Efesios 6

Warrarã akõrerã ome saka nuread̶ai panuu

1Warrarã, machi akõrerã bed̶ea ũribaba ũrísturu Dachi Mechiuba kʉ̃ria b̶uu kĩra, maka jipa b̶uud̶eeba. 2Moisesba b̶ʉd̶ad̶e naka jara b̶uu: «Machi akõre maud̶e machi nawe wapea panásturu».#Éxodo 20:12. Dachi Akõreba naed̶e naka aid̶ai a b̶uasii: 3Maka wauduubʉrã, «Machi nau druad̶e ewari ãrea biꞌia duanad̶ai».#Deuteronomio 5:16.

4Akõrerã, machi warrarã kĩrubiarã́sturu. Maumaarã biꞌia jaradea panuud̶eeba maud̶e jipa waubia panuud̶eeba Dachi Mechiuba kʉ̃ria b̶uu kĩra waribiásturu.

Chi chibari baita bari trajabadaurã ãchi chibari ome saka nuread̶ai panuu

5Chibari baita bari trajabadaurã, machi chi nau iujãad̶ebena chibari wapea panuud̶eeba, ichiba jaraaruu machi sõd̶eeba joma wáusturu Cristo bed̶ea ijãa panuu kĩra. 6Ichiba ichia b̶uud̶éburu maka waurã́sturu, ichi ome biꞌia nuread̶ai baita. Maumaarã sõd̶eeba wáusturu, machi Cristo baita bari trajabadaurãd̶eeba. Dachi Akõreba maka kʉ̃ria b̶uu. 7Machi chibariba jara b̶uu waumaa panuud̶e, sõbiad̶eeba wáusturu Dachi Mechiu baita wau panuu kĩra. Kʉ̃risiarã́sturu nau iujãad̶ebena chibari báitaburu maka traja panuu. 8Machiba kuitaa panuu chibari baita bari trajabariibʉrã maebʉrã chibariswãe niibʉrã, Dachi Mechiuba dachimaa dachicha bajãad̶e deai dachiba wauped̶aad̶a kĩra.

9Ara mau maka, machi chi chibarirã bid̶a chi machi baita bari trajabadaurã biꞌia wáusturu. Ãchi iadaad̶ai arã́sturu. Kĩrabásturu chi maarã Chibari bajãad̶ebena ara machi Chibaribʉ. Ichiba joma arab̶aud̶e ichiabarii.

Kokoroaba ichi kakua ʉ̃rʉ chaarea b̶uu jʉ̃barii ʉ̃rʉbena

10Mau awara ãbarã, Dachi Mechiu ãrea poyaabarii b̶uud̶eeba chaarea nureásturu. 11Chi kokoroaba ichi ʉ̃rʉ chaarea b̶uu jʉ̃barii Dachi Akõreba machimaa dead̶a jʉ̃́sturu, machi chaarea nuread̶ai baita, jʉbawãe niiba setaa kũruarãamera. 12Ẽbẽrarã ome chĩo panuuwãema.#6:12 Ẽbẽrarã ome chĩo panuuwãema. Griego bed̶ead̶e naka b̶ʉ kub̶uu: Kiuru bara nuree ome, oa bara nuree ome chĩo panuuwãema. Maumaarã jai kachiruarã nau iujãa pãriud̶ebenarã ómeburu chĩo panuu. Maarã dachiba unud̶akau chi mechiu nureerãbʉ, chi ʉtarebena jai kachiruarã karrarãbʉ. 13Maud̶eeba chi kokoroaba ichi ʉ̃rʉ chaarea b̶uu jʉ̃barii Dachi Akõreba machimaa dead̶a jʉ̃́sturu. Maka jʉbawãe niiba kachiruad̶e b̶aebii chaaruud̶e machi poyaa dauchia jãadua panad̶ai. Poyaad̶aped̶a ãrea chaarea nuread̶ai.

14Maud̶eeba biawãra bed̶ea ijãa panuud̶eeba chaarea nureásturu, kokoroaba kʉrrd̶e jʉ̃barii jʉ̃ b̶uu kĩra. Jipa nibásturu kachiruad̶e b̶aebiarãad̶amera, kokoroaba ichi kakuad̶e chaarea b̶uu jʉ̃barii kĩra. 15Chi bed̶ea bia Dachi Akõre ome biꞌia b̶uai ʉ̃rʉbena jarad̶e wãd̶ai baita nureásturu, kokoroaba chĩod̶e wãi baita ichi jʉ̃rʉd̶e jʉ̃barii kĩra. 16Mau awara ne jomad̶e Cristod̶e ijãa panásturu, kokoroaba ichi juad̶e adaubarii ad̶u mirubarii kĩra. Jʉbawãe niiba kachiruad̶e b̶aebii chaaruud̶e, enadrʉma aoko b̶uuba drʉʉruu kĩra b̶uu. Maamina machiba Cristod̶e ijãa panuubʉrã, dauchia jãadua panad̶ai chi juad̶e adaubarii ad̶u mirubariiba chi enadrʉma kid̶a aoko b̶uu kiibibarii kĩra. 17Maud̶e sõd̶eeba ãrea kuitásturu Dachi Akõreba machi biawãra karibasii, kokoroaba ichi borod̶e chaarea b̶uu jʉ̃barii kĩra. Mau awara Dachi Akõre bed̶ea ichi Jaurid̶eeba ãrea kuitásturu. Dachi Akõre bed̶ea espada kĩra b̶uu, kachirua ome poyaabariid̶eeba.

18Ewaricha ne joma baita Dachi Akõre Jaurid̶eeba ʉtaa id̶i panásturu. Dau ʉ̃rʉma panuud̶eeba, joma ichi ẽbẽrarã baita kakua ãkaad̶awẽa ʉtaa id̶i panásturu. 19Maud̶e mʉ baita Dachi Akõremaa ʉtaa id̶i panásturu. Ichimaa ʉtaa id̶ísturu mʉʉmaa kuitaabimera saka Cristo ʉ̃rʉbena berreai b̶uu. Maka mʉʉba wapeawẽa ẽbẽrarãmaa kuitaabiai chi bed̶ea bia Cristo ʉ̃rʉbena, Dachi Akõreba naed̶e kuitaabiwẽa b̶uad̶a. 20Cristoba mʉ bʉisii mau bed̶ea jaradeamera. Jaradea b̶uu kakua mʉ jʉ̃a uru panuu. Dachi Akõremaa ʉtaa id̶ísturu mʉʉba mau bed̶ea bia ʉ̃rʉbena wapeawẽa berreai baita mʉʉba maka waui b̶uud̶eeba.

Pabloba nau kartad̶e aanama b̶ʉd̶a

21Dachiba kʉ̃ria panuu ãba Tiquicoba mʉ ʉ̃rʉbena machimaa joma nebʉrʉi kuitaad̶amera mʉ saka b̶uu maud̶e kãare wau b̶uu. Ichi Dachi Mechiu baita ichi kʉ̃ria trajabarii jipa nii, maud̶e ne jomad̶e biꞌia waubarii. 22Mʉʉba ichi machimaa bʉiruu kuitaad̶amera dai saka panuu. Mauba machi kĩrajʉʉbiai.

23Ãbarã, mʉʉba kʉ̃ria b̶uu Dachi Bajãad̶ebena Akõreba maud̶e Dachi Mechiu Jesucristo bid̶a machi aid̶ad̶ai chiya kʉ̃ria panad̶amera maud̶e biꞌia ijãa panad̶amera. Maud̶e mʉʉba kʉ̃ria b̶uu maarãba jirukaraayuwãe panabiad̶ai. 24Mʉʉba kʉ̃ria b̶uu Dachi Akõreba ichi sõbiad̶eeba joma Dachi Mechiu Jesucristo biawãra ãrea kʉ̃ria nuree aid̶a b̶uai. Biꞌia b̶uu maka b̶uai.

Currently Selected:

Efesios 6: cmi

Highlight

Copy

Compare