Bwøth Wøk 8

Kanya Ö Ogwäle Wøk Bäät Ŋööm Ijep Bäre

1Køøre Wuuö Jwøk aköö jï Modhe, ni «Ci baŋ Peerø ni caanï gø jïre ni kööï, ni gïna caan Wuuö Jwøki beeye en, ena köö, ni ‹Wec jiya nee aacge kiper naa tïnyge. 2'Ba ni näk mo ïïno kweer ki man weyï geni nee aacge, ka adïëri møn, aani paarï bäre raanynya raanynyø ko ogwäle. 3Ni ö ogwäle ni nyaacge yi naam, ni öge wøk ki yi naam ni cige yi øtø marï, ki kar niine marï, këël bäät pëëm marï, ni cige yïth uudi mo jø kööre moï ni pärge bäät jiyï bëët, ni cige yïth këënne mou këël yïth gïï wø tëëdu ki ge. 4Ni ö ogwäle ni pärge bäätï ki jiy moï ki jø kööre moï bëët.› »

5Ni cäŋ Wuuö Jwøki köö jï Modhe, ni «Caanï jï Aran na athøra mana en cere nee rwiee bäät näm ki bäät nyeŋŋi ki bäät puri, kiper nee ogwäle öge wøk bäät ŋøøp Ijep.»

6Køøre Aran cere arwiee bäät näp Ijep, ni ö ogwäle ni öge wøk ni pääŋge ŋøøp Ijep. 7'Ba ajuuk atïïö ki jap ajuuk ni ŋwaalge teeŋ gïnögø, ni putge ogwäle wëëk ööny bäät ŋøøp Ijep.

8Køøre Peerø Modhe ka Aran acwøle ni kööe, ni «Kwayu Wuuö Jwøk kiper nee ogwäle paanye bääta ki jiya bëët. Køøre jø Icriel wiia wiiø nee cige kuna cïpge ko olämme jï Wuuö Jwøk.»

9Ni kö Modhe jï Peerø, ni «Kanyo manynyï ki man kwaa Jwøk yie wär caanï jïra, kiper nee Wuuö Jwøk kwaa kiperï ki jø kööre moï ki jiyï, kiper nee ogwäle tïmge ni bäŋgø dïïu ki yïth uudi mou, nee tïme ni dööŋŋa yi naam keere.»

10Ni kö Peerø, ni «Kwac Wuuö Jwøk jïra diøø.»

Ni kö Modhe, ni «Beerra man tïme kaawat mana caanï enøgø, kiper nee putï ŋäc møn ni bäŋ jwøk mo caala Wuuö Jwøk na näk Jwøwa. 11Kiper ogwäle puta aay buutï ki yïth uudi moï, ni aacge buut jø kööre moï ki jiyï bëët, ni tïme ni dööŋŋa yi naam keere.»

12Kanyøgø Modhe ka Aran gena aay buut Peerø, ni ö Modhe ni kwac Wuuö Jwøk kiper ogwäle moa jääŋŋe bäät Peerø. 13Ni ö Wuuö Jwøki ni tïïc gø kaawat mana caan Modhe, ni ö ogwäle moa en yïth uudi ki dï käälle, ki moa en yïth pwöth, ni putge thøø. 14Ni ö jø Ijepi ni cøŋge ogwäle na athwöe, ni put pinynyi kwääö ki geni. 15'Ba kanya ö Peerø na neen gø ni piny oniwaany, cwïnye acäŋ døøc mo teek ni kweere ki man wïny mana caan Modhe ka Aran, kaawat mana kwøŋi ya Wuuö Jwøki caan jï Modhe.

Kanya Tïm Nyuu Ni Thööth Dï Ŋööm Ijep Bäre

16Køøre Wuuö Jwøk aköö jï Modhe, ni «Caanï jï Aran ni kööï, ni ‹Rwiec athøra marï ni gøøyï tør piny, kiper nee tïme na nyuu dï po jø Ijep bäre.› » 17Ni ö Modhe ka Aran ni tïïcge gïnögø. Ni ö Aranni ni rwiec athøra mana en cere ni gøøc tør piny, ni put nyuuwi tïmö ni dagø dëët jiy ki lääy bëët. Ni ö tørri bäre ni put tïmö na nyuu dï po jø Ijep bäre. 18Ni ö ajuuki ni päärge gø ki man tïïge ki jap ajuuk kiper nee ge känge ki nyuu. 'Ba kär løny jïge. Ni ö nyuuwi moa en dëët jiy ki dëët lääy ni put bëëtö dëëtge.

19Køøre ajuuk aköö jï Peerø, ni «Gïnögø beeye gïn mo tïïya Jwøki.» 'Ba cwïny Peerø poot bëëdö ni teek ni kweere ki man wïny mana caan Modhe ka Aran, kaawat mana kwøŋi ya Wuuö Jwøki caan jï Modhe.

Kanya Tïm Lwaa Lwaŋŋø Ni Päl Dï Ŋööm Ijep Bäre

20Køøre Wuuö Jwøk aköö jï Modhe, ni «Ö maal ka amöölla cøøn ni nyoothï riï jï Peerø kanyo ci naam, ni caanï gø jïre ni kööï, ni gïna caan Wuuö Jwøki beeye en, ena köö, ni ‹Wec jiya nee aacge, kiper naa tïnyge. 21'Ba ni näk mo jiya ba weyï nee aacge, ka adïëri møn, lwaa lwaŋŋø mo päl jääŋŋa jääŋŋö bäätï ki bäät jø kööre moï ki bäät jiyï bëët ki yïth uudi moï; ni ö yïth uudi mo jø Ijep ki ŋøøm mo wø bëëtge yïthge thuwø ni tïmge no ogääbö ki lwaa lwaŋŋø.

22« ‹'Ba dïcäŋeca ŋööm Göcën na bëët jiya yie owiia kur keere ni bäŋ lwaa lwaŋŋø mo ena yie, kiper nee ŋäyï ni beeye aani na Wuuö Jwøk ni bëëdö dï paani en; 23ni pääŋŋa jiya ki jiyï. 'Ba nyuudhi manøgø puta tägö diøø.› »

24Køøre gïnögø atïïc Wuuö Jwøki. Ni ö lwaa lwaŋŋø mo päl ni ö yi øt Peerø ki yïth uut jø kööre moe, ni ö ŋööm Ijepi bäre ni put ränynyö kiper lwaa lwaŋŋø mana en dï paac bäre.

25Køøre Peerø Modhe ka Aran acwøle ni kööe, ni «Cou ni cïpu ko olämme jï Jwøu dï paac kany keere.»

26'Ba Modhe aköö, ni «Gïnögø ba beer ki man tïïcwa gø, kiper gïïo cïpwa jï Wuuö Jwøk na näk Jwøwa beege gïï mo jø Ijep yïthge reyø ki ge. ?Aŋø, ni näk mo wa cïpö ko olämme ni nëënö jï jø Ijep, ni beege olämme mo yïthge reyø ki ge, wa ba këërge ki kïte ni 'näkge waani? 27Wa doo cøøa dï paap ki wääth mo caath ki nïne adäk, nee wa cïpwa ko olämme jï Wuuö Jwøk na näk Jwøwa kaawat mana caan gø jïwa.»

28Ni kö Peerø, ni «Wääth cïba cïbö jïïu kiper nou cou nou cïpu ko olämme jï Wuuö Jwøk Jwøk maru dï paap. 'Ba käru ci kany mo bäär ki paac. Beerra man kwayu Jwøk kipera.»

29Køøre Modhe aköö, ni «Ennø, aana aa wøk buutï. 'Ba Wuuö Jwøk okwaa kiper nee lwaa lwaŋŋø aae buutï diøø, ïïni na Peerø, ki jø kööre moï, këël jø paarï bëët. 'Ba ï na Peerø, kär näk miï cäŋa cäänö ki cwøk këët ki man mänï jiy ki ciin kuna cïpge ko olämme jï Wuuö Jwøk.»

30Køøre Modhe ree apaanye buut Peerø ni ci kuna kwac Wuuö Jwøk. 31Ni ö Wuuö Jwøki ni tïïc gïna pëëny Modhe ki eni, ni paany lwaa lwaŋŋø bäät Peerø ki jø kööre moe, këël jø paare bëët; ni bäŋ aciel mo odööŋ. 32'Ba Peerø cwïnye acäŋ døøc mo teek yie man thuwø, ni kweere ki man cïp wääth jï jø Icriel.

Currently Selected:

Bwøth Wøk 8: AnyuB

Highlight

Copy

Compare