Josué 1
1
Kue' cu t'anic josué
1Cu dzo'ocol u quíimil Moisés u palitzil Yuumtzile', j t'aanaj Yuumtzil yéetel Josué u paal Nun u aj yáantaj Moisese', ca tu ya'alaj ti': 2Bey dzo'oc u quíimil in palitzil Moiseso', bejela'e', teech bíin a ch'act u yáalcab ja'il Jordán yéetel tuláacal u caajil Israel, u ti'al a bine'ex te j lu'um bin in ca'aj in dzaj te'exo'. 3Je'el bix tin séeb chi'itilac ti' Moiseso', bíin in dzáa te'ex tuláacal le lu'um tu'ux bíin a pe'echakte'exo'. 4Bíin in dzáa te'ex le lu'um líikbal ti' le x tocoy lu'um yéetel u pu'uquilo'ob Líbano tac tu nojoch áalcab ja'il Éfrautes, yéetel xan tuláacal u lu'um le hititaob, tac te j nojoch ka'anabo'. 5Mix máac bíin dzáanche'etiquech tuláacal u kiinilo'ob a cuxtal, tene' bíin yanaquen ta wéetel je'el bix úuchic in wantal yéetel Moisese', ma' bíin in p'atechi', mix bíin in xunp'ajtech mix bikini'. 6Xiibil máacchajquech yéetel mu'uka'anchajquech, tumen teech bíin t'oxic le lu'um ti' le caajo', tumen leti' le kanba'albáil tin séeb chi'itaj ti' u máanja'an ch'i'ibalo'obo'. 7Chéen ba'ax quin káatic teche', ca j xiibil máacchajquech yéetel ca a dzáa a wóol, bey xan ca a dzo'ocbes tuláacal in wa'almaj t'aan tu dzaj teech in palitzil Moiseso'. Dzo'ocbes je'el bix láaj dzíibta'anilo', u ti'al ca xi'ic teech utzil ti' tuláacal ba'ax bíin a beete. 8Babal a'al mantadz tuláacal ba'ax cu ya'alic u ju'unil u ya'almaj t'aan Kuo', tucult ba'ax cu ya'alic bey yéetel kiin bey yéetel áakab, u ti'al a beetic mantadz kiin tuláacal ba'axo'ob cu ya'alic. Beyo' tuláacal ba'ax ca beetique', bíin xi'ic teech utzil. 9Teen quin wa'alic teech ca xibchajquech yéetel ca mu'uka'anchajquech. Ma' a ch'a'ic sajaquil mix u lúubul a wóol, tumen teen a Yuumtzil a Ku xane', ti' yanen ta wéetel je'el tu'ux bíin xi'iqueche'.
Josuee' cu nu'ucbesicubaa u ti'al le jáanpaytaj lu'umo'
10Josué túune' tu tusbeltaj ti' u nuuquilo'ob le caaj beya': 11Xeene'ex ichil tuláacal le tu'ux jelecbal le caajo', ca wa'ale'ex ti' tuláacal caaj ca beeta'ac janalo'ob u ti'al le bejo', tumen ichil óox p'éel kiine' bíin c ch'acte'ex u yáalcab ja'il Jordán u ti'al c jáanpaytique'ex le lu'um bíin u dzáa to'on Yuumtzil c Kuo'.
12Josuee' tu t'anaj xan u múuch' cajtalilo'ob Rubén yéetel Gad bey xan u táancoch ch'i'ibalo'ob Manasese', ca tu ya'alaj ti'ob: 13Ka'ajac te'ex ba'ax tu ya'alaj te'ex Moisés u palitzil Yuumtzil, le ca j t'aanaje': Yuumtzil a Kuexo' bin u ca'aj u dzaj te'ex le lu'um yaan waya' u ti'al u páajtal a je'elele'ex. 14P'áate'ex way a watane'exe', a paalale'ex bey xan a waalake'ex, ti' le lu'um tu dzaj te'ex Moisés way tu tzéel le Jordano'. Ba'ale' tuláacal le xiibo'ob nu'uca'ano'ob u ti'al j ba'atele', u ch'a'ob u nu'ucul u ba'atelo'obe' ca xi'ico'ob táanil ti' u láako'ob u ti'al ca u yáanto'ob, 15tac le kiin bíin u dzaa Yuumtzil ti'ob u cúuchil u je'elelo'ob je'el bix tu dzaj te'exo', ca xan u ti'alinto'ob le lu'um bíin dza'abac ti'ob tumen Yuumtzilo'. Cu dzo'ocole' te'exe' cu páajtal a suute'ex ta lu'ume'ex yaan tu lakin le u yáalcab ja'il Jordano', u ti'al ca a ti'alinte'ex jun puli' le lu'um tu dzaj te'ex Moisés u palitzil Kuo'.
16Leti'obe' tu núucajo'ob: Bíin c beet tuláacal ba'ax dzo'oc a tusbeltic to'on, bíin xi'ico'on tu'ux bíin a túuchi'ito'on. 17Mantadz bíin c u'uyaj t'aan teech je'el bix úuchic c u'uyaj t'antic Moiseso'. Chéen ba'ax c káatique', ca u láakintech Yuumtzil je'el bix úuchic u láakintic Moiseso'. 18Tuláacal máax ca táabac ma' u yu'ubaj t'antic ba'axo'ob bíin a wa'ale', yaan u quíimil. Chéen c káatic teech ca j xiibil máacchajquech yéetel ca mu'uka'anchajquech.
Currently Selected:
Josué 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992