Gálata 5

Chi Moisepa bɨdadepema Cristopa tachi ãjã́ p'aneepida

1Cristopa tachi k'aripasima mãɨ pari ãjã́ p'ananamẽrá. Mãɨ minachia ĩjãa p'anat'ɨ. Chi chipari pae pari mimiapataɨrã jĩra mãicha p'anarãt'ɨ. 2Mɨ Pablopɨ. ¡Ũrit'ɨ! Mɨa nãɨ mãrá jararuma: mãra k'ak'ua tauchaadai p'anɨ a k'ɨ̃risia p'anɨpɨra, Cristopa mãra k'orea oodapa k'aripaiwẽma. 3Mãicha mɨa jararuma: abaɨ ɨmɨk'ĩrapa ichi k'ak'ua tauchaapiipɨra, Moisepa bɨda ãarea jõma oo bai bɨma. 4Chi eda mãranepemarãpa k'ɨ̃risiapatama mãɨ Moisepa bɨda oo p'anɨnepa Tachi Ak'õrepa chi jĩp'a berã paara bɨit'a. Cristo awara wãsidama mãɨnepa ichi sõpiadepa jĩp'a bɨ bada itu bɨsidama. 5Maamina tachia Cristode ĩjãa p'anɨ pẽra Tachi Ak'õre Jaoredepa piarã k'awa p'anɨma Tachi Ak'õrepa tachi chi jĩp'a berã paara bɨit'a. 6K'ak'ua tauchaa bɨdepa wa k'ak'ua tauchaawẽa bɨdepa tachi Jesucristo ome ará bak'ama. Mãɨpari chi ichide ĩjãa bɨdepa ichi ome ará baparima mãɨnepa waapẽarã k'ɨ̃ria baparima.

7Mãrapa piarã chi pedea pia ĩjãa p'anasidama. ¿K'aipa mãra oosima mãɨ pedea itu bɨdamẽrá? 8Ãchia jaratea p'anɨt'a Mãra T'ɨ̃nanepa chewẽa bɨma. 9K'ɨ̃risiat'ɨ: «P'ana ooropiparí ãpia bɨpa harina ãarea ẽesãapiparima». Ara mãɨ jĩra ãpia piawẽa jaratea bɨpa ãarea piawẽa k'ɨ̃risiapiparima. 10Maamina Tachi Chipari Jesucristodepa mɨa k'awa bɨma mãrapa mɨa jara bɨt'a awara k'ɨ̃risiadaiwẽma. Abaɨpa mãra mãɨya ooipɨra Tachi Ak'õrepa ɨtɨaipɨ. 11Ũpẽarã, k'ak'ua tauchaadai p'anɨt'a mɨa wapida jaratea bɨpara, chi mãɨya jaratea berãpa mɨ piawẽa oodai k'orea ẽp'ẽnaiwẽ pasima. Mɨa mãɨya jaratea bɨpara ãchia Jesú k'urusude piudadepema piawẽa k'ɨ̃risiadaiwẽ pasima.#5:11 Jesú k'urusude piudadepema piawẽa k'ɨ̃risiadaiwẽ pasima. 1 Corintio 1:22-23. 12Mɨmá ¡pia bɨma chi mãra mãɨya waa oo bepa ãchi ɨmɨk'ĩra k'ak'ua bɨat'upidait'a!

13Ũpẽarã, Tachi Ak'õrepa mãra t'ɨ̃sima ãjã́ pari p'ananamẽrá. Maamina k'aripada pẽra k'ɨ̃risiarãt'ɨ mãra k'ak'uapa k'ɨ̃ria bɨ jĩra oodai p'anɨt'a. Mãɨpari piarã k'ɨ̃ria p'anɨnepa chi k'aripat'ɨ. 14Moisepa bɨda nãɨ pedea aba ãarea jara bɨma: «Abaɨ k'ɨ̃riase ara pɨchi k'ɨ̃ria bɨ jĩra».#Levítico 19:18. 15Jĩrak'aua p'anat'ɨ. K'ĩruu pedea tuananaipɨra, chõo tuananaipɨra, ara mãra tuaba jõma jõnaipɨ.#5:15 Griego pedeade mãɨ versículo nãɨya bɨ bɨma: Mãra chi k'aa tuananaipɨra, mãɨnepa ara machit'u k'o tuananaipɨra, ara mãra tuaba jõma jõnaipɨ.

Tachi Ak'õre Jaoredepa nipat'ɨ

16Mãɨ k'orea mɨa jararuma: Tachi Ak'õre Jaoredepa nipat'ɨ. Mãɨyaipɨra mãra k'ak'uapa nemietá oo k'ɨ̃ria bɨt'a oodaiwẽma. 17Nãɨ k'ak'uapa nemietá oo k'ɨ̃ria bɨt'a Tachi Ak'õre Jaorepa k'ɨ̃riak'ama. Mãɨnepa Tachi Ak'õre Jaorepa oopi k'ɨ̃ria bɨ nãɨ k'ak'uapa k'ɨ̃riak'ama. Ãchi ará pia p'ananak'a pẽra mãrapa oo k'ɨ̃ria p'anɨ p'ue oodaiwẽma. 18Maamina Tachi Ak'õre Jaorepa mãra uru nipaipɨra, Moisepa bɨdade p'anɨwẽma.

19Tachia chi nãɨ k'ak'uapa nemietá ooparí minachia k'awa p'anɨma. Nãɨpɨ: k'ima awaraɨ ome k'ãipataɨ, ne k'ĩra p'era oopataɨ, chi ne wawaria ome ne k'ĩra p'era ooyá p'anapataɨ, 20juapa oodada sãdoa ɨt'aa chiidipataɨ, jaipanarãpa oopataɨ, waapẽarã unuemaapataɨ, k'ĩruu pedeapataɨ, waapẽarãné uru p'ananai k'ɨ̃riapataɨ, ɨ̃apachia k'ĩruupataɨ, waapẽarã k'aepẽra atepe pia p'ananayá jɨrɨpataɨ, ãchi k'ɨ̃risia k'ak'awá k'ɨ̃risia p'anapataɨ, Tachi Ak'õre pedea k'ĩra awara jaratea p'anɨnepa awara wãpataɨ, 21waapẽarãpa uru p'anɨ k'orea piawẽa k'ɨ̃risiapataɨ, mĩa peapataɨ, piu nipapataɨ, arapaapataɨ ewari oo p'anɨne minachia nemietá oopataɨ mãɨnepa nejõma nemietá mãɨ jĩra be sida.#5:21 Mĩa peapataɨ. Griego pedeade chi eda waapẽarã k'art'ade mãɨ newẽma. Mɨa mãrá naena jarada jĩra mãicha jararuma: mãɨ nemietá oo be Tachi Ak'õre juade p'ananaiwẽma, ichidirã paara.

22Maamina Tachi Ak'õre Jaorepa nakɨɨ teaparima: waapẽarã k'ɨ̃ria p'anapataɨ, arapá p'anapataɨ, ne k'ɨ̃risiawẽa p'anapataɨ, jõma choa p'anapataɨ, ẽpẽrarã ome sõpia p'anapataɨ, ẽpẽra pia p'anapataɨ, ãchia jara p'anɨ jĩra oopataɨ, 23waapẽarã k'aepẽra pia berã k'ɨ̃risiadak'aɨ mãɨnepa tachi k'ak'ua jĩp'a uru p'anapataɨ. Mãɨ bɨda newẽma chi mãɨ ãarea eda jara bɨt'a «nemietaade» a bɨt'a. 24Cristoderãpa chi nãɨ k'ak'uapa nemietá oo k'ɨ̃ria bɨt'a k'urusude barijira bɨk'ari peasidama. 25Tachi Ak'õre Jaoredepa chok'ae p'anɨ pẽra, tachi ichidepa nipadai p'anɨma. 26Waapẽarã k'aepẽra pia be k'ɨ̃risiadaiwẽa p'anɨma, k'ĩruu pedea tuananaiwẽa p'anɨma, mãɨnepa abaɨpa uru bɨ k'orea piawẽa k'ɨ̃risiadaiwẽa p'anɨma.

Currently Selected:

Gálata 5: tdc

Highlight

Copy

Compare