1 Reyes 1
1
U ch'ija'anil David
1Ajaw Davide' dzo'oc ca'ach u ch'iijil, dzo'oc ca'ach u sen nojoch máactal. Quex tumen cu ma'alob te'ep'el yéetel ya'ab nooko'obe' ma' tu kíintal ca'achi'. 2Le t óolale' u aj meyajo'obe' tu ya'alajo'ob ti': Unaj u caxta'al u ti'al a tzicbe'enil jun túul x ch'úupal ma' dzoca'an u beel, u ti'al u meyajtech yéetel u canantech, u ti'al ca wenec tu yéetel a tzicbe'enil u ti'al xan ca u kíintech.
3J máan Caxantbil ti' tuláacal u lu'umil Israel jun túul x t'a'aj qui'ichpam x ch'úupal, ca j nup táanta'ab jun túul tu caajil Sunem cu kaaba'intic x Abisag, ca j bisa'ab ti' ajaw David. 4Abisague' sen t'a'aj ca'achi' cu canantic yéetel cu meyajtic ca'ach ajaw David, Ba'ale' ajaw Davide' mix jun téen yanji' ba'al u yil yéetel.
Cu ka'ayticubáa ajaw Adonías
5Ca'aliquile', Adonías u paal David yéetel x Haguit, j líik ba'atel, ca tu ya'alaj leti' bíin ajawnac. Yanchaj ti'e' u bolanilo'ob ba'atel u aj nat' tzíimino'ob, yanchaj xan cincuenta máaco'ob u ti'al canantic. 6Tuláacal u kiinilo'ob u cuxtale' mix jun téen a'ala'ab ma'il ti' tumen u taata, ti' ba'ax cu beetic, mix jun téen xan káat chi'ita'ab ti' ba'axten cu beetic le ba'ax cu beetico'. Adonías máax síij cu dzo'ocol Absalone', sen qui'ichquelem ca'achi'. 7U beetmaj ca'ach jun p'éel kax t'aan yéetel Joab u paal x Sarvia, bey xan yéetel aj kiin Abiatar, máaxo'ob áantic ca'achi'. 8Ba'ale', mix aj kiin Sadoc, mix Benaía, u paal Joiada, mix aj bóobat Natán, mix Simei, jun túul j xiib jach kub óolta'an ca'ach tumen ajaw, mix u ma'alob aj ba'atelo'ob David tu yáantajo'ob Adonías.
9Ti' le kiino'obo' Adoníase' tu nu'ucbesaj jun p'éel nojoch janal tu tzéel u suytuunil Zohelet, le yaan naadz ti' u sayabil Rogel. Tu quíimsaj tamano'ob, wacaxo'ob yéetel u poloctaquil mejen wacaxo'ob, tu páay óoltaj tuláacal u sucu'uno'ob u paalal ajaw, yéetel tuláacal u xiibilo'ob Judá le yano'ob tu meeyjul le ajawo'. 10Ba'ale' ma' tu páay óoltaj aj bóobat Natán mix Benaía, mix u aj ba'atelo'ob David, mix Salomón u sucu'un.
11Natán túune' j t'aanaj yéetel x Betsabé, u maama Salomón, ca tu ya'alaj ti': ¿Ma' wa a wojel Adoníase', u paal x Haguit, Dzo'oc u ka'ayticubáa u beetubáa ajw, cu dzo'ocole' ma' u yojeltmaj c dzuulil Davidi'? 12Co'oten tumen bíin in dzáa ti' teech jun p'éel tzol xiquin u ti'al ma' a quíimil mix u quíimil Salomón a paal. 13Xeen tu táan ajaw David ca a wa'al ti': A tzicbe'enile' u jalach t'antmaj ti' teen ca'achi', in paal Salomón bíin ajawnac cu dzo'ocol ti' a tzicbe'enil. ¿Ba'axten túun táan u beeticubáa ajawil Adonías? 14Ca'aliquil táan a t'aane' tene' quin wocol u ti'al in jéedz t'ant ba'axo'ob ca wa'alic.
15J bin túun x Betsabé u yil ajaw David tu'ux chilicbal. Ajawe' sen ch'ija'an ca'achi, x Abisag le x sunamitae' táan ca'ach u táan óoltic. 16x Betsabee' noclaj lu'um tu táan ajaw David, Ajawe' tu káat chi'itaj ti': ¿Ba'ax cu yúuchul ti' teech?
17Leti'e' tu núucaj: A tzicbe'enile' tu jalacht'aantaj ti' teen tu kaaba' Yuumtzil a Junab Ku, Salomón in waale' yaan u beetic u ajawil cu dzo'ocol ti' a tzicbe'enil, ta wa'alaj bíin culac ta jalach káanche'. 18Ba'ale' Adoníase' dzo'oc u ka'ayticubáa ajaw, a tzicbe'enile' ma' u yojeli'. 19Dzo'oc u quíimsic wacaxo'ob, mejen wacaxo'ob yéetel ya'abcach j tamano'ob, dzo'oc xan u páay óoltic u paalal a tzicbe'enil; bey xan tu páay óoltaj aj kiin Abiatar, yéetel Joab u nojochil le aj ba'atelo'obo', ba'ale' ma' tu páay óoltaj Salomón, u j meeyjul a tzicbe'enili'. 20In dzuulil, bejela'e' tuláacal Israel táan u pa'atic ca a wa'al máax bíin u beet u ajawil cu dzo'ocol ti' a tzicbe'enili'. 21Wa ma' beyo', le quéen quíimic a tzicbe'enile', Salomón in paal yéetel tene' yaan c bisa'al quíimsbil.
22Ca'aliquil leti' táan u t'aan ca'ach yéetel ajaw Davide', j kuch aj bóobat Natán, 23ca j dzaab u yojéelt ajaw. Le ca j náadz le aj bóobat tu táan ajawe', noclaj lu'um tu táan, 24ca tu káat chi'itaj ti': ¿Dzo'oc wa u ya'alic a tzicbe'enil ti' Adonías ca u beet u ajawil, cu dzo'ocol ti' a tzicbe'enili'? 25Tumen bejela'e' dzo'oc u bin, u quíims wacaxo'ob mejen wacax yéetel ya'abcach j tamano'ob, bey xan tu páay óoltaj u paalal a tzicbe'enil, u nojochilo'ob le aj ba'atelo'obo' yéetel aj kiin Abiatar. Táan u janalo'ob yéetel u yukulo'ob, táan xan u yawtico'ob ¡Xi'ic utzil ti' ajaw Adonías! 26Chéen ba'ale' ma' tu páay óolteni' mix aj kiin Sadoc, mix Benaía, u paal Joiada, mix Salomón u paal a tzicbe'enil. 27¿Dzo'oc wa u ya'alic a Tzicbe'enil ca beeta'ac le ba'ala', teche' ma' a dzaamaj u yojéelt le a palitzila', máax cun j bin j cutal ta jalach káanche' cu dzo'ocol ti' a Tzicbe'enili'?
Cu ya'alic David, Salomón bíin u jeelinte
28Ajaw Davide' tu ya'alaj ca t'aanac x Betsabé. Le ca j kuch x Betsabee' tu táan ajawe', j p'áat wa'alacbal tu táan. 29Le ajaw túuno' tu beetaj le jalach t'aana':
Quin jalacht'aantic tu kaaba' Yuumtzil, máax tu tocajen ti' tuláacal yaj óolale', 30le ba'ax ca'ach tin jalach t'antaj ti' teech tu kaaba' Yuumtzil u Ku Israele', ti' le kiina' quin dzo'ocbesic: Salomón a paale' yaan in dzáic ca culac tin wo'olal ti' in jalach káanche', yaan u beetic u ajawil quéen quíimiquen.
31Betsabee' j noclaj lu'um tu táan ajawe' ca tu ya'alaj:
¡Xi'ic utzil láaj kiin ti' in dzuulil, ajaw David!
32Cu dzo'ocole' ajaw Davide' tu ya'alaj ca t'a'anac aj kiin Sadoc, aj bóobat Natán yéetel Benaía u paal Joiada. Le ca j taalo'ob tu táan ajawe', 33leti'e' tu ya'alaj ti'ob:
Bet a láakinta'ale'ex tumen u noj meeyjulo'ob le ajawila', na'acse'ex Salomón in paal tu yóokol in x burra ca a bise'ex Gihón; 34le quéen jun páaycunta'ac u beet u ajawil Israel tumen aj kiin Sadoc yéetel aj bóobat Natane', uste'ex u baac j taman yéetel ca a wawte'ex: ¡Xi'ic utzil ti' ajaw Salomón!. 35Cu dzo'ocole' tzolaba'ex u ti'al a canantique'ex ca taalac j cutal tin jalach káanche', u ti'al ca ajawnac tin wo'olal, tumen dzo'oc in wa'alique' leti' bíin u beetubáa u nojochil Israel yéetel Judá.
36Benaía, u paal Joiadae', tu núucaj: Bey ca béeyac, bey ca u yóolt Yuumtzil, u Ku a tzicbe'enil. 37Je'el bix ti'anchajic Yuumtzil tu yéetel a tzicbe'enile' bey ca yanac tu yéetel Salomón, ca u beet u nojochtal u ajawil asab ti' u ti'al u tzicbe'enil, in dzuulil David.
38Cu dzo'ocole' aj kiin Sadoc, aj bóobat Natán, Benaía, u paal Joiada, le j cereteob yéetel le j peleteobo', tu na'acsajo'ob Salomón yóokol jun túul u x burra ajaw David, ca tu bisajo'ob Gihón. 39Te'elo' aj kiin Sadoque' tu ch'a'aj te j quili'ich najo' le baac tu'ux cu dza'abal le aceiteo' ca tu jun páaycuntaj Salomón bey ajawe'. Cu dzo'ocole' ca tu yustajo'ob u baac j taman, ca tu yawtajo'ob ¡Xi'ic utzil ti' ajaw Salomón! 40Cu dzo'ocole' tuláacalo'ob j bino'ob tu paach táan u jóopsico'ob flauta. Sen nojoch u qui'imaquil yóolo'ob, bey táan u jóokol ca'a búuj ti' le lu'um tu yo'olal u yawato'obo'.
41Adonías yéetel tuláacal u páay óoltaje', táant u dzo'ocol u janalo'ob le ca tu yu'ubajo'ob le juumo'. Le ca tu yu'ubaj Joab u jóopsajil le baaco', tu ya'alaj: ¿Ba'ax o'olal yaan ya'abcach qui'imac olal te j caajo'?
42Ca'aliquil táan u t'aane', j kuch Jonatán, u paal aj kiin Abiatar. Adoníase' ca tu ya'alaj ti': Oquen, tumen teche' jun túul nojoch máaquech, táan wal a taasic ma'alob pectzilo'obe'. 43Jonatane' tu núucaj ti' Adonías:
Ma' beyi', David c dzuulil yéetel c ajawe', dzo'oc u ya'alique' Salomóne' ajaw. 44tu ya'alaj ti' aj kiin Sadoc, ti' aj bóobat Natán je'el bix ti' Benaía, u paal Joiada, yéetel le j cereteobo' le j peleteobo', ca u láakinto'ob Salomón; leti'ob túune' tu na'acsajo'ob tu yóokol le x burra cu nat'ic ca'ach le ajawo'. 45Cu dzo'ocole' aj kiin Sadoc yéetel aj bóobat Natán dzo'oc u jun páaycunsico'ob bey ajaw tu caajil Gihón, dzo'oc xan u sutico'ob te'elo' sen qui'imac yóolo'ob. Let o'olale' ca wu'uyic u juum le caajo' yéetel le awato'ob dzo'oc a wu'uyique'exo'. 46bey xan dzo'oc u cutal Salomón tu jalach káanche', 47u nucuch meeyjulo'ob ajaw Davide' dzo'oc u bino'ob u dzíibolto'ob qui' óolal ti', yéetel ca ayikalcunsa'ac tumen Ku u ti'al ca nojochajac u ajawil Salomón. Tac ajaw David líik tu kaan u ti'al u kult Yuumtzil 48Ca tu ya'alaj: Qui'iqui' t'anta'ac Yuumtzil u Ku Israel, máax tu yóoltaj bejela'e' ca na'acac jun túul in ch'i'ibal te jalach káanche'o', yéetel ca in wilej.
49U páay óolo'ob Adonías jo'op u quiquilaanquilo'ob, cu dzo'ocole' j láaj líik tuláacalo'ob, tu jujun túulilo'ob j bino'ob tu'ux tu yóoltajo'ob. 50Tu yo'olal u sajaquil Adonías ti' Salomone' j líike' ca j bin quili'ich naj, u ti'al ta'acbessicubáa, ca tu machajubáa ti' u baaco'ob u multuunil kultaj. 51Yanji' wa máax bin u ya'al ti' Salomón:
Adoníase' sajac ti' a tzicbe'enil, dzo'oc u ta'acbesicubáa tu multuunil kultaj. Táan u káatic ti' a tzicbe'enil ca a jalach t'aant bejela'e' ma' bíin a quíimsi'.
52Tu núucaj Salomón: Wa cu bisicubáa bey jun túul utzil máaque', ma' bíin lúubuc j lu'um mix jun cu'ul u tzo'otzel u pooli'; ba'ale' wa cu yojelta'al táan u beetic wa ba'ax loobile' cu quíimil. 53Tu séeblaquile' tu túuxtaj Salomón ca lukesa'ac te tu multuunil kultaj. Cu dzo'ocole' Adonías j bine' ca j chinlaj tu táan ajaw Salomón, leti'e' tu ya'alaj ca xi'ic tu yotoch.
Currently Selected:
1 Reyes 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992