Filipenses 1

Pabloba nau kartad̶e naa b̶ʉd̶a

1Mʉ Pablobʉ. Timoteo mʉ ome b̶uu. Dai Jesucristo baita bari trajabadaurãbʉ. Mʉʉba nau karta ãbarã Filipos puurud̶ebenarã baita b̶ʉʉruu: ijãabadaurã nubadaurã, ijãabadaurã aid̶abadaurã, joma ẽbẽrarã Dachi Akõred̶erã Jesucristo ome nureerã baita.#1:1 Ijãabadaurã nubadaurã. Kajuma bed̶ead̶e «pastores» maebʉrã «ancianos» abadau. Ijãabadaurã aid̶abadaurã. Kajuma bed̶ead̶e «diáconos» abadau. 2Daiba kʉ̃ria panuu Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi aid̶a panad̶ai maud̶e ãchi jirukaraayuwãe panabiad̶ai.

Pabloba ãbarã baita Dachi Akõremaa ʉtaa id̶id̶a

3Mʉʉba machi kĩrabaaruucha Dachi Akõremaa ichíturu kid̶ibai abarii. 4Dachi Akõremaa ʉtaa id̶iiruucha mʉʉba machi baita kĩrajʉʉ ʉtaa id̶ibarii, 5machiba ichi bed̶ea ijãaped̶aad̶ad̶eed̶ebena mʉ aid̶a panuud̶eeba, chi bed̶ea bia Cristo ʉ̃rʉbena jaradeai baita. 6Mʉʉba nau biawãra kuitaa b̶uu: Dachi Akõreba chi machi sõd̶e traju biꞌia waud̶a biꞌia kãrii ab̶a Jesucristo neeruud̶aa. Maud̶e ichiba machi joma biꞌia ua b̶uai. 7Biꞌia b̶uu mʉʉba joma machi ʉ̃rʉbena maka kʉ̃risia b̶uai, machi ãrea kʉ̃ria b̶uud̶eeba. Mʉ jʉ̃a b̶uud̶e maebʉrã chi bed̶ea bia Cristo ʉ̃rʉbena biawãra kuitaabi b̶uud̶e Dachi Akõreba ichi sõbiad̶eeba machi maud̶e mʉ sid̶a aid̶a b̶uu ichi bed̶ea jaradea panad̶amera. 8Dachi Akõreba kuitaa b̶uu mʉʉba Jesucristo ãrea kʉ̃ria b̶uud̶eeba joma machi sid̶a ãrea kʉ̃riakua b̶uu.

9Mʉʉba Dachi Akõremaa ʉtaa id̶i b̶uu machi ãrea chiya kʉ̃ria nuread̶amera, ichi biꞌia kuitaad̶amera maud̶e saka nibad̶ai panuu kuitaad̶amera. 10Maka machiba ãrea kuitaad̶ai kãare biꞌia b̶uu maud̶e Cristo neeruud̶e ichi daad̶e kachiruaswãe nuread̶ai maud̶e machi ʉ̃rʉbena kachirua jarad̶ayuswãe nuread̶ai. 11Mʉʉba ʉtaa id̶i b̶uu machi Jesucristod̶eeba ne jomad̶e jipa nuread̶amera. Maka ẽbẽrarãba Dachi Akõre chi mechiu nii ad̶ai maud̶e ichimaa biꞌia berread̶ai.

Ne jomad̶e Pablo Cristo baita b̶uu

12Ãbarã, mʉʉba machimaa kuitaabiai kʉ̃ria b̶uu mʉ chi makad̶aba aid̶a b̶uu ẽbẽrarãba chi bed̶ea bia Cristo ʉ̃rʉbena ijãad̶amera. 13Romad̶ebena jaradea ua b̶uabarii de nubadau kokoroarãba maud̶e waabenarãba kuitaa panuu mʉ Cristo kakua jʉ̃a b̶uu. 14Maud̶eeba ãrea ãbarãba Dachi Mechiud̶eeba Dachi Akõre bed̶ea wapeawẽa jara nibabadau.

15Biawãra chi nuree mʉ ome kĩra kachirua panuud̶eeba, maarãba jarabadau Cristo ʉ̃rʉbena mʉ audeara kuitaa panuu ad̶ai baita. Maamina waabenarãba kʉ̃risia biad̶eeba jarabadau. 16-17Maarãba kʉ̃riad̶eeba maka waubadau. Kuitaa panuu Dachi Akõreba mʉ nama b̶usii chi bed̶ea bia Cristo ʉ̃rʉbena biawãra arakʉd̶e kuitaabiamera. Maamina chi nureerãba Cristo ʉ̃rʉbena jara nibabadau ãrea kuitaa nuree kʉ̃risia panuud̶eeba. Kʉ̃risia biad̶eeba maka waud̶akau. Kʉ̃risia panuu maka mʉ nama jʉ̃a b̶uud̶e aude kĩra nomaabid̶ai. 18Maamina ¿mau sakaima? Kʉ̃risia biad̶eeba maebʉrã kʉ̃risia kachiruad̶eeba jara nibaaduubʉrã, Cristo ʉ̃rʉbena jara panuu. Maud̶eeba mʉ kĩrajʉʉ b̶uu.

Maud̶e kĩrajʉʉ b̶uai 19mʉʉba kuitaa b̶uud̶eeba mʉ namabena awara wãaruu, machiba Dachi Akõremaa ʉtaa id̶i panuud̶eeba maud̶e Jesucristoba dead̶a Jauriba aid̶a b̶uud̶eeba. 20Cristo kakua mʉ ne ab̶a bid̶a nejasiai kʉ̃riawẽa b̶uu, maumaarã ichi ʉ̃rʉbena berreai baita kĩra nejasiaswãe b̶uai kʉ̃ria b̶uu. Maka mʉʉba jomaurãmaa Cristo chi mechiu nii kuitaabiai, ewaricha wau b̶uabarii kĩra. Chokae b̶eeruubʉrã maebʉrã biuruubʉrã, mʉʉba kʉ̃ria b̶uu jomaurãba mʉʉd̶eeba kuitaad̶ai Cristo chi mechiu nii. 21Mʉʉmaarã, mʉ chokae b̶uud̶e Cristo baita b̶uai, maamina biuruubʉrã aude biꞌia b̶uai. 22Mʉ chokae b̶uud̶e Cristo ʉ̃rʉbena poyaa jaradea b̶uai. Maud̶eeba mʉʉba adua b̶uu kãare kʉ̃ria b̶uu, chokae b̶uai maebʉrã biui. 23Chaarea b̶uu jarai baita mau omed̶ebena sãu aude biꞌia b̶uu. Mʉʉmaarã biꞌia b̶uu biui, Cristo ome b̶uai baita. 24Maamina machi baita biꞌia b̶uu mʉ chokae b̶uai. 25Maud̶eeba kuitaa b̶uu machi aid̶ai baita mʉ wabid̶a chokae b̶uai maud̶e waya machi ome ãbua b̶uai. Maka machiba Cristod̶e biꞌia ijãa panuud̶eeba kĩrajʉʉ panad̶ai. 26Jesucristoba mʉ waya machimaa adoeruud̶e machi ichi kakua biꞌia kĩrajʉʉd̶aped̶a biꞌia jarad̶ai.

27Jipa nibásturu chi bed̶ea bia Cristo ʉ̃rʉbena jara b̶uu kĩra. Makarã mʉʉba machi ichiad̶e wãaruubʉrã, maebʉrã machi ome b̶uuwãed̶e machi ʉ̃rʉbena ũriiruubʉrã, kuitaai machiba arab̶au kʉ̃risiad̶eeba ãbua ãrea ijãa panuu maud̶e ãbua ãrea traja panuu mau bed̶ea bia kuitaabid̶ai baita. 28Machi kĩramaabadau ab̶a bid̶a wapearã́sturu. Mauba kuitaabii Dachi Akõreba ãchi baribai, maamina machi karibai. Mau Dachi Akõreba joma wau b̶uu. 29Ichi biad̶eeba machi iubasii ab̶aburu Cristod̶e ijãa panad̶amera, maumaarã iusii Cristo kakua ãrea biꞌiwãe panad̶amera. 30Machiba unusid̶au mʉ ãrea biꞌiwãe b̶uud̶e dauchia jãadua b̶uad̶a maud̶e jãabae ũri panuu wabid̶a dauchia jãadua b̶uu.#Hechos 16:11-40. Ara mau kĩra machi sid̶a ãrea dauchia jãadua panuu.

Currently Selected:

Filipenses 1: cmi

Highlight

Copy

Compare