2 Pità 1

Ichaʼri

1À ya mo Sayimùn Pità, ne yaʼi wə̀d àfàʼì bə̀ yaʼ wə̀dtɔm Kristo ìwi Kristo ŋwàʼri àŋwàʼrì azo̰.

Mə ya ŋwàʼrà anìŋ inən mbə̰ mbe ne ìwa Yeso Kristo ne yaʼi ìwa Ŋwiye bə̀ yaʼ Wə̀d ne pùmnə awa fə ghi mbə bèrì ibḛfiŋ chɔm kwàʼ icheg mba bə bèrì. Məd we ghìyə̀ inug ne koʼi.

2Ŋwiye taŋ ghì ìchɔ̀mì inən bə̀ taŋ ghì mbə̀ chughi ane àbɔrɔ̀bɔd. Wì ghiyə ane anjìm icheg ne mbə̀ kyeri aməd bə̀ kyèri Yeso ìwa Anɔŋisəg.

Bəd Kristo bèrì ni chughi icheg ne Ŋwiye kə̀bi

3Ŋwiye fə chè anjìm ìwi ika nàʼ ighi ijìm ne tì koʼi ni bèrì ni chughi ane ikuchèg ne ghùmnə aməd. Wì fə nàʼ ane anjìm icheg ne tì kyeri aməd. Wì ya kàrì awa gha tì bere ati inga ighumni məd bə̀ fɔrɔ inga ìchɔ̀mì məd. 4Wì ya chè anjìm ika we nàʼ tineʼi te ne wì ya kàʼi ina. À ya tineʼi ne taŋ kà inun bə̀ taŋ bɔ̀ŋ. Wì ya ghì ane ni gha anjìm tineʼi te mbə̰ mbe tì mbə̰ yaʼ icheg Ŋwiye ane ikuchèg, si waʼ inug tibɔ̀ŋ mbe ne bəd inga isəg mbe ghə̀ʼrə̀. 5Icheg ne Ŋwiye fə ghi inug mbo̰ ina, mbə̀ kirə ika ni ya ghìyə̀ inug chɔm icheg mbə̀ fə nɔŋi ìtən ibḛfiŋ igun Ŋwiye. Icheg ne mbə̰ mbe ghìyə̀ inug chɔm, mbə̀ bə kirə ika ni taŋ kyeri inug imbə̀ʼ Ŋwiye. 6Icheg ne mbə̰ kyèri inug imbə̀ʼ Ŋwiye, mbə̀ bə kirə ika ni ya nyìmbe nyɔd. Icheg ne mbə nyìmbe nyɔd, mbə̀ bə kirə ika ni ya nyìʼè inug. Icheg ne mbə̰ mbe nyìʼè inug, mbə̀ bə kirə ika ni ya ghùmnə Ŋwiye. 7Icheg ne mbə ghùmnə Ŋwiye, mbə̀ bə kirə ika ni ya ghìyə̀ ìchɔ̀mì abə ìmbən məfi fɔrɔ ìtən njàbi. Icheg ne mbə̰ mbe ghìyə̀ ìchɔ̀mì abə ìmbən məfi fɔrɔ ìtən njàbi, mbə̀ ya bə̀ kɔ̀ŋɔ̀ wə̀d ijìm. 8Aŋa ya ikuchèg ne mbə̀ koʼi ni bèrì. Mbə̰ mə̀ ya ghìyə̀ inug mbo̰ ghò gho imbìghè, mbə̰ biri ya fàʼà inug icheg chɔm bə̀ ghìyə̀ inug chɔm nɔʼ nɔʼ. Ane, ze biri chwi gha inug mbe ne mbə̀ kyeri imbə̀ʼ ìwa Anɔŋisəg Yeso Kristo kayi ati ako. 9Wə̀d ne chəyi we ghìyə̀ inug mbo̰, tengàŋ ya icheg wə̀d ne aghə ze fḭ̀yḛ̀, ne chəyi wì ya bàrà isiŋi. Wì fə nèbì gha Ŋwiye fə sò inug tibɔ̀ŋ məd chì.

10Ane, ìmbum məfi fɔrɔ ìtum njàbi, mbə̀ kirə ika ni chughi kwàʼ məyi icheg bəd ne Ŋwiye ya kàri bə̀ chɔʼ gha mbə̀ yaʼ ìmbi bəd. Mbə̰ mə̀ chùghi ane, nji chəyi mbə̀ biri nɔʼ ghi anug tibɔ̀ŋ. 11Ane, Ŋwiye biri nàʼ ika ijìm inən ni nyi inga anug ìfɔ̀n ighə̀m imɔʼ àzi ìwa Anɔŋisəg Yeso Kristo ne pùmnə awa.

12Ka mbə̀ jiʼì kyèri inug mbo̰ bə̀ təm kà inga tesiʼ, mə biri kiri ya wènde inug mbo̰ inən mà nyumə̀ ijìm. 13Mə kɔ̀ndi gha, à ya anug chɔm gha mə wendi inug mbo̰ inən ne mə̀ kiri biri izɔm. 14Mə kyèri gha, mə biri zàmbì sàŋì isəg icheg ne Anɔŋisəg Yeso Kristo fə ghi mə kyeri. 15Mə biri kirə ika ni ghì gha anyumə̀ ne mə̀ fə sàŋi isəg, mbə̰ biri ya wènde inug mbo̰ mà nyumə̀ ijìm.

Pità tì bədtɔm ndəŋ bàd ìzḛzḛ njandi njandi ìwi Kristo

16Chəyi tì ya niŋi tìmùghì ako te ne bəd mbe ne gha mbɔb bèrì iwe mbe mə̀tə̀, ni ghàm inən anyumə̀ ne tì ya gha inug imbə̀ʼ ika Anɔŋisəg Yeso Kristo fɔrɔ inug imbə̀ʼ nyumə̀ we ne wì biri ywiri yeʼe. Mba mbo̰ ya bəd ne ya bàri ati anyumə̀ ne Ŋwiye ya chà ìzḛzḛ njandi njandi igun məd. 17Ŋwiye ya nàʼ ighumni fɔrɔ ìzḛzḛ njandi njandi ibo anyumə̀ ne gì Ŋwiye ne mbə̰ mbe nàʼà ighumni kyen ibo ya gha gha, “Aŋa ya ìmə Ŋwan ne mə̀ taŋ kɔ̀ŋ ne ghìyə̀ mə gyende.”#1:17 Mat 17:5; Mag 9:7; Lug 9:35 18Anyumə̀ ne tì ya yaʼi tì məd ikaŋ iwum Ŋwiye, tì ya zug gì ze.

19Ane, tì fə kyeri gha ìngam gho̰ ne bədkə̀n Ŋwiye ya ghàmi imbə̀ʼ aməd ya tesiʼ. Mbə̀ taŋ zì atog ane ìngam gho̰ imbə̀ʼ icheg ne wi ya anam ne zùʼə inga isəg afub. Mbə̀ ya ghìyə̀ inug mbe ne ìngam gho̰ we ghà inən ghò pè isusu we ne Kristo biri zuʼ inən inga fìŋ icheg fitəm-məg fe ne zùʼə a achəg ituʼ. 20Anug mbègtog ne mbə̀ koʼi ni kyeri ya gha, chəyi wə̀d mɔ̀ʼɔ ne tì wì toʼrì anug ze ne bədkə̀n Ŋwiye ya ŋwàʼri inga Àŋwàʼrì Ŋwiye ane ìwi ika. 21Chəyi wə̀d mɔ̀ʼɔ ne tì wì toʼrì imbə̀ʼ icheg ne chəyi ikən Ŋwiye mɔ̀ʼɔ ya yeʼe imbə̀ʼ icheg ne wə̀d-aku ya kə̀bi. À ya Azwighi Ŋwiye ya ghì gha bəd gha ikən Ŋwiye.

Currently Selected:

2 Pità 1: MBTP

Highlight

Copy

Compare