Joel 1
1
Le sáako'obo' cu kascuntico'ob le paakalo'obo'.
1Le péectzila' Yuumtzil j a'al ti' Joel, u paal Petuel.
2U'uye'ex ma'alob, u nuuquile'ex, yéetel tuláacale'ex u cajnáalile'ex le lu'uma'.
¿A wilmaje'ex wa ti' u láak kiin ba'al beya'?
¿J ila'ab wa ba'al chica'an ti' lela', tu kiinilo'ob a taataex?
3Tzicbalte'ex ti' a paalale'ex, leti'obe' ca u tzicbalto'ob ti' u paalalo'ob xan, u paalalo'obe' ti' le máaxo'ob ma' síijico'obo'.
4Tuláacal ba'ax j p'áate' jaanta'ab tumen le j sáako'obo': le dze'edzec j p'áato', j taalo'ob u láako'obe' ca tu jaantajo'ob.
5¡Cala'ane'ex, te'exe' aajene'ex!
¡okolnaque'ex, j ukul vinoex, tumen tac u kab uvae' bíin lukesa'ac ti' te'ex!
6Tumen le j sáako', bey jun p'éel nojoch mu'uka'an aj ba'atelo'obe',
yaan u cojo'ob león yéetel u dza'ayo'ob leónae',
dzo'oc u chupico'ob in múuch' caajalo'ob.
7Dzo'oc u ch'éejsico'ob c pakal uvaob, dzo'oc u xe'exet'ico'ob c higueraob;
dzo'oc u láaj dzíilico'ob, dzo'oc xan u p'atico'ob sac u kabo'ob.
8Bey x dzo'ocol beel x ch'úupale' cu yokol, cu búuquintic u nookil quimen
tu yo'olal j quíim le máax dzáa u t'aanil dzo'ocol beel ti'o',
9bey u yokolo'ob le aj kiino'obo' tumen j kulnaje'
mina'an janalbe'en neeko'ob mix vino' u ti'al u ti'ibil óolal Yuumtzil.
10Le coolo'obo' j ch'éejsa'abo'ob,
le lu'umo'obo' ichil okom óol yanilo'ob.
Le trigoo' dzo'oc u sa'atal, u x péet pachilo'ob le uvao' dzo'oc u tijil
le olivo'ob xano' dzo'oc u quíimilo'ob.
11Te'ex máaxe'ex ca meyaje'ex te j coolo'obo'
yéetel te tu x péet pachil le uvaobo',
okolnene'ex yéetel óotzil óolal,
tumen j kaschaj le pakalo'obo' bey xan u joochilo'ob trigo yéetel cebadaa.
12Dzo'oc u tijil u x péet pachil uvaob
dzo'oc xan u kastal le higueraobo'.
J tij le granadaobo', le xa'ano'obo' le manzanaobo'
yéetel tuláacal u che'ilo'ob káax.
¡Bey xu'ulic u qui'imac óolal tuláacal le máaco'obo'!
13Te'ex aj kiine'ex, u aj meeyjule'ex u multuunil kultaj,
búuquinte'ex to'oto'och nooko'ob, okolnene'ex yéetel yaayaj óolal,
tumen tu kulnaj u Kue' mina'an janalbe'en neeko'ob
mix vino u ti'al ti'ibil óolalo'ob.
14T'ane'ex le caajo', ka'ayte'ex su'ukin;
much'quinte'ex tu kulnaj Yuumtzil Ku
le u nuuquilo'ob yéetel tuláacal u cajnáalilo'ob le caajo'oba',
u ti'al ca a payalchi'ite'ex ti' Yuumtzil.
15¡Yaj yanilo'on, táan u náadzal u kiinil Yuumtzil!
¡U kiinil sajbe'entzil, tumen cu taasic xu'ulsajil
le máax yaan tuláacal u páajtalile'!
16Tu táan c icho'obe' lukesa'ab le janal ti' to'ono',
ca j dzo'oc le qui'imac óolal tu kulnaj c Kuo'.
17Le i'inajo' j quíim te tu t'o'ol le lu'umo',
le trigoo' dzo'oc u kastal le ch'iilo'obo' xano' dzo'oc u je'enelo'ob.
18¡Buca'aj óotzilil u yáacam le wacaxo'!
Chéen cunel u caxantico'ob su'uc le x wacaxo'obo';
u múuch'cabil le j tamano'obo' táan u quíimilo'ob.
19¡Ti' teech quin káat óolal Yuumtzil,
tumen le káako' dzo'oc u tóoquic u xíiwilo'ob
le x tocoy lu'um yéetel u che'ilo'ob le káaxo'!
20¡Tac u ba'alche'ilo'ob le káaxo' cu káat óolalo'ob ti' teech,
tumen dzo'oc u tijil le t'o'ol ja'obo',
le káako' cu tóoquic le su'uco'obo'!
Currently Selected:
Joel 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992