Gálata 1
1
Nãɨ k'art'ade Pablopa naa bɨda
1Mɨ Pablopɨ, Jesucristopa peedapɨ.#1:1 Jesucristopa peedapɨ. K'ãp'ũra pedeade bɨ bɨma: apóstol. Mãɨ griego pedeade jara k'ɨ̃ria bɨma «peeda». Ẽpẽrarãpa mɨ jɨrɨ atadaé pasima Jesucristopa peeda bamẽrá. Mãɨpari Jesucristopa mãɨnepa ichi Ak'õrepa, ichi piu bada chok'ae p'irabaripidapa mɨ mãɨya bɨsidama. 2Mɨa nãɨ k'art'a bɨruma ũpẽarã Galacia tuadepemarã pae. Jõma ũpẽarã mɨ ome p'anɨrãpa k'ɨ̃ria p'anɨma, 3Tachi Pajãnepema Ak'õrepa mãɨnepa Tachi Chipari Jesucristo ãchi sõpiadepa mãra k'aripa p'ananait'a ne k'ɨ̃risiawẽa p'ananamẽrá. 4Chi mãɨ Jesucristopa ara ichi tachi nemietá k'orea itu peapisima nãɨ ewari mietaadepema k'aripai k'orea. Mãɨya oosima Tachi Pajãnepema Ak'õrepa k'ɨ̃riana pẽra. 5Ewaricha ichiá pia pedeadai p'anɨma. Mãɨya beese.#1:5 Mãɨya beese. K'ãp'ũra pedeade bɨ bɨma: amén.
Pedea pia Cristo k'orea abapuru bɨma
6Mɨa k'awa k'ɨ̃risiawẽma sãmaasã́ mãrapa ɨ̃apachia Tachi Ak'õre jãɨya itu bɨsidat'a. Ichia mãra t'ɨ̃sima Cristo sõpiadepa k'aripai k'orea, maamina mãrapa chi eda waapẽarãpa pedea pia jĩra jara p'anɨt'a minachia ũri p'anɨma. 7Piarã chi pedea pia waa awara newẽma. Maamina chi eda waapẽarãpa mãrá piawẽa k'ɨ̃risiapipatama pedea pia Cristo k'orea piawẽa jaratea p'anɨ pẽra. 8Parituapa pedea pia Cristo k'orea taipa mãrá jarateadada awara jarateaipɨra, Tachi Ak'õrepa ichi ewaricha ɨtɨaipɨ; taipa wa Tachi Ak'õrepa ɨt'aripa peeda pida awara jarateadaipɨra, tai sida Tachi Ak'õrepa ewaricha ɨtɨaipɨ. 9Taipa naa jaradada mɨa mãicha jararuma: mãrapa pedea pia Cristo k'orea ĩjãanana abaɨpa mãɨ awara jarateaipɨra, Tachi Ak'õrepa ichi jõpiipɨ.
10Mãɨya jara bɨdepa mɨa jɨrɨwẽa bɨma ẽpẽrarãpa mɨ pia ununait'a, mãɨpari k'ɨ̃ria bɨma Tachi Ak'õrepuru mɨ pia unuit'a. Cristode ĩjãai naena mɨa jɨrɨ bapachima ẽpẽrarãpa mɨ pia ununait'a. Wapida mãɨya oo bɨpara, mɨ Cristo pae pari mimiaparí paiwẽ pasima.
Jesucristopa Pablo t'ɨ̃na
11Ũpẽarã, k'awat'ɨ pedea pia Cristo k'orea mɨa mãrá jarateada ẽpẽra k'ɨ̃risiadepemawẽma. 12Mãɨ pedea mɨa mi ãpia pida ẽpẽranepa k'awaé pasima. Mi ãpia pida ẽpẽrapa mɨá jarateaé pasima. Mãɨpari Jesucristopa mɨá k'awapisima. 13Mãrapa ũrisidama mɨ sãmaasã́ nipasit'a judiorãpa jarateapataɨ jõma oo baside. K'awa p'anɨma mɨa Tachi Ak'õreneerã ẽpẽrarã minachia piawẽa oopachit'a. Jõma jõpi k'ɨ̃ria basima. 14Judiorãpa jarateapataɨ mɨa atepe k'awaru pasima mɨ aɨk'aɨrã k'aepẽra, tai chõarãenapemarãpa oopataɨ minachia oopachideepuru. 15Maamina mɨ t'õi naena Tachi Ak'õrepa mɨ jɨrɨ atasima, mãɨnepa ichi piadepa mɨ t'ɨ̃sima ichi pae pari mimiaparí bamẽrá. Ichia k'ɨ̃risiada jĩra, 16ichi Warra mɨá k'awapisima judiorãwẽa ichi k'orea jaramẽrá. Mãɨne mɨa abaɨmá pida idié pasima sãmaasã́ ooi bɨ k'awai k'orea. 17Mãɨnepa chi mɨ naa Jesucristopa peedaɨrã́ Jerusalenea idide wãé pasima. Mãɨpari mɨ Arabia tuadea wãsima. Mãɨya nak'ari Damasco p'uurudea jĩitea wãsima.
18Ãyo ũpea pak'ari mɨ Jerusalenea wãsima Pedro k'awai k'orea. Mãma ewari k'ak'o quince ichi ome basima. 19Pedro awara Jesucristopa peedaɨrãnepema abapuru Tachi Chipari ũpẽa Santiago unusima.#1:19 Santiago ichiaba «Jacobo» apatama. Waapẽarã mɨa unué pasima. 20Tachi Ak'õre k'ĩrari mɨa mãrá jararuma: mɨa mɨ k'orea bɨrut'a seawẽma. 21Jerusalenea wãk'ari mɨ Siria tuadea mãɨnepa Cilicia tuadea wãsima. 22Cristode ĩjãa be Judea tuadepemarãpa mɨ ununak'a pasima. 23Ãchia abapuru ũripachidama ũpẽarãpa nãɨya jara p'anɨt'a: «Chi tachi piawẽa ooi k'orea ẽp'ẽ badapa, idiapae jaratea nima, jõmãɨrãpa Cristode ĩjãanamẽrá. Naena mãɨ ichia jõpi k'ɨ̃ria basima». 24Mãɨpuru mɨ k'orea ãchia Tachi Ak'õrea pia pedeasidama.
Currently Selected:
Gálata 1: tdc
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
