2 Corintio 7
7
1Ũpẽarã, Tachi Ak'õrepa tachiá mãɨ jõma ooyade ada pẽra nãɨ k'ak'uapa nemietá ooparí mãɨnepa tachi k'ɨ̃risiadepa nemietá k'ɨ̃risiaparí jõma itu bɨdai p'anɨma. Tachi Ak'õre minachia wap'ea p'anɨnepa ichi pae pia p'ananai p'anɨma.
Pablo Corintodepemarã ũpẽarã k'orea arapá bada
2Sõnepa tai k'ɨ̃riat'ɨ. Taipa abaɨ sida mietá oodawẽa p'anɨma, mi ãpia pida nemietá k'ɨ̃risiapidaemaa p'anɨma mãɨnepa seadawẽa p'anɨma. 3Mɨa mãɨ jarawẽa bɨma mãra k'orea k'achia pedeai k'orea. Mɨa naena jarasima taipa mãra sõnepa k'ɨ̃ria p'anɨ. Mãɨnepa mãra ome ará p'anɨne wa piuutade, mãɨya k'ɨ̃ria p'ananaipɨ. 4Mɨa mãrá piarã pedea bɨma mãɨnepa mãra k'orea mɨ arapá bɨma. Tai minachia mĩa p'anɨne mɨ mãra k'orea sõpia baparima mãɨnepa minachia arapá baparima.
5Macedonia tuadea chesidaɨde tai p'ue ɨ̃apaadawẽa p'anasidama, mãɨpari ne ãareaɨne minachia mĩa p'anasidama. Ẽpẽrarã tai ome k'ĩruu pedeapachidama mãɨnepa tai ne wap'ea nipapachidama. 6Maamina Tito cheside tai sõpiasidama Tachi Ak'õrepa chi k'ĩra piawẽa be sõpiapipari pẽra. 7Tai abapuru ichi cheda k'orea sõpia p'aneenaé pasima, mãɨpari mãra k'orea sõpia p'aneesidama. Ichia jarasima mãra ome baside mãrapa ichi sõpiapisidama. Mãɨ awara nepɨrɨsima mãrapa tai ununayá p'anɨt'a, nemietá oodada k'orea sõp'uapa jẽa p'anɨt'a, mãɨnepa k'ɨ̃rianepa mɨ k'ɨ̃risia p'anɨt'a. Mãɨ k'orea mɨ minachia arapá beesima.
8Mɨa k'art'a naena bɨdapa mãra sõp'uapidamina mɨ sõp'uawẽa bɨma. Piarã naena mɨ sõp'ua basima. K'awasima mãra tãaraawẽa sõp'ua p'ananamina mãɨ k'art'adepa mãra sõp'uapisit'a. 9Maamina naapae mɨ arapá bɨma. Arapá bɨwẽma mãra sõp'uapida pẽra, mãɨpari arapá bɨma mãrapa nemietá oo p'anana sõp'uadepa itu bɨdak'ari mãicha Tachi Ak'õremá chesida pẽra. Piarã Tachi Ak'õrepa k'ɨ̃ria bɨ jĩra mãra sõp'ua p'anasidama. Mãɨya taipa ɨtɨadada k'orea mãra piawẽa p'aneenaé pasima. 10Abaɨpa ichi nemietá ooda k'orea Tachi Ak'õrepa k'ɨ̃ria bɨ jĩra sõp'ua beeipɨra, ichia nemietá ooda itu bɨk'ari Tachi Ak'õremá cheipɨ. Maapae Tachi Ak'õrepa ichi k'aripaipɨ. Tachi Ak'õre ome pia beeda pẽra mãɨ sõp'ua beei k'orea piawẽa k'ɨ̃risiak'ama. Maamina abaɨpa nãɨ ĩjũanepemarã sõp'ua p'anapata jĩra sõp'ua beeipɨra, nemietá itu bɨwẽ pẽra piuipɨ.
11Tachi Ak'õrepa k'ɨ̃ria bɨ jĩra mãra sõp'uasida pẽra mãɨ sõp'uapa mãrá jĩp'a k'ɨ̃risiapik'ari jĩp'a oopisima. Mãɨpuru mãrapa jĩp'a oo p'anɨ jõmãɨrã́ k'awapi k'ɨ̃ria p'anɨma. Chi mãɨ ũpẽapa nemietá ooda k'orea mãra k'ĩruusidama mãɨnepa Tachi Ak'õrepa ɨtɨai pada wap'easidama. Mãɨ k'orea chi nemietá ooda ẽpẽra ɨtɨadak'ari ãyá jeret'aasidama. Nejõmane mãrapa unupisidama mãɨ nemietá ooda k'orea nepɨradawẽa p'anɨt'a.#7:11 Chi bee k'art'adepema griego pedeade ichiaba nãɨya bɨ bɨma: mɨ unu k'ɨ̃ria p'anɨma. 12Mɨa mãɨ k'art'a abapuru chi nemietá ooda ẽpẽra ɨtɨai k'orea bɨé pasima. Mãɨnepa chi piawẽa beada ẽpẽra k'aripai k'orea bɨé pasima. Mãɨpari bɨsima mãrapa oo p'anɨnepa Tachi Ak'õre k'ĩrari k'awadamẽrá piarã tai ome p'anɨ. 13Jõma mãɨpa tai sõpiapisima.
Mãɨ awara mãrapa Tito sõpiapisidama. Ichi mãramãɨpa arapá cheda pẽra tai arapaapisima. 14Tito mãramá wãi naena mɨa mãra k'orea ichiá pia jarasima. Mɨa jarada jĩra Titopa unune wãna pẽra mɨ mãra k'orea k'ĩra p'erawẽa bɨma. Jõma taipa mãrá jarateadada piarã pasima. Ara mãɨ jĩra jõma taipa Titoa mãra k'orea pia jaradada piarã pasima. 15Titopa k'ɨ̃risia baparima mãrapa ichia jarada jĩra oosidama mãɨnepa wap'ea p'anɨnepa ichi pia bɨade asidama. Mãɨpuru mãra minachia k'ɨ̃ria bɨma. 16Naapae mɨ sida arapá bɨma. Mɨa k'awa bɨma mãrapa piarã jĩp'a oo p'ananait'a.
Currently Selected:
2 Corintio 7: tdc
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
