አሞፅ 2

ሞአብ

1እግዘር፥ «የሞአብ ሰብ ዥባፐሮም በቾተበዊ ባጢር የቸነ ታንቀጣኖ ስርም አንችኖ፤ ኽኖ የኤዶም ንስ አጥም አመድ ይኸር ስን መረቦም፤ 2የኽ የኸሬ በሞአብ ገነ እሳት ኧኸራወቴ፤ የቀሪዮትም ሰብ ይትሼሞ መደር ኧመርቦቴ፤ ጋዘነ ቲያትሰመዊ ጫቅሳም ቲያጠርቅ ተጥሩምባም ቃር የቸነ የሞአብ ገነ ሰብ ይሞቶቴ። 3የሞአብ ይገዛ ዳነም በገንመታ የትሾሞ ሰብ አጠፋቴ» ይብር።

ይኹዳ

4እግዘር፥ «የይኹዳ ሰብ ዥባፐሮም በቾተበዊ ባጢር የቸነ ታንቀጣኖ ስርም አንችኖ፤ ኽኖ ጫና ጣሰቦም፤ ትዛዝመና አንቅራቦ፤ አባና ያምሮ የረፐሮ ቅሪነ አትችኖቴ፤ 5የኽ የኸሬ በይኹዳ ገነ እሳት ኧገፍርወቴ፤ የኢየሩሳሌም ሰብ ይትሼሞ መደር ኧንቴ» ይብር።

ይእግዘር ፍርድ በእስራኤል ር

6እግዘር፥ «የእስራኤል ሰብ ዥባፐሮም በቾተበዊ ባጢር የቸነ ታንቀጣኖ ስርም አንችኖ፤ ኽኖ ከስ ካሶት የን ጥርር አትም ኤነወ ሰብ የጫማ ከስ ካሶት የን ዜጋ ባርያ አመነቦም አስራበዊም። 7ዜጋም ያግዝኖ ኤነኖ በጐት ር አደጎም ነር ነረና ይቅረፖዮ፤ የቈንጭዮ ዜጋ ገፎም ቴማ ያወጦዮ፤ አብም ኧርችም ዄችመና ትታክር ምሽት ጋ ጅር ይደምዶ፤ በዝም ሜናና ቅዱስ ሽመና ያሰርኾ። 8ከስ ካሶት ቴኸሎ ዜጋ ጅረና ዘወ ይወስዶፓ፤ ኽትም ቢያትነቦ መደር እንም ተኸተሮም ይትገተሮ፤ ከስ ታነቦ ሰብ በቅጦት ዮሰደበዊ የዌን ጠጅ በቤተመቅደስ ደኔ ይሰጠቦ።

9«እያ ጭን ያኹ ትምብር መና ዝግባ ኸማ ቱነተና የዌራ ኧጨ ኸማ የረፐረ የአሞር ሰብ ተስረና ነቀርም አጠፋንኩም፤ 10ተግብፅ ገነ አወጣም አርባ ዘበር እንም በኸብር ቅየም ወሰድኩም፤ የአሞር ሰብ ገነ ርስት ኤፐም አብኩም። 11ተርች ወርድ ደንኹ ግብት አታተና ነቢ፥ ተዘርማኹም ግብት አታተና ናዝራዊ#2፥11 ናዝራዊ፦ «የዌን ጠጅ ዌም ሟኒም ያሰኽር ቃር ቤሰጠቦዌ ነርመና ቤቀውዬ ኔሳም ቤረግዶዌ ይእግዘር ርዳ በግቦት ይእግዘር ሜና የትቤተሮ የእስራኤል ሰብሎ።» ኤፐም ነሳንኩም፤ የእስራኤል ሰቦ! ኧጋ ዝኽ ውረም አንኸረዌ? እያ እግዘር ዝኸታ ዝረም። 12አኹ ጭን ናዝራዊ የኸረቦ የዌን ጠጅ ባስጠቦት አሳሰትም፤ የነቢም ኽኖ ይእግዘር ቃር አትዘንጎ ባኹም ኸናኹዮም። 13የኽ የኸሬ ታቅመታ በር ዝነ የጫሪ ሰረገላ ይትሰፐር ኸማ ኧሰብርኹቴ። 14ኑጫ ያነኖ ሰብም ስተቦ ኤፈኮ ትወ የኸረቦ ሰብም ጦናና ይኸዳኖቴ፤ ጋዝመነም ገግመና አትርፎት ኤኸሎ። 15ፈንጢና ይድረክሮ ሰብ ምተቦ ኤዠፕሮ፤ ይሮጦም ሰብ ኖጦም ኤተርፎ፤ ፈረዝመነ ነብስመና ኤያተርፎ። 16በኽ ከረ ንቃር ጦናማ የኸረቦ ጋዝመነ የጋዝ ግብረና ቃሽተቦ ይሰኾቴ» እግዘር ዝኸታ ዝረም።

Currently Selected:

አሞፅ 2: መቅጉ

Highlight

Copy