2 Corintio 12

Pablopa pajãne ununa

1Mãicha ara mɨchi k'orea pia pedeaipɨ, mãɨpa waapẽarã k'aripak'amina. Tachi Chiparipa mɨá k'ãmok'araa jĩra unupida mãɨnepa k'awapida mɨa jararuma. 2Mɨa Cristode ĩjãaparí ẽpẽra aba k'awa bɨma.#12:2 Pablopa ara ichi k'orea mãɨya jara bɨma. Maamina mẽra jara bɨma ẽpẽrarã́ k'ɨ̃risiapidaemaapa ichi chi atepe bɨade a jara bɨt'a. Catorce ãyo pa baside Tachi Ak'õrepa mãɨ ũpẽa pajãnea ichi bɨmá ateewãsima.#12:2 Pajãnea ichi bɨmá. Griego pedeade nãɨya bɨ bɨma: chi pajã ũpea bɨdea. Chi judiorãmá mãɨ jara bɨma: «Tachi Ak'õre bɨmá». Mɨa atua bɨma Tachi Ak'õrepa ichi k'ak'uat'u ateewã basit'a wa abapuru ichi jaoret'a ateewã basit'a. Tachi Ak'õrepuru mãɨ k'awa bɨma. 3-4Maamina mɨa k'awa bɨma Tachi Ak'õrepa mãɨ ũpẽa ichi pajã pia bɨmá ateewã basit'a. Mãma mãɨ ũpẽapa ũrisima pedea pia bɨt'a tachia p'ue k'awa jaradawẽa mãɨnepa nãɨ ĩjũane p'ue jaradak'á p'anɨt'a. Piarã mɨa atua bɨma Tachi Ak'õrepa ichi k'ak'uat'u ateewã basit'a wa abapuru ichi jaoret'a ateewã basit'a. Tachi Ak'õrepuru mãɨ k'awa bɨma. 5Mãɨ ũpẽa k'orea mɨa pia pedearuma, maamina ara mɨchi k'orea pia pedeaiwẽma. Abapuru mɨ ɨbɨwẽa bɨ k'orea pia pedeaipɨ. 6Piarã ara mɨchi k'orea pia pedea k'ɨ̃ria bɨpara mɨ k'ɨ̃risia newẽa bɨ jĩra pedeaé pasima, chi piarã pedea pedeai pasi pẽra. Maamina mɨa mãɨya pedeawẽma mi ãpia pida mɨ pia bɨt'a k'ɨ̃risiapidaemaapa. Mãɨpari mɨa k'ɨ̃ria bɨma mãrapa mɨ k'orea arí k'ɨ̃risiadait'a mɨa oo bɨt'a unu p'anɨ pẽra mãɨnepa mɨa jaratea bɨt'a ũri p'anɨ pẽra.

7Tachi Ak'õrepa mɨá pajãne unupida minachia atepe piipará basima. Maamina ara mɨchi k'orea minachia pia k'ɨ̃risiapiemaapa mɨ p'uapisima, ɨɨrɨpa su nɨbɨ jĩra. Tiorepa peedapa mãɨya ooparima. 8Mɨa bari k'ak'o ũpea Tachi Chiparia chichupuria idisima mãɨ p'ua jõpimẽrá. 9Maamina ichia jarasima: «Mɨ sõpiadepa pɨ k'aripaipɨ jõma choa bamẽrá. Pɨ ɨbɨwẽa bɨde, mɨ jua chaarea atepe ɨbɨa baparima». Mɨ ɨbɨwẽa bɨde Cristo chaarea bapari pẽra mɨ ɨbɨwẽa bɨ k'orea arapaadepa pia pedeaipɨ. 10Cristo k'orea minachia mĩa bɨde, ɨbɨwẽa bɨde, nenea bɨde, ẽpẽrarãpa k'achia pedea p'anɨne mãɨnepa piawẽa oodai k'orea ẽp'ẽ p'anɨne mɨ arapá bɨma. Piarã mɨ ɨbɨwẽa bɨde Cristodepa chaarea bɨma.

Corintodepema ũpẽarã Pablopa k'ɨ̃risia bada

11Mɨ k'ɨ̃risia newẽa bɨ jĩra ara mɨchi k'orea pia pedea bɨma, maamina mãrapuru mɨ mãɨya pedeapisidama. Mãrapa mɨ k'orea pia pedeadai p'anɨmina pia pedeadawẽa p'anɨma. K'ɨ̃risia p'anɨma jãɨrã Jesucristopa peedaɨrã apataɨrã chi atepe p'anɨt'a. Mɨ chi atepewẽmina ãchi k'aepẽra k'aepea bɨwẽma. 12Mɨ mãra t'ãena baside jõma oosima, Jesucristopa peedaɨrãpa oopata jĩra. Ãarea choa basima mãɨnepa ẽpẽerãpa ne p'ue oodak'apɨ́ waibɨa be oopachima. 13¿Mɨa k'ãrenepa mãra piawẽa oosima p'uuru awaraɨdepema ũpẽarã k'aepẽra? ¿Abapuru mɨa mãra juadepema ne idiwẽ pẽra mãɨya k'ɨ̃risia p'anɨk'ãra? Mãɨya bɨpɨra ¡mãɨ piawẽa ooda mɨ chupuria k'ɨ̃risia atuat'ɨ!

14Mɨ mãramá wãi k'orea bɨma. Nãɨpa bari k'ak'o ũpea paipɨ. Maamina mɨa idiwẽma mãrapa k'aripadamẽrá. Mãrapa uru be jɨrɨ bɨwẽma, mãɨpari mãrat'u k'ɨ̃ria bɨma. Warra chak'erãpa ne yaadak'ama ãchi ak'õrea mãɨnepa naea ne teadai k'orea, mãɨpari chi ak'õrerãpa ne yaapatama ãchi warrarã́ teadai k'orea. 15Ara mɨ mãɨnepa jõma mɨa uru bɨt'a arapá teaipɨ mãra k'aripai k'orea. Mɨ ãpia k'ɨ̃ria p'anɨmina, mɨa mãra atepe k'ɨ̃riapodoipɨ.

16Mãrapa k'awa p'anɨma mɨa mãra erreara mi ãpia pida idié pasit'a. Maamina chi jarautamá mɨ k'ɨ̃risia k'awaadepa mãra seasit'a erreara jitai k'orea. 17Mɨa ũpẽarã peeside ¿ãchidepa mãra seasidak'ãra erreara jitai k'orea? 18Mɨa Titoa chichupuria idisima mãra ak'ɨde wãmẽrá. Waapẽarã ũpẽa sida ichi ome peesima. Ãchi wãsidaɨde ¿Titopa mãra seasik'ãra erreara jitai k'orea? ¿Taipa abarik'a k'ɨ̃risia uru p'ananaé pasik'ãra? ¿Ara mãɨ jĩra nipadaé pasik'ãra?

19¿Mãramá taipa mãɨya jara p'anɨk'ãra tai k'orea piawẽa k'ɨ̃risiapidaemaapa? Mãɨyawẽma. Ũpẽarã, tai Cristoderã pẽra Tachi Ak'õre k'ĩrari jõma mãɨ jara p'anɨma mãrapa pia ĩjãanamẽrá. 20Mɨa wap'ea bɨma mãramá wãk'ari mãra unuiwẽma mɨa k'ɨ̃ria bɨ jĩra. ¡Mãɨnepa mãrapa mɨ ununaiwẽma mãrapa k'ɨ̃ria p'anɨ jĩra, mãra ɨtɨai bɨdeepuru! Piarã mɨa wap'ea bɨma mãramá wãrune, unuipɨ mãra k'ĩruu pedea p'anɨt'a, waapẽarãpa ne uru be k'orea piawẽa p'anɨt'a, k'ĩruu p'anɨt'a, ara machi pia p'ananai k'orea jɨrɨ p'anɨt'a, waapẽarã k'orea k'achia pedea p'anɨt'a, waapẽarã k'orea sea jara p'anɨt'a, chi atepe bɨ jĩra k'ɨ̃risia p'anɨt'a mãɨnepa k'ĩruupik'a para p'anɨt'a. 21Mɨa wap'ea bɨma mãramá mãicha cherude Tachi Ak'õrepa mɨ mãra k'orea k'ĩra p'erapiit'a. Mãɨne chok'ará mãrapa naena nemietá oo p'anana wapida oo p'anɨ pẽra mɨ jẽaipɨ. Mãrapa chi Tachi Ak'õremá piawẽa oopataɨ, awaraɨ ome k'ãipataɨ mãɨnepa waapẽarã taade ne k'ĩra p'era oopataɨ wapida mãɨ itu bɨdawẽa p'anɨ pẽra jẽaipɨ.

Currently Selected:

2 Corintio 12: tdc

Highlight

Copy

Compare