1 Pità 1
1
Ichaʼri
1À ya mo Pità, wə̀dtɔm Yeso Kristo ŋwàʼri àŋwàʼrì azo̰.
Mə ŋwàʼrì anìŋ abə bəd mbe ne Ŋwiye chɔ̀ʼi, ne yaʼi mə̀Ju mbe ne sàka ghò inga Pontùs, tì Gàlesìyà, tì Kàpàdosìyà, tì Esìyà fɔrɔ Bìtinìyà. 2Ŋwiye ne yaʼi Mbaʼ ya chɔʼ awən gha mbə̀ yaʼ ìmbi bəd kwàʼ icheg ne wì ya fə chuʼri nɔ̀ŋì. Azwighi Ŋwiye fə sò awən ane anəm Yeso ghì mbə zen bə̀ ghì gha mbə̀ se zùgrə Yeso Kristo.
Ŋwiye taŋ ghì ìchɔ̀mì inən bə̀ taŋ ghì mbə̀ chughi ane àbɔrɔ̀bɔd.
Ikɔndi imbə̀ʼ nyùmə̀ we ne yèʼe
3Tì nàʼ ighumni abə Ŋwiye. Məd ya Mbaʼ abə ìwa Anɔŋisəg Yeso Kristo. Wì taŋ bèrì àsɔ̀mnəfiŋ igun ina, ghì gha tì jəg ìtḛ̀ feg icheg ne wì ghi Yeso Kristo zwème ane iwu. Anug azo̰ ghì gha tì nɔŋɔ ikɔndi ghɔ̀m inug mbe ne Ŋwiye kàʼi ina. 4Anug azo̰ fə bə̀ ghì gha tì jəg ighi mbe ne wì nɔŋi ikaŋ àbɔ̀ŋɔ abə ìmbi bəd. Ŋwiye fə nɔ̀ŋì ighi mbe ikaŋ àbɔ̀ŋɔ asiŋi ne chəyi mbi biri nɔʼ bɔb kə̀ bə kə̀ kɔ̀pɔ. 5Icheg ne mbə̀ nɔŋi ìwən ibḛfiŋ igun Kristo, Ŋwiye fə chì awən inga ngəʼ ane ìwi ika. Ane aneg ìnwḭ, Ŋwiye biri ghì mbə pum, wə̀d ijìm bad. 6Ane, mbə̀ ya taŋ gyènde imbə̀ʼ inug mbo̰ ne Ŋwiye fə ghi, ka bəd mbe kiri kwaʼra awən, mbə̰ bə̀ kiri zə̰ ngəʼ ane iki nyumə̀. 7Inug mbo̰ ijìm biri dù ni kwàʼrì awən ni chwi gha ìwən ibḛfiŋ təm kà. Ka bèyi gol ne tì mbi chìkì, mbi ya bə̀ tɔ̰̀ inga iywid ka ka ni ghì gha wì taŋ bɔ̀ŋ. Ane, mbi biri zweʼri ìwən ibḛfiŋ ne ya aghi àka inun chè gol. Ibḛfiŋ we mə̀ təm kà, nji Ŋwiye biri ghì mbə bèrì ìzḛzḛ fɔrɔ ighumni anyumə̀ ne Yeso Kristo biri ywiri yeʼe. 8Mbə̰ mbe kɔ̀ŋɔ̀ aməd ka chəyi mbə̀ kiri bari aməd. Ka chəyi mbə̰ mbe bàrà aməd; mbə̰ nɔ̀ŋì ibḛfiŋ igun məd, bə̀ se taŋ gyènde ane ikuchèg ne chəyi tì wə̀d gha. 9Icheg ne mbə̀ fə nɔŋi ibḛfiŋ igun məd, Ŋwiye biri pumni awən.
10Bədkə̀n Ŋwiye ya taŋ kə̀b ni kyeri inug imbə̀ʼ icheg ni pum. Mbi ya taŋ nwèndi inug imbə̀ʼ ìchɔ̀mì gho̰ ne Ŋwiye kàʼi nɔ̀ŋì inən. Mbi ya taŋ nwèndi inug imbə̀ʼ ìchɔ̀mì gho̰, si ya gha, chəyi ìmbɔb itog ya zḛ imbə̀ʼ inug mbe. 11Mbi ya bə̀ taŋ nwèndi inug mbe ne Azwighi Kristo ne ya yaʼi inga inɔb ya gha imbə̀ʼ Yeso Kristo. Azwighi Kristo ya ghà inug imbə̀ʼ icheg ne Kristo beri ni zən ngəʼ si bèrì ighumni kyen anjìm. Mbi ya bə̀ taŋ nwèndi wə̀d we ne Azwighi Ŋwiye yaya ghà inug mbo̰ imbə̀ʼ aməd fɔrɔ nyùmə̀ we ne inug mbo̰ biri dù. 12Ŋwiye ya chwi abə bədkə̀n məd gha chəyi àzɔb àfàʼì ya yaʼi ni wètì awɔb. Mbɔb yaya fàʼà yaʼ ni wètì awən. Mbɔb yaya ghà inug mbe ne mbə̰ ya fə zughi abə bəd mbe ne yaya chètè ikən chɔm. À ya ikən chɔm we ne Azwighi Ŋwiye ze ne wì ya chà tì ikaŋ àbɔ̀ŋɔ, ze ya naʼi ika inɔb ni ghà. Anug azo̰ yaya kwàʼ anug kyen ne fɔrɔ mbè angirə̀ yaya kə̀bə̀ ni kyeri.
Tì chughi inga ìzḛzḛ
13Mbə̀ chuʼri ìtən fìŋ ni ghì inug mbe ne Ŋwiye we kə̀bə̀. Mbə̀ ya nyìmbe nyɔd. Mbə̀ ya nɔ̀ŋɔ̀ ikɔndi məyi ni ghɔ̀m ìchɔ̀mì we ne Ŋwiye biri ghì anyumə̀ ne Yeso Kristo ywirì yèʼe. 14Icheg ne mbə̀ si yaʼ bɔn ne zùgrə Ŋwiye, imbə̀ʼ mbə̰ ywiri nyimi awən inug tibɔ̀ŋ mbe ne ìtən nyàmnyɔd yaya kɔ̀ŋɔ̀ gha mbə̀ fàʼà anyumə̀ we ne chəyi mbə̀ ya kiri kyeri aməd. 15Mbə̀ se ghìyə̀ inug ijìm inga ìzḛzḛ icheg ne Ŋwiye we ne ghi mbə̰ si bɔn məd bə yaʼ inga ìzḛzḛ. 16A ze inga Àŋwàʼrì Ŋwiye gha, “Mbə̀ chughi inga ìzḛzḛ imbə̀ʼ icheg ne mo ya bə̀ inga ìzḛzḛ.”
17Mbə̀ wendi gha Mbaʼ we ne mbə̰ mbe kàrà anyumə̀ ne mbə̰ mbe chàʼrà Ŋwiye ya wə̀d ne chəyi we ghìyə̀ ighə anyumə̀ ne məd we sàʼa bəd ane ìmbɔb ìfàʼì. Ane, mbə̰ ne yaʼi bəd tìsɔ̀ʼ igun isəg aŋa, mbə̀ se ghùmnə aməd ane ìwən ikuchèg ane nyumə̀ we ne mbə̀ kiri beri ni chughi igun isəg. 18Mbə̰ kyèri àzən aghi gha chəyi Ŋwiye ya zeri awən chì inga ikuchèg tibɔ̀ŋ we ne ìmbən mə̀mbaʼ aneg ya sàŋì inən ane ighi ako icheg ikab gol, kə̀ ikab sibà. 19Ŋwiye ya zon awən ane anəm àka inun ze ne Yeso Kristo ya chəmni. Yeso Kristo ya icheg ŋwan njə̀g ne chəyi gəʼ angu. 20Ŋwiye ya fə chɔʼ Yeso Kristo bɔŋ se tànga isəg, si ya gha, à ya məyi inga ineg mbo̰ ne si nwìyḛ̀ ne Ŋwiye ghi gha bəd kyeri aməd. Wì ya ghì ane ni wètì awən. 21Mbə̰ fə chè anjìm məd bḛ Ŋwiye we ne ya zwemni aməd bə̀ nàʼ ighumni ibo. Ane, mbə̰ nɔ̀ŋì ibḛfiŋ bə̀ nɔ̀ŋì ikɔndi nì ghɔ̀m məyi igun Ŋwiye.
22Mbə̰ fə ghì ìtən fìŋ zen icheg ne mbə̰ mbe ghìyə̀ inug mbe ne yaʼi mbe tesiʼ. Mbə̀ taŋ kɔ̀ŋ ìmbən məfi fɔrɔ ìtən njàbi kwàʼ icheg chɔm. Mbə̀ ya kɔ̀ŋɔ̀ wə̀d imɔʼ imɔʼ kwàʼ inga ìtən fìŋ. 23Ŋwiye we ne yaʼi izɔm ane ighə̀m imɔʼ fə ywìrì gwi awən anjìm ìngam məd we ne yaʼi izɔm bə̀ yaʼ ane ighə̀m imɔʼ. Chəyi ìngam gho̰ nɔʼi abə ìmbən mə̀mbaʼ ne tì mbi ku. À ya ìngam ne nɔʼi abə Ŋwiye ne chəyi tì wì ku. 24A ze inga Àŋwàʼrì Ŋwiye gha,
“Bəd məjìm ya icheg agyen.
Ìwɔb ighumni ya icheg ngwèn mbè tewàrà.
Agyen mə̀ nə̀ŋə̀, mbe tewàrà bə̀ nə̀ŋə̀ kwè.
25Si ya gha, ìngam ìwi Anɔŋisəg ya tə̀mə ane ighə̀m imɔʼ.”
Ìngam we ya ikən chɔm we ne mbi ya gha inən.
Currently Selected:
1 Pità 1: MBTP
Highlight
Copy
Compare
Share
Want to have your highlights saved across all your devices? Sign up or sign in
© 2019 CABTAL
