán, Acaz yéetel Ezequías tu lu'umil Judá.
2Caaje'ex, u'uye'ex tuláacale'ex lela';
u cajnáalile'ex tuláacal le lu'umo'oba', ch'en xiquinene'ex ma'alob.
Yuumtzile', bíin u tac a poole'ex likbal tu kulnaj.
3Yuumtzile' bíin jóokoc tu cúuchil tu'ux cajacbal
bíin taalac xíimbalil tu yóokol u ca'analil le pu'uco'obo'.
4Tu yáanal u yooco'ob bíin yíibic le pu'uco'obo'
je'el bix u yíibil quib dza'an te j káako',
le táax kóom lu'umo'ob xano' bíin je'epajac ca'a búujil je'el bix u bu'ujul tumen u yáalcab sen ya'ab ja'e'.
5Tuláacal lela' bíin úuchuc tu yo'olal u dzu'uyil u pucsi'ikal u caajil Jacob,
tu yo'olal u keebano'ob u ajawil Israel.
¿Tu'ux yaan u dzu'uy pucsi'ikalil Jacob?
¡Ti' yaan tu caajil Samariae'!
¿Tu'ux yano'ob u kulnajilo'ob u beetbil kuob Jacob?
¡Ti' yano'ob jach Jerusalene'!
6Le t o'olal cu ya'alic Yuumtzil:
U caajil Samariae' bíin in sut jun p'éel x lab pakil,
jun p'éel jáanil lu'um u ti'al u pa'akal uvaob.
U tuunichilo'ob le caajo' bíin in ki'itbes te j táax kóom lu'umo'
bíin in beet u chíicpajal u chuun pakilo'ob.
7Bíin láaj xe'exet'pajac u beetbil kuob,
bíin xan láaj tóoca'ac u quili'ich chuun che'ob.
Bey tumen j beeta'abo'ob yéetel u tojol le x cáacbacho'obo',
bíin suunaco'ob xan u tojol x cáacbacho'ob.
Miquease' cu yáacam okol
8Le t o'olal bíin okolnaquen tu yéetel nojoch óotzil óolal;
Let o'olal bíin máanaquen x ma' xanabil yéetel x ma' nookil,
táan in awat okol bey jun túul j káaxil peeke',
táan xan in awat je'el bix u chichanil jun túul avestruse'.
9Tumen u quimpaja'anil Samariae', mina'an dzaac u ti'al:
dzooc u náacpachtic Judá, dzo'oc u kuchul tac Jerusalén,
u caajil tu'ux caja'an in caajal.
10Lela', ma' a wa'alique'ex ti' u cajnáalilo'ob Gat;
ma' u jo'op'ol a wokole'ex.
Bablaba'ex ichil u lu'umil Bet-le-afra, tu yo'olal ki'inamil.
11¡U cajnáalile'ex safir, xeene'ex táanxel lu'umil,
xene'ex chacnule'ex, chuupe'ex yéetel subtzilil!
¡U cajnáalilo'ob Zaanane' ma' bíin jóokoco'obi'!
¡Táan u sen úuchul okol Bet-esel,
te'exe' bíin p'áataque'ex x ma' áantajil!
12Le máaxo'ob cajnáalo'ob Marote', cu ch'o'och'oticuba'ob tu yo'olal ki'inamil
tumen táan u yaayantico'ob u yu'ubicuba'ob utz,
tumen Yuumtzile' dzo'oc u beetic u kuchul le loob
tac tu jool caajilo'ob Jerusalén.
13Te'exe' u cajnáalile'ex Laquis,
ta dzu'uyquintaje'ex a wóole'ex je'el bix Israele',
ta wo'olale'ex j kebanchaj Sión,
leche'ex le tzíiminilo'ob tu bolano'obo'.
14A'ale'ex tac mix bikin ti' Moreset-gat.
U caajil Aczibe' bíin meyajnac x léechebil ti' u ajawilo'ob Israel.
15Yuumtzile' cu ya'alic:
Te'ex u cajnáalile'ex Maresae',
bíin in ca'a túuxt jun túul j pa'a muuk ta wóokole'ex,
u asab yéeya'an j xiixib máaquil Israel,
bíin xi'ic u jupubáa ichil u yáactunil Adulam.
16Teche' u caajil Sión, kolist a jo'ol u ti'al u yila'al táan a mukyaj,
tu yo'olal le a paalal a sen yabiltmajo'obo'.
Kolist a jo'ol tac quéen p'áatac táax bey u pool jun túul j ch'oome',
tumen a paalale' bíin bisa'aco'ob táanxel lu'umil.
Currently Selected:
Miqueas 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992