Filipenses 2

Dachi Akõreba Cristo jomaurã audeara chi mechiu b̶ud̶a

1Cristod̶e kĩrajʉʉ panuud̶eeba, machi kĩrajʉʉbia b̶uu ichiba kʉ̃ria b̶uud̶eeba, Dachi Akõre Jauri machi ome b̶uud̶eeba maud̶e ichi kʉ̃riaba machi kĩra chuburia b̶uud̶eeba, 2mʉ naka ãrea kĩrajʉʉbísturu: arab̶au kʉ̃risia uru panásturu, chiya kʉ̃ria panásturu maud̶e arab̶au kʉ̃risiad̶eeba joma wáusturu. 3Waabenarã audeara biꞌia nuree kʉ̃risia panuud̶eeba ne ab̶a bid̶a waurã́sturu. Maud̶e waurã́sturu machi báitaburu biꞌia nuread̶ai baita. Maumaarã kʉ̃risiásturu waabenarã machi audeara biꞌia nuree. 4Machicha biꞌia nuread̶ai baita jʉrʉrã́sturu, maumaarã jʉrʉ́sturu waabenarã sid̶a biꞌia nuread̶amera. 5Jesucristoba kʉ̃risia b̶uad̶a kĩra kʉ̃risiásturu:

6Ichi Dachi Akõremina, ara Dachi Akõre kĩra arab̶aud̶e b̶uai kʉ̃risiabasii.

7Maumaarã ichi maka nibad̶a ida b̶usii chibari baita bari trajabarii bai baita. Maabae dachi kĩra nau kakuad̶e b̶eesii.

8Makaaruud̶e miichuburi b̶eesii. Dachi Akõreba biui b̶uu asiid̶e ichi makasii. Cruzd̶e ãrea biꞌiwãe b̶uaped̶a biui b̶umina mau makasii.

9Maud̶eeba bajãad̶e Dachi Akõreba ichi chi aude mechiu b̶usii. Ichi jomaurã Mechiu b̶usii.#2:9 Griego bed̶ead̶e naka b̶ʉ kub̶uu: Dachi Akõreba ichimaa chi trʉ̃ mechiu deasii.

10Maka joma bajãad̶e nuree, nau iujãad̶e nuree maud̶e biud̶arã panabadaud̶e nuree Jesús daad̶e õdarrd̶e kopaneed̶ai.

11Maud̶e jomaurãba Jesucristo jomaurã Mechiu a jarad̶ai maud̶e Dachi Bajãad̶ebena Akõremaa biꞌia berread̶ai.

Ãbarã nau iujãad̶e saka nuread̶ai panuu

12Maka mʉ ãbarã chi kʉ̃ria, mʉ machi ome b̶uasiid̶eeba Dachi Akõre bed̶ea jara b̶uu kĩra wau panuu. Jãabae mʉ machi ome b̶uuwãemina Dachi Akõre ãrea wapea panuud̶eeba wau panásturu ichiba machi karibasiid̶eeba. 13Ichiba machi aid̶a b̶uu ichiba kʉ̃ria b̶uu wau panad̶amera maud̶e maka wau kʉ̃ria panad̶amera.

14Waabenarã ʉ̃rʉbena kachirua berread̶awẽa maud̶e oa kachirua berread̶awẽa joma wáusturu. 15Maka machi ʉ̃rʉbena kachirua jarad̶ayuswãe nuread̶ai maud̶e jipa nuread̶ai. Ẽbẽrarã ãrea kachirua waubadau tãed̶e panumina kachiruaswãe panásturu. Dachi Akõre warrarãd̶eeba ãchi tãed̶e ʉtarebena pusterrea ted̶echoabadau kĩra nuree. 16Chi dachi chokae b̶uabiabarii bed̶ea ʉ̃rʉbena ãchimaa arakʉd̶e kuitaabia panásturu. Maka Cristo neeruud̶e mʉ machi kakua kĩrajʉʉi. Maud̶e mʉʉba kuitaai mʉ bari ara jãka nibaabasii maud̶e bari trajaabasii. 17Kãꞌãabariwãed̶e mʉ Cristo kakua bead̶ai panuu. Maka uva b̶aa Dachi Akõremaa ea deabachid̶au kĩra b̶uai.#Números 15:5,6. Ara mau kĩra machiba Cristod̶e ijãa panuu, ãnimara Dachi Akõremaa baa deai kĩra b̶uu.#Levítico 23:18. Maud̶eeba mʉ machi ome ãrea kĩrajʉʉ b̶uu. 18Ara mau kĩra machi sid̶a mʉ ome ãbua kĩrajʉʉ nuread̶ai panuu.

Timoteo maud̶e Epafrodito

19Dachi Mechiu Jesusba kʉ̃riaruubʉrã mʉʉba Timoteo isa machimaa wãbii. Maka ichi waya mʉʉmaa neeruud̶e mʉ sid̶a kĩrajʉʉ b̶uai machi saka panuu kuitaai b̶uud̶eeba. 20Nama mʉ baara ichi kĩra nii wãꞌãe. Ichiba machi biawãra aid̶a kʉ̃ria b̶uu. 21Jomaurãba ara ãchi biꞌia nuread̶ai jʉrʉbadau, Jesucristoba kʉ̃ria b̶uu jʉrʉd̶ai bad̶amaarã. 22Maamina machiba kuitaa panuu Timoteoba biꞌia waubarii. Warrba ichi akõre aid̶abarii kĩra ichiba bed̶ea bia Cristo ʉ̃rʉbena aid̶a jaradea b̶uu. 23Mʉ kãare saka waud̶ai panuu kuitaaruud̶e Timoteo machimaa bʉii kʉ̃risia b̶uu. 24Maamina kʉ̃risia b̶uu Dachi Mechiuba mʉ aid̶ai, kãꞌãabariwãed̶e mʉ sid̶a machimaa wãmera.

25Machiba ãba Epafrodito mʉ aid̶amera bʉisid̶au. Mauba mʉ ome Dachi Akõre bed̶ea jaradea b̶uu kokoroa chĩo b̶uu kĩra. Mʉʉba machimaa ichi waya wãbii. 26Ichiba machi biawãra unu kʉ̃ria b̶uu. Ãrea jirukaraa b̶uu, machiba ichi ẽpermo b̶uu ũrisid̶aud̶eeba. 27Biawãra ichi ẽpermo b̶uasii. Beraa biukausii. Maamina Dachi Akõreba ichi kĩra chuburiasii. Ab̶aburu ichi kĩra chuburiabasii, maumaarã mʉ sid̶a kĩra chuburiasii waya jirukaraa b̶eerãamera. 28Maud̶eeba mʉʉba ichi waya isa wãbi kʉ̃ria b̶uu, machiba ichi unuuduud̶e waya kĩrajʉʉd̶amera. Maka mʉ machi kakua ãrea jirukaraa b̶uabai. 29Kĩrajʉʉ panuud̶eeba ichi biꞌia irsibísturu Dachi Mechiud̶ed̶eeba. Chi ichi kĩra nuree ʉ̃rʉbena biꞌia kʉ̃risiásturu. 30Cristoba waubi b̶uu kakua ichi beraa biukausii. Chi machiba mamauba mʉ baita poyaa waud̶awẽa panuu, ichiba biui adua wausii.

Currently Selected:

Filipenses 2: cmi

Highlight

Copy

Compare