Profet Sekaraea 2
2
Fatilo Mifi: Kaisei mae balugna kaisei glepo mala fafaja
1Kate filo teu iara na, iara ne filoni keha mifi na, ka mifi igne iara ne filoni kaisei mae te louloku teu kaisei glepo mala fafaja. 2Eghuteuna iara ne cheke eghu ka mana, “Iagho tei aheva?”
Mana ne cheke eghu, “Iara tei mala fafaja namono Jerusalem mala laseni brahugna nei krepagna teu na.”
3Aonu iara filoni engel te au balugu iara igne jifla ne tei thafoni keha engel na. 4Eghuteuna keha engel igne ne cheke eghu, “Iagho chari tei mala tei cheke ka mae majaghani te louloku glepo mala fafaja ana eigna Lord neke cheke eghu, ‘Keha narane Jerusalem ginauna fodu ka naikno nei jaola fodu vuragha ka glepo tautagu. Namono igne ginauna biꞌo krepa fara, eghuteuna mare ginauna theome naba na teke ringni thina te lithui. 5Iara thegu ginauna gringni thina te mala reireghini namono igne jateula khaꞌaghi te phae ligoho ra eghu. Eghuteuna nogu nolaghi biꞌo iara na ginauna phae lamna ka namono igne.’ ”
Lord ne kilodi nogna naiknore mala ke pulo ka namono
6Lord ne cheke eghu ka nogna naiknore, “Rikha mei! Jifla jare, naugna iara neke khi ghami ghotilo mala rikha tei Babilonia mala au tafri ka vido te gnafa.
7“Ghotilo naiknomi Jerusalem teke tei sosolo Babilonia ra, rikha mei!” 8Ke leghu na, Lord mae ihei te au nolaghi fateote'o igne neke vahi ghau iara mala tei toutonu eigna nonomho igne ka kantri te goigonidi nogu naikno iara igre. Mana neke cheke eghu, “Iheire te goigoni ghami ghotilo nogu naikno iara igre, mare jateula te goigoni ni thofno famane nogu glepo iara ra eghu. 9Iara kolho nate magra ka mare na, eghuteuna ghotilo iheire teke nodi sneka mare ra tangomana na teke rheta mala goigonidi mare.” Ka puhi igne, ghotilo nogu naikno iara Jerusalem ra ginauna laseni Lord mae ihei te au nolaghi fateote'o igne, neke kuru ghau iara jateula nogna profet neku.
10Lord ne cheke eghu, “Ghotilo naiknomi Jerusalem! Ghotilo eha balu glealeꞌa! Iara ginauna mei au balumi ghotilo. 11Ka narane tuana kmana naikno ka keha kantri are ginauna mei ka iara Lord mala loku fodu balumi ghotilo nogu naikno iara ra, eghuteuna iara ginauna au balumi ghotilo gnafa.”
Ka puhi igne, ghotilo ginauna lase ghau iara Lord mae ihei te au nolaghi fateote'o igne te kuru mei ghau iara ka ghotilo na. 12Nohi Juda igne ginauna mala nogna Lord ka nogna glose blahi mana. Eghuteuna mana ginauna nake vahini Jerusalem kaisei namono mala au mana tagna. 13Eghume tahati gnafa ka nauthoglu igne mala au kmu ke ulugna Lord, naugna gognarona, mana jifla mei ka nogna vido blahi kligna.
Currently Selected:
Profet Sekaraea 2: mrn
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators , Inc. All rights reserved.
