Ròmànì 7

Hwàtò hwa ama Krirztò hwa rza enje ò rze ya e mbenda hvɛ

1Wònyàmòwe kòkò, e hwèlì ndi hwatò ema e rzɔ̀ŋgìtɛ̀nɛ̀yi e mbenda. È rza hwi nanù ema e mbenda e kànèyà ndi mòtò e hvònda ema a hwèlì ò lòŋgɛ e? 2Inyɛ̀ i wòwe èmɛ̀nɛ̀nì ò lìhwa. Mòlanà a hwàahwì tɛ mùnyanà, e mbenda e òhwa nanù ema a àŋgàmɛ̀nɛ̀yi ndi lì hwɛ na mòjòmɛ̀ mò eni na òma mò hwèlì ò lòŋgɛ. Ndi mòjòmɛ̀ mò eni mò ŋwelì tɛ, e mbenda ya lìhwa e rza mò kaka hvɛ ò lìŋgi lìhwa. 3O èŋgànɛ̀lɛ̀ rzɔ, a lìyayi tɛ na òhvɛhvɛ mùnyanà ema mòjòmɛ̀ mò eni mò hwèlì lòŋgɛ nanù òma a hwèlì ndi mòlanà ema a gbèyi mòrzònje mò lìhwa. Ndi mòjòmɛ̀ mò eni mò ŋwelì tɛ, nanù òma a hwɛni wònja ò wòrzò wò e mbenda ya lìhwa e hwèlì tɛ nanù ema a hwàahwì hvɛ. 4Wònyamòwè kòkò, nanù ndi e hwèlì na inyɔ. È mbenda e rza ò kànèyà hvɛ èhwanja na òma Yerzù à mà ŋwe inyɔ hvɛ e ma ŋwa. O nàŋgɛ nanù, e hwèlì ndi hwatò hwa òhvɛhvɛ mòtò, Yerzù ema Lohwɛ̀ a hvùmùlɛ̀yi aŋga nanù i gbèeyà Lohwɛ̀ gbamù. 5Èhwanja e hvònda ema ɛ̀ɛ̀mɛ̀ ya arzu ya e mòtò wa hwènàmà e ma hwɛ lì jò kànèyà, e mbenda e ma hwɛ lì jò kɔ̀mɛ̀lɛ̀ ò màkèkìrzɛ̀nɛ̀ ma hweyàrzèlì hwe e nyàmà nyò. Ène e ma hwɛ ò lì jò gbeyà nanù ema i gbeye hweyà hwe wòhwe ema hwe jànà e kpelì. 6O nàŋgɛ nanù, irzɔ i ma anjiya ò tenì ya eŋge mbenda, èhwanja i ma ŋwa. O èŋgànɛ̀lɛ̀ rzɔ e mbenda ema e ma hwɛ lì jò kànèyà nàa hwàkòmì e rza jò kànèyà hvɛ. Ène e ma jò gbeyà ema ò nàŋgɛ nanù i nɔŋgɔ ndi e njiya hvènya mɛnɛ ò lì gbèeyà Lohwɛ̀. I mò gbèeyà ndi na òma èlìŋgɛ̀ ya ama Lohwɛ̀ e jò òhweyà rzeketɛ ò lì nɔŋgɔ e mbòlòwa mbenda ema e tìlahwì.

È mbenda yà ama Lohwɛ̀ yɔ̀ndi è jò uŋmɛ̀lɛ̀ wòhwe wò arzu

7Mamɛ rzɔ irzɔ i hwɛni ò lì òhwa nàŋgɛ e? Nànù òma jò òhwe ndi nanù ema è mbenda è hwèlì wòhwe e? Jàyɛ̀, i rza tànɛ ò lì òhwa nanù. È rzi hwɛ tɛ è mbenda, ò mà nà rza hwi mamɛ ema wòhwe wò hwèlì. È mbenda è rza òhwe tɛ nanù ema, mòtò à rzi hwɛnɛ nyɔ̀ŋgi nà yòma ya mòtò, òma nà rzi hwiye nanù ema ò lì hwɛnɛ nyɔ̀ŋgi yà lì òkeyà yòma yà mòtò, è hwèlì ndi eyà yà wòhwe. 8Ndi eŋge mbenda è mà hwèmìrzɛ̀ màlùtèyà mà ami mà wòhwe, rzìi è nò gbeyà ema nà wòteyà lì hwɛnɛ è nyɔ̀ŋgi yà nyàyi nà nyàyi jà hwema hwe hwatò. Ò rza enje tɛ tɔ̀ mbenda, nanù òma wòhwe wò rza enje tɔ̀. 9O ma hwɛ hvònda ema nà mà hwɛ lòŋgɛ na rzi hwiye e mbenda. Ndi e hvònda ema nà mà hwiye e mbenda, ilema ja ami ja lì gbeyà wòhwe i ma hwema ò èŋgànɛ̀lɛ̀ nà mà ŋwa. 10Nà ma ayembɛ nanù ema, e mbenda ema Lohwɛ̀ à mà ŋgbe ema e ma kanɛ̀ lì jànà lòŋgɛ, eŋge mbenda yɔ ndi e ma nò òŋwa. 11Wòhwe wò mà luwa e njiya ya eni ema e akeyà ò mburza e mbenda, wò ma nò ɔnjɔ rzìi na gbeyà wòhwe. O èŋgànɛ̀lɛ̀ rzɔ wòhwe ndi wò nò òŋwi.

12O eŋgànɛ̀lɛ̀ rzɔ irzɔ i ma ɛnɛ nanù ema e mbenda yɔ yiti e hwèlì wòtani, ndèŋgànɛlɛ mamɛ ema e mbenda e òhwa e hwèlì wòtani, e hvòmɛ̀nɛ̀yi ndèŋgànɛlɛ e lɔ̀wu. 13Èŋge e uŋmɛ̀lɛ̀ rzɔ ndi nanù ema màmɛ ema e hwèlì gbamù e ma nò jàneyà ndi e kpelì e? Jàyɛ̀ rzeketɛ nanù. Rzeketɛ e mbenda ndi e nò janelì e kpelì, e hwèlì ndi ema wòhwe ndi wò akelì ò mburza ya e mbenda ema e lɔ̀wu, ò lì nò jàneyà e kpelì. Ène eyà e ma gbèyɛ̀nɛ ndi nanù aŋga nanù hwatò hwa ɛnɛ na òma wòhwe wò hwèlì. O èŋgànɛ̀lɛ̀ rzɔ e mbenda ya ama Lohwɛ̀ e ma gbeyà wòhwe wò ma uŋmɛ̀lɛ̀ e ŋginyà ya eni rzayi-rzayi.

È njuma ema e hwèlì ò tenì ya arzu

14I hwi nanù ema e mbenda ema jò òhwa nanù e hwèlì ndi eyà ya hwèlìŋgɛ̀ ndi imba nà hwèlì ndi e mòtò wa hwènàmà ema na àhwirzɛ̀hwɛ̀ nàa mòkòmì ò wòhwe. 15Nà rza rzɔ̀ŋgìtɛ̀nɛ̀ ɛ̀ɛ̀mɛ̀ ya ami, èhwanja na rza gbeyà mamɛ ema na lìŋgàni ò lì gbeyà. Hweya ema na kɔwu hweyɔ ndi na gbeyà. 16Nàŋgɛ ema na gbeyà hweyà ema na rzà arza lì gbeyà, e uŋmɛ̀lɛ̀ nanù ema, nà mà emeyà nanù ema e mbenda e lɔ̀wu. 17Nà òma e hwèlì nanù ò jɔ̀kɛ̀ rzèketɛ imba ndi na gbeyà nanù, wòhwe ema wò hwèlì ò tenì ya ami wɔ̀ ndi wò nò kɔ̀mɛ̀lɛ̀ ò lì gbeyà nanù. 18Imba na hwi nanù ema ò rza ènje tɔ̀ eyà yɔ̀kɔ ya gbamù ò tenì ya ami. Ŋmèma mò e mòtò wa hwènàmà mòŋgò ema na hwɛni. Tɔ̀ nɛ na hwɛni ŋmèma mò lì gbeyà eyà ya gbamù ndi na rza tanɛ lì e gbeyà. 19Imba rzɔ nà rza gbeyà gbààmù ema na àrza lì gbeyà ndi eyà ya wòhwe ema na rzà lìŋgànɛ lì gbeyà yɔ ndi na gbeyà. 20Nà gbèyi rzɔ tɛ mamɛ ema na rza lìŋgànɛ lì gbeyà rzeketɛ imba ndi nà e gbeyà ndi wòhwe ema wò lìya ò tenì yà ami wɔ̀ ndi wò nò kɔ̀mɛ̀lɛ̀ ò lì e gbeyà.

21O èŋgànɛ̀lɛ̀ rzɔ, nà mà ayembɛ nanù ema ò hwèlì mbenda ema e nò kànèyà. Tɔ̀ ima hvònda ema na arza lì gbeyà eyà ya gbamù, wòhwe ndi wò akɛlɛ lì jà ò ŋmèma mò ami. 22O tenì ya ŋmèma mò ami, e mbenda ya ama Lohwɛ̀ yɔ ndi imba na lìŋgàni lì nɔŋgɔ ihvònda ja arzɛ. 23Ndi na ɛnɛ ehvɛhvɛ mbenda ema e kànèyà e nyò ya ami ya mòtò wa hwènàmà. Èŋge mbenda e anana e mbenda ema ŋmèma mò ami mò lìŋgàni, eŋge mbenda e ma nò nyàmà ndèŋgàna e ma nò gbèeyà ndi ò lì hwɛ e mòkòme wa wòhwe. Ndèŋgana wòŋgò wòhwe wɔ̀ ndi wò kànèyà e nyò ya ami ya e mòtò wa hwènàmà. 24Nà ma timba ndi yòma chachukɛ̀ ya mòtò! Njɛnɛ a nò kɔ̀tɔ̀ ò màà mà ene nyàmà nyò ema e nò jàneyà e kpelì e? 25Nà èki Lohwɛ̀. A nò rzùŋgi lòŋgɛ la ami lì akeyà na Ŋmanà wa eni Yerzù Krirztò e Rzàŋgò ya arzu. O èŋgànɛ̀lɛ̀ rzɔ imba mbiti na hwèlì hwèhvàrzù hwehwakɛ, ŋmèma mò ami mò nò òhweyà ò lì òŋgama e mbenda ya ama Lohwɛ̀ ndi e nyò ya ami ya mòtò wa hwènàmà e òŋgama ndi wòhwe ema wò hwèlì ò tenì ya ami.

Currently Selected:

Ròmànì 7: bri

Highlight

Copy

Compare