2 Corintio 9
9
Ũpẽarã Jerusalenepema pae erreara jɨrɨp'edada
1Mãrapa ũpẽarã Jerusalenepema pae erreara jɨrɨp'e p'anɨ k'orea mɨa nãɨ k'art'ade waa bɨiwẽa bɨma, 2mɨa k'awa bɨ pẽra mãrapa k'aripa k'ɨ̃ria p'anɨt'a. Mãɨ k'orea nãma Macedonia tuade mɨa ũpẽarã́ mãra k'orea pia pedeaparima. Mɨa ãchiá jarapachima warí ãyo pasiedapema mãra Acaya tuadepemarãpa k'aripadai k'orea p'anasit'a. Mãɨya ũrinana pẽra chok'ará ũpẽarã Macedonianepemarãpa abarik'a k'aripa k'ɨ̃ria p'anɨma. 3Mãɨ k'orea mɨa nãɨ ũpẽarã mãramá peeruma mɨa mãra k'orea pia jarada sea paiwẽma, mãɨpari mãrapa piarã teadai k'orea p'ananaipɨ. 4Mãɨya oodaepɨra, chi wãuta Macedonianepemarã ũpẽarã mɨ ome mãramá wãutade, mãrapa erreara jɨrɨp'edawẽa p'anɨt'a ununai pasima. Mãɨyara tai k'ĩra p'eradai pasima, k'ɨ̃risia p'anɨ pẽra mãrapa piarã jɨrɨp'edai padat'a. Mãɨnepa mãra sida minachia k'ĩra p'eradai pasima. 5Mãɨ k'orea mɨa nãɨ ũpẽarã́ chichupuria idisima mɨ naa mãrá jarade wãnamẽrá mãrapa sõpiadepa teadayade adada jõma jɨrɨp'edamẽrá. Mãɨya mɨ cherude mãɨ jõma uru p'ananaipɨ. Mãɨpa unupidaipɨ taipa teapadade adawẽa p'anɨ, mãɨpari mãrapa sõpiadepa teasidama.
6Nãɨ k'ɨ̃risiat'ɨ: «Ãpia uurupa ãpia chauipɨ. Waibɨa uurupa waibɨa chauipɨ». 7Ẽpẽracha teai bɨma ichi sõne k'ɨ̃risia bɨ jĩra. Teaemaa bɨdepa teaiwẽa bɨma, mãɨyawẽpɨra teapade a p'anɨ k'orea teaiwẽa bɨma. Chi arapá bɨdepa tea bɨt'a Tachi Ak'õrepa k'ɨ̃ria bɨma. 8Piarã Tachi Ak'õrepa nejõma mãrá minachia p'ue teaipɨ. Mãɨya ewaricha ne ãareaɨne mãrapa uru p'ananai p'anɨt'a piarã uru p'ananaipɨ mãɨnepa nejõma pia oodai k'orea. 9Tachi Ak'õre pedeade nãɨya bɨ bɨma:
«Ichia jedaside chi nenea k'edea waibɨa teasima. Ewaricha ichia jĩp'a ooparima».#Salmo 112:9.
10Tachi Ak'õrepa net'a tau teaparima uudamẽrá. Nek'odai k'orea pida teaparima. Net'a tau uudamẽrá minachia tearu jĩra, ichia nejõma minachia mãrá teaipɨ waapẽarã minachia k'aripadamẽrá. Mãɨne jĩp'a oo p'anɨnepa nepia chok'ará ununaipɨ chi ne uuda minachia chaupari jĩra. 11Piarã Tachi Ak'õrepa mãrá nejõma minachia teaipɨ waapẽarã sõpiadepa p'ue k'aripadamẽrá. Maapae mãrapa tai ome erreara tea peeuta k'orea ũpẽarãpa Tachi Ak'õrea sõpia bɨade adaipɨ. 12Mãrapa erreara teautapa abapuru k'aripawẽma chi ũpẽarã nenea p'anɨpa uru p'ananamẽrá, mãɨpari mãɨ k'orea ãchia Tachi Ak'õrea minachia pia bɨade a p'ananaipɨ. 13Mãrapa k'aripa p'anɨnepa unupi p'anɨma chi pedea pia Cristo k'orea piarã ĩjãa p'anɨt'a. Sõpiadepa chi ũpẽarã́ tea p'anɨma mãɨnepa jõmãɨrã k'aripa p'anɨma. Mãɨ k'orea Tachi Ak'õrea pia pedeadaipɨ. 14Tachi Ak'õrepa ichi sõpiadepa mãra minachia k'aripasima ãchi k'aripadamẽrá. Mãɨpuru ãchia mãra minachia k'ɨ̃ria p'anɨnepa Tachi Ak'õrea mãra k'orea ɨt'aa chiidi p'ananaipɨ. 15Piarã Tachi Ak'õrepa mãɨ teada k'orea tachia Tachi Ak'õrea sõpia bɨade adai p'anɨma. Mãɨ teada atepe piipará bɨ pẽra tachia p'ue k'awa jaradawẽma sãmaasã́ bɨt'a.
Currently Selected:
2 Corintio 9: tdc
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
