1 Jɔn 2

Kristo ya wə̀d ne wètè awa

1Ìmbum bɔn ne mə̀ taŋ kɔ̀ŋ, mə ŋwàʼrì inug mbo̰ inən anìŋ ni ghì gha imbə̀ʼ mbə̰ si nɔ̀ʼ ghì anug tibɔ̀ŋ. Si ya gha, wə̀d mɔ̀ʼɔ mə̀ chè ghì anug tibɔ̀ŋ, tè bèrì wə̀d ne bòʼo ibo abə Mbaʼ atog ina imbə̀ʼ ìmba inug tibɔ̀ŋ. Məd ya Yeso Kristo, wə̀d ne təmi kòʼ. 2Məd ya aghi àfàtì ze ne Ŋwiye che anjìm məd waʼ ìmba inug tibɔ̀ŋ. Chəyi Ŋwiye waʼi məyi ìmba inug tibɔ̀ŋ. Wì bə̀ waʼ inug tibɔ̀ŋ abə wə̀d ijìm igun isəg. 3Tì mə ya zùgrə tikə Ŋwiye, nji ze biri chwi gha tè kyèri aməd. 4Wə̀d ne gha zìye kyeri Ŋwiye ne chəyi məd we zùgrə tikə Ŋwiye, tengàŋ ya wə̀d inug ako. Chəyi məd we ghìyə̀ inug icheg wə̀d ne kyeri tesiʼ. 5Wə̀d ne zùgrə Ìngam Ŋwiye ya wə̀d ne kɔ̀ŋi Ŋwiye mànì. Anìŋ ya icheg ne tè kyère gha tì we ane ifɔti tì Ŋwiye. 6Wə̀d mɔ̀ʼɔ mə̀ gha zìye we ane anug amɔʼ tì Ŋwiye, məd bèrì ni yèn igun ibɔʼì ighog ìmbi Yeso Kristo.

Ikə feg

7Ìmbum mə̀sə̀ʼ ne mə̀ taŋ kɔ̀ŋ, ikə gho̰ ne mə ŋwàʼrà inən anìŋ ya kayi ikə feg. À ya ikə anun ne mbi ya fə chwiti inən anyumə̀ ne mbə̀ ya bḛ Kristo. À ya ikə anun we ne mbə̀ ya fə zughi. 8Tesiʼ ya gha, ikə gho̰ ne mə ŋwàʼrà inən anìŋ ya kwàʼ ìwi feg. Bəd mbe bàrà tesiʼ we ne yaʼi inga ikə gho̰ ane icheg ne Yeso Kristo yaya ghìyə̀ inug fɔrɔ ane icheg ne mbə̰ mbe bə̀ ghìyə̀ inug. À ya ane imbə̀ʼ icheg ne inug afub mbe se chè mèghè, ìzḛzḛ tesiʼ we fə se zùʼə.

9Wə̀d ne gha zìye fə se yi inga ìzḛzḛ bə̀ kiri ya bà̰ ìwi ifi, à ya wə̀d ne kiri biri inga isəg afub pè amad anìŋ. 10Wə̀d ne kɔ̀ŋɔ̀ ìwi ifi ya wə̀d ne chùghə inga ìzḛzḛ. Ane, chəyi aghi mɔ̀ʼɔ inga məd ne biri ghì gha wì gughə anug. 11Àsi wə̀d ne bà̰ ìwi ifi ya wə̀d ne kiri yaʼi inga afub. Məd we kiri ghiyə inug afub. Chəyi wì kyèri asiŋi ne we ghò angu imbə̀ʼ icheg ne afub ze fə fə̀ghì aghə ibo.

12Ìmbum bɔn ne mə̀ taŋ kɔ̀ŋ, mə̀ ya ŋwàʼrà anìŋ inən imbə̀ʼ icheg ne Ŋwiye fə waʼ ìmbən inug tibɔ̀ŋ anjìm Kristo.

13Mə ya ŋwàʼrà anìŋ inən, mbə̰ mə̀mbaʼ imbə̀ʼ icheg ne mbə fə kyeri aməd we ne ya bi yaʼ bɔŋ Ŋwiye ya se tànga isəg.

Mə ya ŋwàʼrà anìŋ inən, mbə̰ ngwàʼ bɔd imbə̀ʼ icheg ne mbə fə màʼ chè Wə̀d Tibɔ̀ŋ we.

14Mə ya ŋwàʼrà anìŋ inən, ìmbum bɔn ne mə̀ taŋ kɔ̀ŋ imbə̀ʼ icheg ne mbə fə kyeri Mbaʼ.

Mə ya ŋwàʼrà anìŋ inən, mbə̰ mə̀mbaʼ imbə̀ʼ icheg ne mbə fə kyeri aməd we ne ya bi yaʼ bɔŋ Ŋwiye ya se tànga isəg.

Mə ya ŋwàʼrà anìŋ inən, mbə̰ ngwàʼ bɔd imbə̀ʼ icheg ne mbə bèrì ika. Ìngam Ŋwiye we bə̀ fàʼà inga inən. Mbə fə bə̀ màʼ chè Wə̀d tibɔ̀ŋ.

Anug ni kɔ̀ŋ isəg

15Imbə̀ʼ mbə̰ kɔ̀ŋɔ awən isəg kə̀ inug mbe ne yaʼi inga isəg. Wə̀d mɔ̀ʼɔ mə̀ kɔ̀ŋ isəg, ane ya gha, chəyi tengàŋ kɔ̀ŋi Mbaʼ. 16Aton ya gha, inug mbe ne yaʼi inga isəg ijìm: anug ni ghì inug tibɔ̀ŋ mbe ne nyàmnyɔd ze kə̀bə̀, anug ni nḛ̀ ighi ghə̀ʼrì, tì anug ne bəd mbe kɔ̀mɔ̀ igo imbə̀ʼ ìmbɔb àfàʼì. Inug mbo̰ ijìm nɔ̀ʼ abə isəg kayi abə Mbaʼ. 17Isəg ijìm fɔrɔ ighi ijìm mbe ne bəd inga isəg kɔŋi ya chè yi che. Àsi wə̀d we ne fàʼà yaʼ anug ne Ŋwiye kə̀bi, tengàŋ biri jəg ìtḛ̀ ighə̀m imɔʼ.

Jɔn pàti bəd imbə̀ʼ Wə̀d ìpàb Kristo

18Ìmbum bɔn ne mə̀ taŋ kɔ̀ŋ, nyùmə̀ we ne isəg gho̰ biri nwḭ̀yḛ̀ fə tinde. Mbə̰ ya fə zug gha Wə̀d ìpàb Kristo we yèʼe. Amad anìŋ, bəd ìpàb Kristo nɔʼ nɔʼ fə yeʼe. Àzo̰ fə ghì tì kyèri gha nyùmə̀ we ne isəg gho̰ biri nwḭ̀yḛ̀ fə tinde. 19Bəd ìpàb mbo̰ ya yaʼ abɔ̀ʼ ina. Si ya gha, chəyi mbɔb ya yaʼi ane ifɔti tì Kristo icheg ina. Àkə aghi ne mbɔb ya yaʼi ane ifɔti tì Kristo icheg ina, nji chəyi mbɔb ya du. Icheg ne mbɔb du, ze chwi gha chəyi mbɔb ya yaʼi ìmba bəd.

20Àsi awən, Wə̀d Ìzḛzḛ fə zɔʼ awən icheg ne wì nàʼi Azwighi Ŋwiye inən, mbə̰ məjìm bə̀ kyèri tesiʼ. 21Kayi mə ŋwàʼrà inən imbə̀ʼ icheg ne chəyi mbə̀ kyeri tesiʼ. Mə ya ŋwàʼrà imbə̀ʼ icheg ne mbə̀ kyere tesiʼ fɔrɔ imbə̀ʼ icheg ne mbə̀ kyeri gha chəyi anug ako yaʼi inga tesiʼ. 22Wə̀d inug ako kə we? À ya wə̀d we ne to̰ yi gha Yeso kayi Wə̀d we ne Ŋwiye zɔ̀ʼi. Wì ya to̰ yi Mbaʼ bə̀ to̰ yi Ŋwan. Iku wə̀d we ya Wə̀d ìpàb Kristo. 23Wə̀d we ne to̰ yi Ŋwan, fə bə̀ ton yi Mbaʼ. Wə̀d we ne bḛ Ŋwan, fə bə̀ bḛ Mbaʼ.

24Àsi awən, inug mbe ne mbə̀ ya zughi anyumə̀ ne mbə̀ ya bḛ Kristo, mbə̀ kirə ika ni nɔ̀ŋì inən inga fìŋ. Mbə̰ mə̀ nɔ̀ŋì inug mbe inən inga fìŋ, mbə biri yaʼ ane ifɔti tì Ŋwan fɔrɔ tì Mbaʼ. 25Anug ze ne Ŋwan ya kàʼi ni nàʼ ina ya ìtḛ̀ ighə̀m imɔʼ.

26Mə ya ŋwàʼrà inug mbo̰ inən anìŋ imbə̀ʼ bəd mbe ne kə̀bə̀ ni fèbrì awən. 27Àsi awən, Azwighi Ŋwiye ze ne Ŋwiye ya nàʼi inən kiri biri inga inən. Chəyi mbə̀ ywirì kòʼ ni gha wə̀d mɔ̀ʼɔ chwiti inug inən. Ane, Azwighi məd ze chwìte inug ijìm inən. Inug mbe ne Azwighi Ŋwiye ze chwìte ya tesiʼ. Ane, mbə̀ chughi ane ifɔti tì Kristo.

28Ìmbum bɔn ne mə̀ taŋ kɔ̀ŋ, anug ne mə ghà inən amad anìŋ ya gha, mbə̀ che imbìghè ni chughi ane ifɔti tì Kristo. Anyumə̀ ne məd ywirì yèʼe, chəyi tì biri bɔ. Chəyi tì biri bə bèrì tìnìrètog ni təm ibo imbìghè. 29Mbə̰ mə̀ kyèri gha məd ya wə̀d we ne təmi kòʼ, mbə biri bə kyeri gha wə̀d ne ghìyə̀ inug ne koʼi ya ŋwan Məd.

Currently Selected:

1 Jɔn 2: MBTP

Highlight

Copy

Compare