Gálata 3

Jesucristode ĩjãa p'anɨnepa Tachi Ak'õre Jaore jitapatama

1Ũpẽarã Galacia tuadepemarã, ¡mãra k'ɨ̃risia newẽa p'anɨrãpɨ! ¿K'aipa mãra seasima chi piarã pedea itu bɨdamẽrá? Taipa mãrá jõma chi Jesucristo k'urusude piu bada k'orea pia jarateapachidama. 2Mɨa nãɨ mãrá idiruma: Tachi Ak'õre Jaore jitasidaɨde, ¿mãrapa Moisepa bɨda oo p'anasidak'ãra? Wa ¿chi pedea Jesú k'orea ũrinak'ari ĩjãasidak'ãra? 3¡Mãra piarã k'ɨ̃risia newẽa p'anɨrãpɨ! Cristode ĩjãasidaɨde naa Tachi Ak'õre Jaoredepa pia nipasidama. ¿Naapae ara machia oo p'anɨnepa chi jĩp'a berã paara nipadaik'ãra?#3:3 Ara machia oo p'anɨnepa. Griego pedeade nãɨya bɨ bɨma: nãɨ k'iurudepa. Mãɨ jaraideepara tachi ɨmɨk'ĩra k'ak'ua tauchaait'a. 4¿Mãra Cristo k'orea pari mĩasidak'ãra? ¡Mɨmá mãra pari minachia mĩanaé pasima! 5Tachi Ak'õrepa ichi Jaore mãrá teasi awara, ẽpẽerãpa ne p'ue oodak'apɨ́ mãra t'ãena oo bɨma. ¿Chi Moisepa bɨda oo p'anana k'orea mãɨya oo bɨk'ãra? ¿Mãɨya oowẽk'ãra chi pedea pia Cristo k'orea ũrinak'ari ĩjãasida pẽra?

6Abrahán k'orea k'ɨ̃risiat'ɨ. «Abrahanpa Tachi Ak'õrene ĩjãasima. Mãɨ k'orea Tachi Ak'õrepa ichi jĩp'a unusima».#3:6 Tachi Ak'õrepa ichi jĩp'a unusima. Mãɨ jara bɨma Tachi Ak'õrepa ichidí jĩp'a berã paara bɨsima. Cristode ĩjãa p'anasi pẽra, chi galaciadepema judiorãwẽ ĩjãapataɨrãpa abarik'a Tachi Ak'õre Jaore p'ue jitadai p'anasima, ara chi judiorã jĩra. Génesi 15:6. 7Mãɨpa k'awadai p'anɨma chi piarã Tachi Ak'õrene ĩjãa berãt'a Abrahán warrarãpɨ. 8Chõarãena Tachi Ak'õre pedeade bɨ bɨma judiorãwẽpa Tachi Ak'õrene ĩjãasidara ichia ãchi ichidí jĩp'a berã paara bɨi pasit'a. Mãɨ k'orea chõarãena Tachi Ak'õrepa Abrahaná chi pedea pia pedeasima. Ichia nãɨya jarasima: «Pɨdepa mɨa nãɨ ĩjũane be p'uuru jõma k'aripaipɨ».#Génesi 12:3. 9Mãɨpuru chi Abrahanpa ĩjãana jĩra ĩjãa berã Tachi Ak'õrepa jõma k'aripaipɨ Abrahán k'aripada jĩra.

10Moisepa bɨda oo p'anɨnepa chi Tachi Ak'õrené jĩp'a berã paara p'aneenai k'ɨ̃risia berã nepɨra pará p'anɨane a bɨma. Mãɨ Moisepa bɨdade nãɨya bɨ bɨma: «Nãɨ Moisepa bɨda jõma oowẽa be Tachi Ak'õrepa nepɨra pará p'anɨane aipɨ».#Deuteronomio 27:26; Salmo 143:2; Romano 3:20. 11Piarã tachia pia k'awa p'anɨma Moisepa bɨda oo bɨdepa Tachi Ak'õrepa mi ãpia pida chi ichidirã jĩp'a berã paara bɨit'a. Tachi Ak'õre pedeade nãɨya bɨ bɨma: «Chi jĩp'a bɨt'a, Tachi Ak'õrene ĩjãa bɨdepa chok'ae baipɨ».#Habak'ú 2:4.

12Maamina chi Tachi Ak'õrene ĩjãa bɨt'a chi Moisepa bɨda oo bɨ k'aepẽra k'ĩra awara bɨma. Mãɨpari ichi k'orea nãɨya bɨ bɨma: «Ẽpẽrapa nãɨ Moisepa bɨdade jara bɨt'a oo baipɨra, mãɨ chok'ae baipɨ».#Levítico 18:5.

13Moisepa bɨ bada jĩra oo p'anɨwẽ pẽra, nepɨra pará p'anɨane aima. Mãɨnepema Jesucristopa tachi k'aripasima. Ichit'a Tachi Ak'õrepa tachi k'ak'ua k'orea nepɨra paraapisima. Moisepa bɨdade nãɨya bɨ bɨma: «Chi pak'urude jira bɨdada, Tachi Ak'õrepa mãɨ nepɨra pará bɨade aipɨ».#3:13 Pak'urude. Griego pedeade pak'uru arude k'urusu sida jara bɨma. Deuteronomio 21:23. 14Mãɨyasima Tachi Ak'õrepa Jesucristodepa judiorãwẽ sida k'aripamẽrá ichia naena Abrahaná k'aripayade ada jĩra.#Génesi 12:3; Isaía 44:3; Hageo 2:5. Tachia Jesucristode ĩjãa p'anɨ pẽra Tachi Ak'õrepa ichi Jaore teai jarada jitasidama.

Tachi Ak'õre Abrahán ome pedea auda

15Ũpẽarã, mɨa ne jara bɨdepa pedearuma: ẽpẽrapa waapẽarã ome pedea auda k'art'ade bɨk'ari ichi t'ɨ̃ mãɨ k'art'ade bɨsira, mi ãpia pida mãɨ pedea bɨda p'ue ãyá bɨdaiwẽma, mãɨnepa k'ɨ̃risia awara p'ue eda bɨdaiwẽma. 16Ara mãɨ jĩra Tachi Ak'õrepa Abrahaná, mãɨnepa chi ichidepa unui bɨa jarasima ichia jõmãɨrã k'aripait'a.#Génesi 22:18. Tachi Ak'õre pedeade bɨwẽa bɨma «Abrahanepa unui ẽpẽrarã» chok'ará ẽpẽrarã jara bɨ jĩra. Mãɨpari bɨ bɨma Tachi Ak'õrepa chi Abrahanepa unui bɨa mãɨya jarasit'a abapuru pedea bɨ pẽra. Mãɨ Cristopɨ. 17Mɨa nãɨya jara bɨma: Tachi Ak'õre Abrahán ome pedea ausima.#3:17 Griego pedeade chi eda waapẽarã k'art'ade nãɨya bɨ bɨma: Cristodepa Tachi Ak'õre Abrahán ome pedea ausima. 430 ãyo wãyá pak'ari Moisea ichia bɨda bɨpisima. Maamina chi ichi Abrahán ome naa pedea auda, mãɨ Moisepa bɨda ãyá bɨé pasima. Ãyá bɨdapara ichia k'aripayade ada ooiwẽ pasima. 18Moisepa bɨda oo p'anɨ k'orea ichia tachi k'aripaipɨra, ichia k'aripayade ada jĩra k'aripawẽma. Maamina Tachi Ak'õrepa Abrahán k'aripayade ada pẽra ichi sõpiadepa k'aripasima.

19Mãɨyara ¿Tachi Ak'õrepa k'ãre k'orea Moisepa bɨda ichiá bɨpisima? Mãɨya oosima ẽpẽrarãpa nemietá oopataɨ k'awadamẽrá. Ẽpẽrarã mãɨ Moisepa bɨdadepa p'anasidama aba Abrahanepa unui bada cherudea, ichidepa Tachi Ak'õrepa k'aripayade ada pẽra. Tachi Ak'õrepa mãɨ Moisepa bɨda Ichia ɨt'aripa peedaɨrãnepa teasima. Mãɨ teak'ari Moisepa ẽpẽrarã́ teasima. 20Maamina Tachi Ak'õrepa Abrahaná k'aripayade aside aba pida mãɨ pedea jarade peé pasima, mãɨpari ara ichiapuru Abrahaná mãɨya jarasima.

21Mãɨya bɨpɨra Tachi Ak'õrepa ichi pedea bɨda Moisea bɨpiside ¿ichi Abrahán ome pedea auda itu bɨsik'ãra? ¡Mãɨyawẽma! Moisepa bɨdadepa tachi p'ue chok'ae p'ananaipara, abapuru mãɨ bɨda oo p'anɨnepa Tachi Ak'õrepa tachi chi jĩp'a berã paara bɨi pasima. 22Maamina Tachi Ak'õre pedeade bɨ bɨma nemietaapa jõmãɨrã eda serra uru bɨt'a. Mãɨya Jesucristopa ichi Ak'õrepa jarada oosi pẽra, chi ichide ĩjãautapa mãɨ Tachi Ak'õrepa teai jarada jitadaima.

23Cristode ĩjãanai naena tachi Moisepa bɨda juade p'anasidama. Mãɨnepema p'ue awara wãnaé pasima aba Tachi Ak'õrepa Cristo k'awapirudea. 24Piarã Moisepa bɨdapuru tachi ua basima aba tachia Cristode ĩjãautadea. Cristo chek'ari ichide ĩjãa p'anɨ k'orea Tachi Ak'õrepa tachi chi ichidirã jĩp'a berã paara bɨparima. 25Maamina idiapae tachia Cristode ĩjãa p'anɨ pẽra Moisepa bɨdapa tachi p'e ua bɨwẽma. 26Jesucristode ĩjãa p'anɨ pẽra jõma mãra Tachi Ak'õre warrarãpɨ. 27Mãra porochoasidaɨde unupisidama Cristo jĩra p'aneesidaɨt'a.#3:27 Cristo jĩra p'aneesidaɨt'a. Griego pedeade nãɨya bɨ bɨma: Cristode neet'á chiwidi jĩra jɨ̃ p'aneesidama. 28Mãɨ jara bɨma judio griego ome abarik'a p'anɨma, chi chipari pae pari mimiaparí mãɨnepa chi chipari pae pari mimiak'apɨ́ ome abarik'a p'anɨma, mãɨnepa ɨmɨk'ĩra wẽra ome abarik'a p'anɨma. Jõma mãra ẽpẽra aba bɨ jĩra p'anɨma, Jesucristo ome ará p'anɨ pẽra. 29Mãra Cristodé pẽra piarã Abrahán warrarãpɨ. Mãɨpa Tachi Ak'õrepa mãra k'aripasima ichia Abrahaná tachi k'aripayade ada pẽra.

Currently Selected:

Gálata 3: tdc

Highlight

Copy

Compare