2 Pedro 1
1
Pedroe' cu dzíib ti' le ocsaj óolalo'obo'
1Teen, Simón Pedro, u palitzilen yéetel u apóstolen Jesucristo, quin dzíibtic le ju'una' ti' te'ex máaxe'ex dzo'oc u kuchul yantal te'ex jun p'éel ocsaj óolal jach jadzutz je'el bix le c ti'ala', tu yo'olal u tojil c Ku J tocsajil Jesucristo. 2Kame'ex ya'ab siibal utzil yéetel jéedzel óolal, tu yo'olal le kaj óolal yaan te'ex ti' Kuo' yéetel ti' Jesús, c Yuumtzil.
Bix unaj u cuxtal jun túul j ocsaj óol
3Kue' u dzaamaj to'on, tu yo'olal u páajtalile', tuláacal ba'ax kabéet to'on u ti'al cuxtalo' yéetel u ti'al c kultic leti', le ca tu beetaj c kaj óoltic le máax tu t'aanajo'ono' tu yo'olal u nojbe'enil yéetel u nucuch meyajo'ob. 4Tu yo'olal le ba'alo'oba' tu dzáa to'on u qui'ichquelem yéetel nojoch dzaa t'aano'ob, u ti'al ca páatac a táacpajale'ex tu yo'olalo'obe' ti' u cuxtal Ku yéetel a púudzule'ex ti' le kascunajil dzo'oc u taasico'ob way yóokolcaab le kaakas dzíibolalo'obo'. 5Tu yo'olal lela' unaj a dzáique'ex tuláacal a wóole'ex u ti'al a tzayque'ex ma'alob cuxtal ti' a wocsaj óolale'ex; na'at ti' a ma'alob cuxtale'ex; 6mu'ukan óolal ti' a na'ate'ex; chuca'an óolal ti' a mu'uka'an óolale'ex; kultajil ti' Ku ti' a chuca'an óolale'ex; 7sucu'untzil yaacunaj ti' a kultaje'ex ti' Ku; yéetel quili'ich yaacunaj ti' a sucu'untzil yaacunaje'ex.
8Tumen wa te'ex yaan te'ex le ba'alo'oba', yéetel yaan te'ex jach ya'abe', a cuxtale'exe' ma' táan u p'áatal mix ba'al u biilal yéetel x ma' ichil u kaj óolalil c Yuumtzil Jesucristo. 9Ba'ale' le máax mina'an le ba'alo'ob ti'a' bey jun túul máac ch'óope' wa cóom u paacat; dzo'oc tu'ubsic dzoca'an u p'o'obol ti' u yúuchben kebano'ob. 10Le o'olale', sucu'une'ex, il a wile'ex ca u taamcuns u mootz ti' te'ex a t'ana'anile'ex yéetel a yéeya'anile'ex tumen Kuo', tumen wa ca beetique'ex beyo' mix bikin bíin lúubuque'ex. 11Beyo' bíin je'ebec te'ex jun p'éel cóococh jool naj u ti'al a wocle'ex ti' u ajawil c Yuumtzil yéetel j tocsajil Jesucristo jun p'éel ajawil mina'an u xuul.
12Le o'olale' bin in ca'aj in ka'ajes te'ex mantadz le ba'alo'oba', quex dzo'oc a wojéeltique'exe' yéetel jeedzel a wanile'ex ti' le jaaj yaan te'ex bele'. 13Tumen toj in wilic, ca'aliquil cuxa'anene', in beetic a p'ilic a wiche'ex yéetel le tzol xiquino'oba', 14tumen c Yuumtzil Jesucristoe' dzo'oc u beetic in wojéeltique' séeba'an quin in p'at le cuxtala'. 15Ba'ale' yaan in beetic tuláacal ba'ax cu páajtale' u ti'al a ka'ajsique'ex mantadz le ba'alo'oba' cu dzo'ocol in quíimil.
Le máaxo'ob tu yilajo'ob u nojbe'enil Cristoo'
16Dzo'oc c dzáic a kaj óolte'ex u páajtalil yéetel u taalbal c Yuumtzil Jesucristoe', ma' yéetel chéen tzicbalo'ob pat jo'olta'an yéetel tuuso'obi' tumen t ilaj yéetel c ich u nojbe'enil Yuumtzil. 17T ilaj le ca j dza'ab tziiquil yéetel nojbe'enil ti' tumen Ku le Taatao', le ca j a'ala'ab ti' yéetel nojbe'enil tumen Kuo': Lela' in yaabilaj Paal, tu yo'olal máax jach qu'imac in wóol. 18To'one' t u'uyaj le t'aan jóok ti' le ca'ano' tumen ti' yano'on yéetel Yuumtzil te j quili'ich pu'uco'.
19Yaan to'on xan jun p'éel ba'al mas jeedzel yanil, u káat u ya'ale', le t'aano'ob dzíiba'an tumen le aj bóobato'obo'. Te'exe' utz ca beetique'ex wa ca wu'uyique'ex ma'alob le t'aano'oba', je'el bix jun p'éel sáasil cu sáasilcunaj ti' jun p'éel cúuchil éekjoch'e'ene', tac quéen sáasac le kiino' yéetel ca jóokoc le ja'atzcab kiin eko' u ti'al u sáasilcunt a pucsi'ikale'ex. 20Ba'ale' táanil ti' tuláacale', tuculte'ex lela': Mix jun p'éel u t'aanil le Quili'ich Dzíib cu páajtal u tzo'olol chéen tu juunal u yóol máaco', 21tumen le aj bóobato'obo' ma' j t'aanajo'ob mix jun téen chéen tu juunal u yóolo'obi'. Ma' beyi', ba'ale' máaco'ob j nu'ucta'ano'ob tumen Quili'ich Pixane'; j t'aanajo'ob tu yo'olal Ku.
Currently Selected:
2 Pedro 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992