LAYINKI QORONTOOSI 1

PHAAWULOOSI SOYINO KEERE

1Maganu yiino garinni Yesuusi Kiristoosi soqqamaasincho ikkinohu Phaawuloosinna rodiinke Ximootewoosi Akayu gobbara heedhanno ammanaano baalate ledo Qorontoosi heedhannotera Maganu beetekiristaanera. 2Maganu Anninketinna Mootichu Yesuusi Kiristoosi eltonna keeru ki'ne ledo hee'ro.

PHAAWULOOSI LOWO QARRI GEDENSAANNI MAGANOHO UYINO GALATA

3Maarote Anni, jawaante baalate Magani, Mootichinke Yesuusi Kiristoosi Anni Kaaliiqi galatamo. 4Isi qarrinke baalu giddo jawaachishannonke daafira, ninkeno Maganuwiinni afi'noommo jawaantenni, qarru baalu giddo noore jawaachisha dandiineemmo. 5Kiristoosi qarra batinse adhineemmonte gede, jawaanteno Kiristoosi widoonni hala'litannonke. 6Ninke qarrammeemmo woyite, ki'ne jawaantenna gato afidhinanni. Ninke jawaanteemmo woyite, ki'neno ninkera iillanno qarri amadeenna'ne cincitine jawaattinanni. 7Qarranke gutantinanninte gede jawaantenkeno beeqqitinannita egenninoommo daafira, ki'nera noonke hexxo jawaatate.

8Roduuwa'ya, Issiyu gobbara hee'noommo yannara amadinonke qarri hiittoohoro affinara hasi'neemmo. Amadinonke qarri wolqankera aliidiha ikkino daafira, lubbotenni hee'rate hexxo nafa ba'inonke. 9Wodaninkenni hendeemmo woyite, reyote yoo yinoonninkeha lawinonke. Kuni coyi ikkinohu, ninke wolqa ikkitukkinni reyitinore kayisannohu Magano ikkinota buunxeemmo gedeeti. 10Isi reyo abbanno qarriwiinni gatisinonke; albillitteno gatisannonke gede iso hexxineemmo. 11Ninke lowo huuccattonni Maganu elto afi'neenna lowo manni Magano galatanno gede, ki'ne ninkera Magano huucca hasiissanno'ne.

PHAAWULOOSI TOWANYOTE HEDINO HEDO AGURI

12Ninke adawadhineemmo coyi konneeti: Kuni coyi halaale ikkinota tii"inke kulannonke. Wolu manninna roorsineno ki'ne ledo noonke xaadi, Maganuwiinni afi'noommo qullaambenna sumbete aana xintaminoho. Kuni ikkinohu, Maganu eltonniiti ikkinnina mannu egennonni di"ikkino. 13Nabbabanna buuxa dandiitinanniha ikkinnina wole coye diborreessineemmo'ne. Gudissine buuxxinanni gedeno afoommo. 14Xa ninkere gamarella affinoonni. Gedensaanni kayinni buuxxinanni. Mootichinke Yesuusi Kiristoosi daanno Barra ninke ki'nenni naaxxineemmonte gede, ki'neno ninkenni naaxxitinanni.

15Konne coye buuxoommo daafira, ki'nera lame hige tola ikkanno'ne gede balaxe towatammo'nera hedoommo. 16Meqedooniya ha'ranninna hakkiinnino higanni ki'ne widoonni hige daye Yihuda ha'reemmo woyite, doogote ikkannore kaa'litinaera hedoommo. 17Tenne heda'yanni, lame arrawo coyi'rummoha lawi'neni? Mitte hige, «Ee woy dee'ni» yee lame arrawo coyi'ranni tenne gobba manni gede ikkoommoha lawi'neni? 18Maganu ammanaminoha ikkino daafira, ninke ki'nera coyi'neemmorino «Ee woy dee'ni» yinanniha di"ikkino. 19Ani, Silaasinna Ximootewoosi mereero'ne kullummohu Maganu Beetti Yesuusi Kiristoosi wo'manka woyite, «Ee» yinanniho ikkinnina, «Ee woy dee'ni» yinanniha di"ikkino.#Soq 18:5 lai. 20Maganu uyinonke hexxo baala «Ee» yaamantannohu Kiristoosinniiti. Maganu ayirrinyira Kiristoosi widoonni qolle, «Hamii'ni» yineemmohu kunniraati. 21Ki'neno ninkeno Kiristoosinni kaajjine hee'neemmo gede assinonkehunna soqqanshote doorinonkehu Maganoho. 22Qoleno isire ikkankera sumudinonkehunna Qullaawa Ayyaana taje asse wodaninkera worinohu isooti.

23Galagale Qorontoosi Katama daa hoogoommohu ki'ne qarrisa giweeti. Kunni coyira Maganu naqaashshe'yaati. 24Kaajjitine uurritinoonnihu ammanatenni ikkinohura, hagiidhitinanni gede ledo'ne loonseemmo ikkinnina ammana'ne aana duha dilendeemmo'ne.

Currently Selected:

LAYINKI QORONTOOSI 1: QulMax

Highlight

Copy