Hwègbèèlì 28

Hwa Pàwolò hwà mà lìya ò Malta

1Nà òma i ma ùke gbamù ò rzàawà, aŋga ndi ja a rzɔ̀ŋgìtɛ̀nɛ̀ nanù ema èŋge èki ema i ma hwɛ ema e ma tòŋgahwa na malìhwa e hwɛ̀lɛ̀hwɛ̀ ndi Malta. 2Hwatò hwa èŋge èki ema i ma uŋmànɛlɛ hwà mà jò òŋgòwànà. Yùulùlì e ma inyàmɛnɛ rzìi e mbuwà yɔhvɛ e ma wòteya lì yɔ̀ɔ ò èŋgànɛ̀lɛ̀ hwà mà jò kòteya mùùnya ò rzàawà ya ŋmànja nanù ema ja atòwɛ rzìi hwa jò kàrzɛ. 3Pàwolò à mà rzàŋga hwàànà mbɛtɛ wa hweyòlì a hwa kaka lòmba. Nà òma mɔ̀ à mà hwɛ lì ika iŋgi mbɛtɛ ò mùnya, rzìi hvèyi e wurza ò tenì ya lìŋgi lòmba la mbɛtɛ ja hweyòlì ema mùùnya mò ma hvaye, e kòka lìya la ama Pàwolò rzìi e kakùmɛ̀nɛ̀ aŋga. 4Hwàŋga hwatò hwa èŋge èki hwà mà ene na òma wòŋgò gbahwà wò ma kakùmɛ̀nɛ̀ Pàwolò ò lìya rzìi hwa a òhwalɛnɛ wɔ̀ na wɔ̀ nanù ema, “Onò mòtò a hwèlì ndi mò òŋwelì wa hwatò. Mɔ̀ à mà arza lì ŋwa ò tenì ya ŋmànja, ndi tɔ̀ nanù e mbàkò ya ama Lohwɛ̀ e ma mò lɛmbɛ.” 5Ndi Pàwolò à mà hvàkumɛlɛ lìya lì eni ò ŋmanyu ya mùnya rzìi wòŋgò gbahwà wò unda ò tenì ya mùnya e rzìi hwɛ mɔ̀ lì ɔ̀kirzɛ̀ tɔ̀ èki. 6Hwà mà hwɛ lì ambɛ̀lɛ ŋga e nyò ya eni e iita ŋga a ɔ̀tɔ̀ ŋgèlì hvɔ̀kɔ rzìi a ŋwa. Ndi e hvònda ema hwà mà ambɛ̀lɛ hvòka ya hvònda rzìi hwa ɛnɛ nanù ema tɔ̀ eyà e rza mò gbèyɛ̀nɛ, hwà mà eŋgòwa mèèmà me awu rzìi hwa òhwa nanù ema ònò mòtò a hwèlì ndi Lohwɛ̀.

7Lì kòmbɛ̀nɛ̀ èŋge rzàawa ya ŋmànja ò èŋge èki ema i ma hwɛ, ò ma hwɛ mbòtà ema e ma hwɛ̀nɛ̀hwɛ̀ na e mòtò ema à mà hwɛ e mòkànèlì mòndɛnɛ wa eŋge èki ema e ma tòŋgahwà na màlìhwa, à mà hwɛ̀lɛ̀hwɛ̀ ndi Publìyùrzì. A ma jò kàrzɛ rzìi a jò wòŋgòwa ò menya meyawò. 8Publìyùrzì rzàŋgò wa eni à mà nàŋga ò lìnɔ̀ŋgɔ̀ na nyambɛ. A ma òhva ŋgɔ̀wu, rzìi a à nyàànà hvɛ na e mbàta. Pàwolò à mà ɛ̀ndɛ lì mò ùŋmanɛlɛ ò tùu rzìi a mò hwàkɛ màà mà eni, a mò kànɛlɛlɛ rzìi a mò wɔ̀wìrzɛ̀. 9Nà òma ene eyà e ma gbèyɛ̀ɛnɛ̀ nanù, hwà-òkèlì hwa èŋge erzòòkà ya arzɛ hwà mà jèeya Pàwolò rzìi a hwa wɔ̀wìrzɛ̀. 10Hwanù hwatò hwà mà jò ŋgbàà màahweyà rzayì-rzayì. Nà òma e hvònda e ma ùke ya lì ɛ̀ndɛ yɔ̀ndɔ̀ ya malìhwa, hwanù hwatò hwà mà jò ŋgba mamɛ ya arzɛ ema e jò arzana ò lì ɛ̀ndɛ eŋge yɔ̀ndɔ̀.

Hwa Pàwolò hwà mà anjiya ò Malta hwà mà uka ò Ròmànì

11O mburzà ya ŋgbɛ̀ndɛ iyàwò ja lì lìya ò Malta, irzɔ i ma kpèeyà ò tenì ya melì me ŋmànja ema me ma uwɛ̀lɛ̀lɛ̀yi ò Alɛ̀rzàndrìyà. Mene melì me ma hwɛ̀lɛ̀hwɛ̀ ndi nanù ema, “Mòòhwà ma màyìrzɛ̀.” Je e hwiya lì anjiya aŋga, meŋge melì me ŋmànja me ma hwɛ ò eŋge èki ò eŋge hvònda ema yùulùlì e ma inyàmɛnɛ. 12I ma ɛndɛ rzìi jò uka ò mbòwa ndɛnɛ ya Rzilakurzi, rzìi i lìya aŋga menya meyawò. 13I ma anjiya aŋga rzìi je ɛndɛ yɔ̀ndɔ̀ ya malìhwa natɛ̀ɛ jò uka ò e mbòwa ndɛɛndɛ ya Lɛ̀gìyùmì. O wònɛyi wùnyà e mbɛ̀hvɛ̀nì ya ŋginyà e ma wòteya lì uŋgɛlɛ ema e ma uwɛ̀lɛ̀lɛ̀yi mbɛŋgɛ. Rzìi ò mèenyà me hwàkɛ, i ma uka ò e mbòwà ya Pùtɛ̀yòlì. 14I ma awùlùwɛ hwatò aŋga ema hwa lòkɛ̀yì Krirztò. Hwà mà jò òhweyà nanù ema i lìye na wɔ̀ mèenyà lìrzamba. I ma anjiye aŋga rzìi jò uka ò e mbòwà ndɛnɛ ya Ròmànì. 15Wònyamòwè hwa Krirztò hwà mà hweyà nanù ema i hwèlì i jà, ò eŋgànɛlɛ hwà mà uka natɛ̀ɛ na ò èki ema e hwɛ̀lɛ̀hwɛ̀ èlùwà ya ama Apìyùrzì hwahvɛhvɛ hwà mà jò ambɛlɛlɛ ò èki ema e hwɛ̀lɛ̀hwɛ̀ e Ndawò ya Hwàyɛ̀ni Hwàyàwò. Nà òma Pàwolò à mà hwa ɛnɛ, à mà eka Lohwɛ̀ rzìi a ètìrzɛ̀ mèèmà mò eni.

Pàwolò a uki ò Ròmànì

16È hvònda i ma ùke ò Ròmànì, Pàwolò à mà ŋgbààhwà wònjà ò lì lìya mɔ̀ ŋmìti, ndi à mà òhva rzònja ema e ma mò ɔŋgeya.

17O mburzà ya mèenyà meyawò, Pàwolò à mà rzàŋga hwatimbelì hwa hwatò hwa wònyà Yudà ema hwà mà lìya ò èŋge mbòwà ndɛnɛ ya Ròmànì ò wòlìya. È hvònda ema hwà mà jèe, rzìi mɔ̀ à hwa òhweyà nanù ema, “Ìi wònyànyàŋgò wa ami hwa Irzàyɛ̀lì, imba na rzi gbeye hwatò hwa arzu tɔ̀ eyà yɔ̀kɔ ya wòhwe, ndèŋgàna na rzi gbeye tɔ̀ eyà yɔ̀kɔ ya wòhwe ò lì teŋgɛ̀nɛ̀ ɛ̀ɛ̀mɛ̀ ema imbamba ja arzu i ma jò lìiya. Ndi tɔ̀ nanù, hwatò hwa arzu hwà mà nò lɛmbɛ ò Jèrurzalɛ̀mù rzìi hwa nò akɛlɛ ò hwàtimbelì hwa Ròmànì. O eŋgànɛ̀lɛ̀, na hwèlì ndi ànu nàa mòtò wa hwèwòwà. 18Nà òma hwàtimbelì hwa Ròmànì hwà mà nò kàyìrzɛ hwà mà arza lì nò hwɛmɛ ema na ɛ̀ndɛ, èhwanja hwa rzìi nò lùwane tɔ̀ lìtiŋga ema lì ma nò kànɛyi e kpelì. 19Ndi hwatò hwa wònyà Yudà hwa rza emeyà nanù ema na hwɛmɛhwɛ, ò èŋgànɛ̀lɛ̀ imba nà mà òhwa nanù ema Kàyìrzà mɔ̀ ŋmìti ndi à kulɛ ŋmàŋgò mò ami. Ndi tɔ̀ na aŋga, imba na rzi òhve tɔ̀ eyà ya wòhwe ò lì òhwa ò lì teŋgɛ̀nɛ̀ hwatò wa ami. 20Lìtiŋga lɔ̀ lìŋgi ema lì gbèyi imba na e hwɛlɛ nanù ema jò òhwe. Ò jɔ̀kɛ̀-jɔ̀kɛ̀ na arza nanù ema e hwiye nanù ema e hwèlì tɛ nanù ema iŋgɔ̀kɔ̀hwi i nò hwèlì tɛ ò màà ma ami, nanù òma i hwèlì ndi ò lì hvòmɛ̀nɛ̀ e mòtò ema hwatò hwa Irzàyɛ̀lì hwa ikayi màhvìtà mà awu nanù ema mɔ̀ à hwɛni lì jà.” 21Hwàŋga hwàtimbelì rzìi hwa òhweyà Pàwolò nanù ema, “I rza lu tɔ̀ itita ema jò uhwɛlɛyi ò Jùdeyà ò lì ò teŋgɛ̀nɛ̀. Ndeŋgana tɔ̀ mòtò tɔ̀ mɔ̀kɔ wa arzu a rzi wurzi rzìi a jò jànelì ŋmɛ̀ndì tɔ̀ mbɔrzi ya wòhwe lì ò teŋgɛ̀nɛ̀. 22Ndi irzɔ i lìŋgàna lì hwiya mɔ̀ŋgɛ̀lɛ̀ ma aŋgɔ̀ èhwanja irzɔ i hwi nanù ema ò hweki hwe arzɛ hwatò hwa òhwa wòhwe lì teŋgɛ̀nɛ̀ ene ehvehva ema ò hwèlì nanù.”

23O èŋgànɛ̀lɛ̀ hwà mà ika wùnyà na Pàwolò ema hwa jà lì mò òkànèyà, na òma wòŋgò wùnyà wò ma uke, ŋgìndì ya hwatò e ma jà ò èki ema Pàwolò à mà lìya. Lìwòteya eelele natɛ̀ɛ na e ŋgòmbe, Pàwolò à mà hwɛ lì hwa òhweyà ŋmɛ̀ndì lì hvòmɛ̀nɛ̀ lìkànèyà là mà Lohwà. A ma keka nanù ema hwa lòkɛ̀ Yerzù. Mɔ̀ à mà hwɛ lì gbeyàna hwèhvàrzù ema hwe ma uwɛ̀lɛ̀lɛ̀yi ò e kààtì ya e mbenda ya ama Mòrzè na hwetilelì hwe hwà-òhwèlì hwa hwèlìŋgɛ̀ aŋga nanù wɔ hwa lòkɛ̀ nanù ema Yerzù ndi à hwèlì Krirztò. 24Lòŋgò la awu hwà mà lòkɛ̀ mamɛ Pàwolò à mà òhwe ndi hwanɛ̀yi hwatò hwa rzi lòkɛ̀ nanù ema màmɛ ema à mà hwɛ lì òhwa e hwèlì ndi e jɔ̀kɛ̀. 25O èŋgànɛ̀lɛ̀ hwà mà wòteyà lì atɔ̀kìrzɛ̀nɛ na òma hwà mà hwɛ lì ɛndɛ. Hwa è hwiya lì anjiya, Pàwolò à mà hwa òhweyà nanù ema, “Èlìŋgɛ̀ yà Wòtani e ma hvòmɛ̀nɛ̀ na òma e mò òhweyà mòòhwèlì wà èlìŋgɛ̀ Àyìrzayà hweyà nanù ema a òhweyà imbamba ja anyu nanù ema,

26‘Ɛndɛ ò òhweyà hwaŋga hwatò nanù ema,

È òkànèyà ndèŋgànɛlɛ e òkànèyà hvɛ ndi e rza ò rzɔ̀ŋgìtɛ̀nɛ̀,

e ɔ̀ŋgɔ ndèŋgànɛlɛ e ɔŋgɔ hvɛ ndi e rza ò ɛnɛ tɔ̀ yòma.

27Nà òhwa ndi nanù ehwànja hwanù hwatò mèèmà me awu me eti ò lùuŋga,

wɔ̀ hwa umba màtò ma awu,

ndèŋgànɛlɛ hwa umba mìirzɔ ma awu.

È rzi hwɛ tɛ nanù ò ma mìirzɔ ma awu ma ɛnɛ,

màtò ma awu ma hweyà,

ndèŋgànɛlɛ mèèmà me awu me rza rzɔ̀ŋgìtɛ̀nɛ̀.

Ndèŋgana hwa ò nò àyèŋgòwɛ̀lɛ̀lɛ̀,

ndèŋganɛlɛ na hwa wɔ̀wìrzɛ̀.’”

28Pàwolò rzìi a kulɛ na eŋge mbɔrzi nanù ema, “Inyɔ e hwɛni lì hwiya nanù ema ŋmɛ̀ndì mò lì rzùŋgàhwa ema Lohwɛ̀ à mà òmɛ, ò nàŋgɛ à mà mò òmeya hwatò ema hwa rza enje wònyà Yudà ndèŋganɛlɛ hwa ò mò òkànèyà.”#28.28 Lòŋgò là ikààtì jà wòrzò ì mà làta ŋmɛ̀ŋgɛ mò ùkirzɛ̀. 29 Nà òma Pàwolò à mà òhwe nanù, hwatò hwa wònyà Yudà ema hwa mà hwɛ aŋga, wɔ̀ hwiti hwa mà anjiya rzìi hwa wòteyà lì arzàrzòwɛ̀ ŋginyà. 30Pàwolò à mà lìya ò èŋge mbòwa meya me hwàkɛ ò tenì yà ndawò ema mɔ̀ ŋmitɛ-ŋmitɛ à mà hwɛ lì tàŋga è lɛndi. À mà kàrzɛ hwatò hwa arzɛ ema hwa mà mò jèeya.

31À mà hwɛ lì òhwa ŋmɛ̀ndì lì hvòmɛ̀nɛ̀ lìkànèyà là ama Lohwɛ̀ ndèŋganɛlɛ à mà hwɛ lì òkòlɛ̀ hwatò lì hvòmɛ̀nɛ̀ Rzàŋgò Yerzù Krirztò è rzi hwɛ lì òka tɔ̀ wɔ̀ŋgɔ̀, ndèŋgànɛlɛ tɔ̀ mòtò a rzi mò keka ò lì òhwa tɔ̀ eyà tɔ̀ yɔ̀kɔ.

Currently Selected:

Hwègbèèlì 28: bri

Highlight

Copy

Compare