2 Corintio 8
8
Ũpẽarãpa sõpiadepa erreara teadada
1Mãɨ awara ũpẽarã, taipa k'awapii k'ɨ̃ria p'anɨma Tachi Ak'õrepa ichi sõpiadepa ũpẽarã Macedonia tuadepema k'aripa bɨt'a. 2Ãchi minachia mĩa p'anɨmina arapá p'anɨma. Nenea p'anɨmina arapaapa erreara minachia teasidama. 3Mɨa jararuma: ãchia erreara jitapata jĩra sõpiadepa teasidama. Mãɨnepa ãchia p'ue teadai p'anana wãyá teasidama. 4Taiyá minachia chichupuria idisidama ãchia pida ũpẽarã Jerusalenepemarã k'aripadai k'orea. 5Mãɨne ãchia abapuru taipa k'ɨ̃risia p'anana jĩra oodaé pasima. Mãɨpari naa ara ãchit'u teasidama Tachi Chiparipa k'ɨ̃ria bɨ jĩra oodai k'orea. Mãɨ ɨ̃ari taipa jaradada oosidama. Mãɨya Tachi Ak'õrepa k'ɨ̃ria bɨ jĩra arí oosidama.
6Mãɨ k'orea taipa Titoa chichupuria idisidama mãrá jarade wãmẽrá jõma mãrapa sõpiadepa teadayade adada piarã jɨrɨp'edamẽrá. 7Mãrapa ne ãareaɨne minachia pia oo p'anɨma: Jesude minachia ĩjãa p'anɨma, minachia pedea k'awa p'anɨma, Tachi Ak'õrenepa minachia ne k'awa p'anɨma, Tachi Ak'õrepa k'ɨ̃ria bɨ jĩra minachia oo k'ɨ̃ria p'anɨma mãɨnepa tai minachia k'ɨ̃ria p'anɨma. Mãɨpuru mãrapa machi sõpiadepa erreara jɨrɨp'e p'anɨ minachia teat'ɨ.
8Mɨa mãɨ oopadade awẽa bɨma, mãɨpari mɨa k'ɨ̃ria bɨma mãrapa unupidait'a ũpẽarã piarã k'ɨ̃ria p'anɨt'a. Mãɨ k'orea mɨa mãrá k'awapi bɨma sãmaasã́ waapẽarãpa erreara ũpẽarã Jerusalenepema pae jɨrɨp'e p'anɨt'a. 9Mãrapa minachia k'awa p'anɨma Tachi Chipari Jesucristopa ichi sõpiadepa oodat'a. Ichi pajãne nejõma uru bɨmina, mãra pae nãɨ k'ak'uade nenea bɨ jĩra basima mãrapa nejõma Tachi Ak'õrepa tea bɨdepema uru p'ananamẽrá.
10Mɨmá mãrapa nãɨya oodaipɨra pia p'ananaipɨ: mãɨ warí ãyo paside, mãrapuru waapẽarã k'aepẽra naa erreara jɨrɨp'e p'aneesidama mãɨnepa mãɨya oo k'ɨ̃riasidama. 11Mãrapa naa erreara jɨrɨp'e p'anasidaɨde sõpiadepa mãɨya oo p'anasidama. Ara mãɨ jĩra mãrapa sõpiadepa teadayade adada jõma mãɨya teat'ɨ. Mãracha p'ue teadai p'anɨt'u teat'ɨ. 12Piarã abaɨpa p'ue tearu jĩra sõpiadepa teaipɨra, mãɨ teada Tachi Ak'õrepa pia unuipɨ. Abaɨpa ne teai newẽa bɨpɨra, Tachi Ak'õrepa teapade ak'ama.
13Mɨa mãɨya jarawẽa bɨma waapẽarã k'aripa p'anɨnepa mãra minachia mĩanamẽrá. Mãɨpari mɨa k'ɨ̃ria bɨma abarik'a chi k'aripadamẽrá. 14Mɨa jara bɨma idiapae mãrapa minachia uru p'anɨ pẽra ũpẽarã k'aripadai p'anɨ. Ara mãɨ jĩra mãra newẽa p'anɨne ãchia minachia uru p'anɨnepemanepa mãra k'aripadai p'anɨma. Mãɨya jõmãɨrã abarik'a chi k'aripa p'ananaipɨ. 15Tachi Ak'õre pedeade nãɨya jara bɨma: «Chi waibɨa jɨrɨp'edapa minachia uru baé pasima mãɨnepa chi ãpia jɨrɨp'edapa newẽaé pasima».#Éxodo 16:18.
Pablopa Tito Corinto p'uurudea peeda
16Mɨa Tachi Ak'õrea sõpia bɨade aparima. Ichia ũpẽa Tito sõne bɨsima mãra k'ɨ̃ria bamẽrá mɨa mãra k'ɨ̃ria bɨ jĩra. 17Taipa ichiá jarasidama mãra ak'ɨde wãmẽrá. Ara mãɨya ichi wã k'ɨ̃ria bada pẽra, wãsima. 18Ichi ome taipa ũpẽa aba peeutama. Mãɨ ũpẽapa chi pedea pia Cristo k'orea k'aripa jaratea nipapari pẽra ũpẽarã p'uuru bechadepemarãpa ichi k'orea pia pedeapatama. 19Mãɨ awara ũpẽarã p'uuru bechadepemarãpa ichi jɨrɨ atasidama tai ome erreara ũpẽarã pae jɨrɨp'edada Jerusalenea teade wãmẽrá. Mãɨ taipa oo p'anɨma ũpẽarãpa Tachi Chiparia pia pedeadamẽrá mãɨnepa taipa piarã k'aripa k'ɨ̃ria p'anɨt'a ak'ɨpidai k'orea.#8:19 Taipa piarã k'aripa k'ɨ̃ria p'anɨ. Griego pedeade chi eda waapẽarã k'art'ade nãɨya bɨ bɨma: Mãrapa piarã k'aripa k'ɨ̃ria p'anɨma. 20Taipa jĩrak'aua oo p'anɨma mãɨ erreara waibɨa jɨrɨp'edada ateeutade mi ãpia pida k'achia pedeapidaemaapa. 21Piarã taipa Tachi Chipari k'ĩrari mãɨnepa ẽpẽrarã k'ĩrari jĩp'a oo k'ɨ̃ria p'anɨma.
22Mãɨ ũpẽarã ume p'anɨ mãramá wãutade abaɨ ũpẽa ãchi ome peedaipɨ. Mãɨ ũpẽapa ewaricha taiyá unupisima ũpẽarã minachia k'aripa k'ɨ̃ria bɨt'a. Idiapae mãra minachia k'aripa k'ɨ̃ria bɨma mãrapa jĩp'a oodai k'awa bɨ pẽra. 23Abaɨpa Tito k'orea ne idisidara jarat'ɨ ichi mɨ ome p'ɨrrɨaparit'a mãɨnepa mɨ ome mãra t'ãena Tachi Ak'õrepa oo bɨt'a ooparit'a. Abaɨpa waapẽarã ume p'anɨ k'orea ne idisidara jarat'ɨ chi ũpẽarãpa peedaadat'a mãɨnepa ãchi k'orea ẽpẽrarãpa Cristo k'orea pia pedeapatat'a. 24Mãɨ ũpẽarã́ unupit'ɨ mãrapa ãchi piarã k'ɨ̃ria p'anɨt'a. Mãɨya ãchia k'awadaipɨ taipa mãra k'orea pia jaradada piarã pasit'a. Waapẽarã ũpẽarã pida ara mãɨ jĩra k'awadaipɨ.
Currently Selected:
2 Corintio 8: tdc
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
