Filipenses 4

1Maud̶eeba mʉ ãbarã, mʉʉba jarad̶a kĩra Dachi Mechiud̶e ãrea ijãa panásturu. Mʉʉba machi ãrea kʉ̃ria b̶uu maud̶e unu kʉ̃ria b̶uu. Machi kakua, mʉ ãrea kĩrajʉʉ b̶uu. Machi mʉ kĩrajʉʉbibadaubʉ.#4:1 Machi mʉ kĩrajʉʉbibadaubʉ. Griego bed̶ead̶e naka b̶ʉ kub̶uu: machi mʉ boro jũrabʉ.

Pabloba ãbarãmaa waubiad̶a

2Mʉʉba neekau Evodiamaa maud̶e neekau Sintiquemaa chi chuburia id̶iiruu chiya berread̶amera, Dachi Mechiu Jesucristo ome panuud̶eeba. 3Maud̶e bichi, chi mʉ ome Dachi Akõre traju waubarii, mʉʉba bichimaa id̶iiruu mau neekaurã aid̶amera. Ãchi Clemente baara maud̶e waabenarã sid̶a mʉ ome ãrea trajasid̶au chi bed̶ea bia Cristo ʉ̃rʉbena kuitaabiad̶ai baita. Joma ãchi trʉ̃ Dachi Akõreba chi ewaricha chokae duanabarii kartad̶e b̶ʉ uru b̶uu.

4Dachi Mechiu Jesucristo ome panuud̶eeba ewaricha kĩrajʉʉ panásturu. Mʉʉba waya jaraaruu: ¡Kĩrajʉʉ panásturu! 5Machi ẽbẽrarã bia nuree, jomaurãmaa unubiásturu. Dachi Mechiu neei ewari ʉ̃rʉ ba b̶uu.

6Barikia kakua ãrea jirukaraarã́sturu, maumaarã Dachi Akõremaa ʉtaa id̶ísturu, ichimaa chi chuburia id̶ísturu, maud̶e ne joma ʉ̃rʉbena ichíturu kid̶ibai ásturu. 7Mauba Dachi Akõreba machi sõ maud̶e machi kʉ̃risia jirukaraayuwãe duanubiai Jesucristo ome panuud̶eeba. Mau jirukaraayuwãe panad̶ai ẽbẽrarãba ãchi du ab̶a poyaa kauwa kuitaad̶aabai.

8Mau awara ãbarã, joma chi biawãra ʉ̃rʉbena, ne joma dachiba biꞌia b̶uu unubadau ʉ̃rʉbena, joma jipa b̶uu ʉ̃rʉbena, joma kachiruaswãe b̶uu ʉ̃rʉbena, jomaurãba kʉ̃riabadau ʉ̃rʉbena, joma biꞌia trʉ̃ poa b̶uu ʉ̃rʉbena, ne joma biꞌia ʉ̃rʉbena maud̶e ne joma dachiba biꞌia jarabadau ʉ̃rʉbena kʉ̃risia panásturu. 9Mʉʉba jaradead̶a, machiba mʉʉd̶eeba kuitaaped̶aad̶a, mʉʉd̶eeba ũriped̶aad̶a maud̶e unuped̶aad̶a joma wau panásturu. Maud̶e Dachi Akõre machi ome b̶uai maud̶e machi jirukaraayuwãe duanubiai.

Ãbarãba ne urubʉiped̶aad̶a ʉ̃rʉbena Pabloba ãchíturu kid̶ibai ad̶a

10Dachi Mechiud̶eeba mʉ ãrea kĩrajʉʉ b̶uu, machiba mʉ ʉ̃rʉbena kʉ̃risiasid̶aud̶e waya ne urubʉisid̶aud̶eeba. Mau machiba naed̶e wau kʉ̃ria panasmina poyaa waud̶aabasii. 11Maka jarawẽa b̶uu mʉ ne wãꞌãe b̶uud̶eeba. Mʉʉba kuitaasii saka jirukaraayuwãe b̶uai chi mʉʉba uru b̶uud̶eeba. 12Chi nejarr barauwãe b̶uud̶e maud̶e ãrea uru b̶uud̶e saka b̶uai kuitaa b̶uu. Mʉʉba kuitaasii barikiad̶e saka jirukaraayuwãe b̶uai, b̶i jãwaa b̶uud̶e maud̶e jarrbisia b̶uud̶e; ãrea uru b̶uud̶e maud̶e ne wãꞌãe b̶uud̶e. 13Cristod̶eeba joma poyaa waui, ichiba mʉʉmaa meserãa b̶uabiiruud̶eeba. 14Maamina mʉʉba machíturu kid̶ibai aaruu, mʉ ãrea biꞌiwãe b̶uud̶e aid̶asid̶aud̶eeba. Biawãra machiba biꞌia wausid̶au.

15Ãbarã Filipod̶ebenarã, machiba kuitaa panuu chi bed̶ea bia Cristo ʉ̃rʉbena arab̶aed̶eed̶e ijãasid̶aud̶e, mʉ Macedonia druad̶ebena wãsiid̶e waabenarã ãbarã puurud̶ebenarãba mʉ baita ne urubʉid̶aabasii. Machiaburu mʉ baita makasid̶au.#Hechos 18:5. 16Mʉ Tesalónica puurud̶e b̶uasiid̶e machiba b̶es ãrea urubʉisid̶au mʉ aid̶ad̶ai baita. 17Mʉʉba id̶iwẽa b̶uu machiba ne urubʉid̶amera, maumaarã kʉ̃ria b̶uu biꞌia wau panuud̶eeba Dachi Akõreba machi biꞌia aid̶ai. 18Ne joma machiba ãba Epafrodito ome urubʉiped̶aad̶a mʉʉba adausii. Maud̶eeba ãrea uru b̶uu. Mauba mʉ biꞌia b̶uai. Machiba urubʉiped̶aad̶a chi kera tuwaa Dachi Akõremaa dead̶a kĩra b̶uu. Mau Dachi Akõreba biꞌia unu b̶uu. 19Biawãra joma machiba ne wãꞌãe panuu mʉ Bajãad̶ebena Akõreba ne bia uru b̶uud̶ebena Jesucristod̶eeba deai. 20Maud̶eeba ewaricha Dachi Bajãad̶ebena Akõremaa biꞌia berread̶ai panuu. Biꞌia b̶uu maka b̶uai.

Pabloba nau kartad̶e aanama b̶ʉd̶a

21Joma ẽbẽrarã Dachi Akõred̶erã Jesucristo ome nuree biꞌia panábad̶e a jarásturu. Ãbarã mʉ ome panuurã bid̶a biꞌia panábad̶e a jarabʉi panuu. 22Joma ẽbẽrarã Dachi Akõred̶erã namabenarãba biꞌia panábad̶e a jarabʉi panuu. Ãbarã Romad̶ebena chi aude mechiu nii baita trajabadaurã bid̶a biꞌia maka jarabʉi panuu.

23Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uai.#4:23 Griego bed̶ead̶e chi b̶ee kartad̶e nau sid̶a b̶ʉ kub̶uu: biꞌia b̶uu maka b̶uai.

Currently Selected:

Filipenses 4: cmi

Highlight

Copy

Compare