FILIPHISIYUSI SOKKA BITIMA
BITIMA
Phaawuloosi tenne sokka soyinohu, Roomu gashshooti giddo Meqedooniyaho noohura Filiphisiyusi Katamira noo beetekiristaaneraati. Tini beetekiristaaneno Phaawuloosi Awurophu gobbara balaxe uurrisinote. Tenne sokka borreessinohu, usuru mine hee'reenna wole ammanaasine aanaho ka'usi yannaranna Filiphisiyusi beetekiristaanera kalaqantino so'ronni kainohunni wodanisi dadillinohuraati. Ikkirono, Phaawuloosi Yesuusa Kiristoosa duu're amma'nino daafira, tenne sokka giddo hagiirrisinna wo'ma hexxosi luphi yite leeltanno.
Phaawuloosi tenne sokka borreessinohu qaru coyi, qarru yannara afansha sokke kaa'litinosiriha Filiphisiyusi ammanaasine galata kulateeti. Isono insano addi addi qarri amadinonsaha nafa ikkiro, jawaantenna wo'ma hawaqi'ra heedhannonsa gede kawaanni qole jawaachishannonsa. Boo'nanna aggaxxa agurte Yesuusi Kiristoosi joongilli bati'rannonsa gede duu're qaagiissannonsa; Kiristoosi Yesuusi ledo mitto ikkatenni afidhino heeshsho Maganu eltonni dagginotenna ammanatenni afidhinote ikkinnina Ayihudete Seera agadhatenni dagginota ikkitinokkita qaagiissannonsa. Yesuusi Kiristoosi ledo sumuu yite heedhannori baalaho Maganu aannonsa keerinna hagiirri daafirano borreessannonsa.
Tini sokka hagiirre, addaxxa, mittimmanna amma'nate heeshshonni afi'nanni jawaante xawisse leellishshanno. Hakkunni aanano Phaawuloosi Filiphisiyusi beetekiristaane mageeshshi geeshsha baxannoro leellishate borreessinoonnite.
Maxaafu Amado:
Eote hedo 1:1-11
Phaawuloosi ikkito 1:12-30
Kiristoosinni hee'nanni heeshsho 2:1—2:18
Ximootewoosinna Ephafirodutisi daafira hedino hedo 2:19-30
Hettisaanonna kaphu roso 3:1—4:9
Phaawuloosi Filiphisiyusi manna galati 4:10-20
Gumulsha 4:21-23
Currently Selected:
FILIPHISIYUSI SOKKA BITIMA: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014