2 Timoteo 1
1
Pabloe' cu dzíib ti' Timoteo
1Teen Pabloe', u apóstolen Jésucristo, túuxta'anen tu yo'olal u yóolaj Ku, u ti'al in tze'ec le cuxtal a'ala'an u dza'abal to'ono', le cuxtal ti' yaan ti' Cristo Jesuse'. 2Quin dzíibtic teech le ju'una', in yaabilaj paal Timoteo, táan in dzíiboltic ca yanac teech u siibal utzil, u ch'a'a óotzilil yéetel u jéedzel óolal Ku le Taatao' yéetel c Yuumtzil Jésucristo.
C jajcunajil tu yo'olal Cristo
3Le quéen in ka'ajsech mantadz ti' in payalchi'ob yéetel kiin, bey xan yéetel áakabe' quin dzáic nib óolal ti' Ku, máax quin meyajtic yéetel jun p'éel ma'alob tuucul je'el bix tu beetilaco'ob xan in úuchben láako'obe'. 4Mantadz quin ka'ajsic u ja'il a wich yéetel in káat in wilech u ti'al u chu'upul in pucsi'ikal yéetel qui'imac óolal. 5Tumen cu ka'ajal teen le x ma' ca'a p'éel ichil ocsaj óolal yaan techo'. Le ocsaj óolalo' yáax anji ti' a chich Loida yéetel ti' a maama Eunice, yéetel jach in wojel yaan ti' teech xan.
6Le o'olal quin kubentic teech ca a líikes u káakil le páajtalilo'ob tu dzáa teech Kuo' le ca tin dzáa in kabo'ob ta wóokolo'. 7Tumen Kue' ma' tu dzáa to'on u pixanil sajaquil, ba'ale' u pixanil páajtalil, yaacunaj yéetel ma'alob tuucul. 8Ma' a ch'a'ic túun subtal a jaajcunaj tu yo'olal c Yuumtzil, mix a ch'a'ic subtal ti' teen, máaxen kala'anen tu yo'olal leti'. U ma'alobile', ca táacpajquech ti' le mukyajo'ob cu taalo'ob tu yo'olal le ma'alob péectzilo' áanta'anech yéetel le muuk cu dzáic Kuo'. 9Kue' tu toco'on yéetel tu t'ano'on u ti'al c bisic jun p'éel cuxtal jun páaycunta'an u ti'al leti', ma' tu yo'olal wa ba'ax utzil t betaj to'oni', ba'ale' tumen bey tu tucultajil leti', yéetel tu yo'olal le siibal utzil tu dzáa to'on ti' Cristo Jesús ma'ili' cáajac yóokolcaabe', 10ba'ale' dzo'oc u ye'esic le siibal utzil bejela'o' iquil taalic c J tocsajil Jésucristo, máax tu xu'ulsaj u páajtalil le quíimilo', yéetel tu yo'olal le ma'alob péectzilo' tu jóokesaj ti' sáasil le cuxtal ma' tu páajtal u xu'ulsa'alo'.
11Kue' tu t'anajen u ti'al ca in tze'ect le ma'alob péectzila', yéetel tu túuxtajen je'el bix jun túul apóstol u ti'al in ca'ans le máaxo'ob ma' judíobo'. 12Tu yo'olal lelo' quin mukyajtic tuláacal le ba'alo'oba'. Ba'ale' ma' táan in ch'a'ic subtal tumen tene' jach in wojel ti' máax in wocsmaj in wóol, yéetel jach in wojel leti'e' yaan páajtalil ti' u ti'al u canant tac ti' le kiino' le ba'ax in kubentmaj ti'o'.
13T'ilcuns ta tuucul le ma'alob ca'ansaj in dzaamaj techo', yéetel cuxlen ti' le ocsaj óolal yéetel le yaacunaj yaan to'on ti' Cristo Jesuso'. 14Yéetel u yáantaj le Quili'ich Pixan caja'an ti' to'ono' canant le ba'ax kubenta'an techo'.
15Je'el bix a wojelile' tuláacal le Asiailo'obo' tu xúump'atteno'ob, ichilo'obe' ti' yaan Figelo yéetel Hermógenes. 16Yuumtzil ca u ch'a'a óotzilil ti' u láaktzilo'ob Onesíforo, tumen leti'e' ya'ab u téenel tu líiksaj in wóol yéetel ma' tu ch'a'aj subtal tu yo'olal kala'aneni'. 17Tumen le ca j kuch Romae' jo'op' u caxtiquen yéetel tuláacal u yóol tac ca tu caxtajen. 18Yuumtzil ca u dzáa ti' ca u caxant ch'a'a óotzilil tu táan ti' le kiino'. Teche' ma'alob a wojelil buca'aj tu yáantilo'on Efeso.
Currently Selected:
2 Timoteo 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992