К Филиппийцам 1

1Укут посланият Павелымыңлъю, Тимофейемыңлъю пиңӯт, қыпҳаҳтыкӣнкуң Христос Иисусым. Письмоӷақамси қамахлъюси Кияӷныӷым югитни, юӷаӷвигым иглыӷутистыңитни, диаконынилъю Филиппымылңуӷни, ухпықилӷӣт Христос Иисусыкун. 2Кияӷныӷым Атамта, Атанымталъю Иисус Христосым наңлъыклъисилъю, ныкыхмылъылгуслъисилъю.

Павелым Юӷа̄ткыхкаңи Ухпықат Филиппымылңӯт

3Игамсиқаюгвикақақа Кияӷнықа лъпысиның сюмыҳтаӷа̄ткынъымси. 4Юӷа̄ткынъымси қуяпихтақуңа, 5қаюҳлъяк нықамикақа уңипақилгусиқақаҳпысиңа Пинилӷӣның Уңипаның. Каюсиқақаҳпысиңа ухпықиюха̄лъыҳпысиның Пинилӷӣның Уңипаның хўавымун кынляңа. 6Лӣсимакңўа̄ӷақа Кияӷнық пӣнлиӷикақ пинилӷӣмың қыпҳақамың илюхпысини, лъңан апыӷӣҳлъықа̄ Христос Иисус утыӷниқан. 7Итагнапихтуқ хўаңамни сюмыҳтаӷа̄ткынъымси таўатын қаюҳлъяк илюмнитақуси. Уңипақиңулюңалъю, ипапиҳқиңулюңалъю Пинилӷӣт Уңипат ипаңунилюки, ма̄тынлъю анусимиңлъяӷвигмылъюңа, қамахлъюси алъхыҳтыңъўа̄ҳси Кияӷныӷым наңлъыхталъҳа хўаңамнун малигулъюси. 8Кияӷнық лӣсимакистыкақа ысҳаӷьюпихтақамси, қаюҳлъяк қамахлъюси пиниқамси Христос Иисусым пиниқылъҳатун лъпыси.

9Юӷа̄ткақамси пиниқиҳлъягысқылъюси, лӣсималъыңатаӷӣсқылъюси, лӣгикылъыңатаӷӣсқылъюсилъю. 10Таўатын лъӣқуфси кияҳтылъыҳпысини сяңўа̄ пинилъыҳпигақ накмикумаңинаӷьягулъықаҳси. Та̄хкын Христос тагинқихтыкан пылюңилъықусилъю, анахутылъҳилъықусилъю. 11Ынка̄м уңувалъыси имиҳлъықут ипапыста̄қ пинӣпихлъыҳӣмың Иисус Христосыңинаҳа̄м пӣтыстыка̄ның. Та̄хкын югыт қӯлваҳлъықа̄тлъю, усюқылъықа̄тлъю Кияӷнық.

Павелым Анусимиңлъялъҳан Уңипақыстӣ Пинилӷӣт Уңипат

12Ухпықа̄лгутымни, лъпысинун лӣсимакысюгақа анусимиңлъяӷвигмытылъыӷма ипапыста̄қ углялӷӣ ю̄к нагатыста̄ Пинилӷӣның Уңипаның. 13Тама̄кын апалъюқлъюку қамахлъютың умӣлгым мыңтыӷа̄н кылыңакистыңита лӣта̄т анусимиңлъяӷа̄гуңа қаюҳлъяк қыпҳаҳтыкыхкаңаңа Христосым. 14Анусимиңлъяӷвигмытылъыӷма алъюлъютың ухпықалӷутыт ухпықӣӷатаӷаҳтыстӣ Атаныҳқун. Ынка̄м ўата тытугнаниӷатаӷаҳтут уңипақныӷмыхтыху Христос.

15Ипаңӯқ иляңи уңипақиңӯт Христосымың қаюҳлъяк ақинакңукаңатңалъю, а̄ҳтӣра̄ӷукаңатңалъю. Иўырңа иляңи уңипақиңӯт Христосымың ылъқуӷулъютың. 16Уңипақиңӯт қаюҳлъяк пиниқыхкаңатңа. Лӣсимакыхкаңат Кияӷныӷым тагистыкақа̄ңа хўавык ныкывӷатысқылъюки Пинилӷӣт Уңипат аңуямнъың. 17Иўырңа иляңит уңипақиңӯт Христосымың лъңина̄юхтым, ипапиҳқыхпынатың. Сюмыӷмыхни таўатын пилъыӷмыхтыхун сыӷлылӣҳқатаӷаӷнилюңа пӣтңа анусимиңлъяӷвигмысималюңа. 18Итагнаҳтуқ, уңипақилъҳат ылъқуӷутңаяӷңа̄н налиӷмың сямың алъяның апалъюлгуяӷңа̄н, уңипақилъҳита қуястақа̄ңа, қаюҳлъяк уңипақиңӯт Христосымың угляпихлъыҳӣнун.

19А̄а қуяңалъықуңа, қаюҳлъяк лӣсимакақа а̄ньяҳқа̄гуңа анусимиңлъяӷвигмың юӷа̄ткылъыҳпысигун, каюсилъҳакунлъю Иисус Христосым Таӷныӷа̄н. 20Пиюкылъыҳлъякалъю, сиӷимакылъыҳлъякалъю ысҳа та̄на, кайңусяӷа̄тыфқа̄ма пиналюңа Христосымун. Итупилъ кияҳсюгақуңа илютулюңа ўатақа̄ӷақ ма̄тын анусимиңлъяӷвигмытылъымни. Ынка̄м Христос қӯлвалъыңылъықуқ уңуваӷңа̄ӷма, налиӷмың туқуяӷңа̄ӷма. 21Хўаңамни уңувалъық Христосыңӯқ, ынка̄м туқулъық алъхыӷутаӷалъҳӯқ. 22Иўырңа уңуванақңукума қыпҳаӷатаӷаҳлъықуңа Христосымун. Наликык накмикылъыҳқақа налъюкақа̄, уңувалъық налиӷмың туқулъық. 23Кукшиқңӯңа налихкының накмӣлъыҳқамның. Аӷуляқсюпихтақсяҳтуңа Христосымынъалюңа, қаюҳлъяк пиниӷатаӷаӷьяҳқа̄гуқ та̄на. 24Иўырңа мыгнунаӷатаӷаҳтуқ лъпыси апалъюқлъюси уңуваңӯңа. 25Ипапиҳқуткума̄қа та̄на, лӣсимакақа ўӣн уңуванақңӯңа. Лъпысининъақңӯңа каюсӣнъалюси нагусқылъюси, қуямалъыңысқылъюси ухпылъыҳпысигун. 26Лъпысинун пикума, усюқатаӷаҳлъықаҳси Христос Иисус хўаңа апалъюқлъюңа.

27Сяяӷңа̄тңа нагныӷутыки кияҳта̄лъыси Христосым апыҳтулъҳатун Пинилӷӣтхун Уңипатхун. Ынка̄м ысҳаӷьяҳтуқумси, налиӷмың авӣтыӷңа̄ӷма нагақуқумси, лӣгикылъықақа ата̄систун пилъыҳси. Лӣгикылъықақалъю қырңаҳпыси ныкывӷанъақуткылъыси Пинилӷӣт Уңипат аңуяхпысиның. 28Аликыхпынаки аңуяси, қӯнпың илютулъюси. Ынка̄м таўатын пилъыҳпыси ипапиҳқылъықа̄т лъңит кая̄лъқӣна̄нӷитут. Лъпыси кая̄лъқӣлъықуси қаюҳлъяк Кияӷныӷӯқ кая̄лъқӣстилӷӣ лъпысиның. 29Лъпысинун қыпҳа̄сяқлъыгуҳтыстыкақа̄ Христос, ухпықңинаҳпына̄н, икфиқылгусиқысилъю. 30Пилъюўалгусиҳтыңъа. Сивунӷани ысҳапакақаҳпысиңа пияқлъӣлӷӣңа, нагақуқақасилъю пияқлъӣлъҳынка ма̄тын. Лъпысилъю тама̄кут ата̄сит пияқлъӣӷуткынъақңўа̄си.

Currently Selected:

К Филиппийцам 1: ess2

Highlight

Copy