Bwøth Wøk 7

1Køøre Wuuö Jwøk aköö jï Modhe, ni «Neenï, ïïno tïïa kaamar Jwøk ki jï Peerø, ni ö coku ma Aran ni tïme na nyikugö marï. 2Luup bëët moo caana jïrï ocaanï jï coku ma Aran, ni ö eni ni caan gø jï Peerø, kiper nee jø Icriel wiie nee aacge yi ŋöömö mare. 3'Ba aani cwïny Peerø odøøya mo teek, ni tïïa ŋïïce ki gïï mo rëëma ec 'moa ni thööth yi ŋööm Ijep. 4'Ba kanyo ö Peerø no ba wïny luummu, aani cera orwiea bäät jø Ijep ni tïïa ki gïï mo leth dëëtge, ni ö lwaae 'moa na näk jiya ma jø Icriel ni käla ge wøk ki yi ŋööm Ijep ki ŋøl mo dwøŋ. 5'Ba kanyo rwiea cera bäät jø Ijep ni käla jø Icriel wøk ki dïge, beeye no ŋäyi jø Ijepi døøc nø ni aana Wuuö Jwøk møn.»

6Ni ö Modhe ka Aran ni tïïcge gø kaawat mana caani ya Wuuö Jwøki jïge, ni putge gïnögø tïïc møn. 7'Ba kar kanya ö Modhe ka Aran ni cäänge ki Peerø, Modhe cwiiye pïërabära na Aran cwiiye pïërabära kurdäk.

Kanya Tïm Athøra Na Thwöl Nyïm Peerø

8Kanyøgø Wuuö Jwøk acäänö ki Modhe ka Aran ni kööe, 9ni «Kanyo ö Peerø noo cääne ki uuni, ni kööe, ni ‹Nyuuthu ki ŋïï,› køøre ï na Modhe en, wärï kööï ka Aran, ni ‹Lwør athøra marï ni leeŋï gø piny nyïm Peerø, nee tïme na thwöl.› »

10Køøre Modhe ka Aran gena ö baŋ Peerø, ni tïïcge gø kaawat mana caani ya Wuuö Jwøki jïge; ni ö Aranni ni leeŋ athøra mare piny nyïm Peerø ki jø kööre moe, ni put tïmö na thwöl. 11Ni ö Peerø ni cwøl jøøa nyeŋge reegø ka ajuuk bëët, ni ö geni thuwø ni tïïcge jap ajuuk ni ŋwaalge ŋïï manøgø. 12Ŋati man nø athøra mare aleeŋ piny, ni tïm athøre moge na thwöre. 'Ba athøra mar Aran, athøre mo jøøgø aløønye. 13'Ba Peerø cwïnye poot bëëdö ni teek, ni käre luumge wïnynyö, kaawat mana kwøŋi ya Wuuö Jwøki caan jï Modhe.

Kanya Tïm Pïïyi Moa En Yi Ŋööm Ijep Bäre Na Remø

14Køøre Wuuö Jwøk aköö jï Modhe, ni «Peerø cwïnye poot teek; ena kweer ki man wec jiy nee aacge. 15Wärï ci baŋ Peerø ka amöölla kanyo aa naam, ni koorï eni lak naam nou røømmu ki gø; ni käärï athønynya tïmö na thwöl ki cerï. 16Ni caanï gø jï Peerø, ni ‹Wuuö Jwøk na näk Jwø jø Ibaru aana jääŋŋe baŋï, ni kööe, ni «Wec jiya nee aacge naa tïnyge dï paap. 'Ba këël ennø, luumma poot ba wïnynyï.» 17Ni man poot na dwør Wuuö Jwøk, ena köö, ni «Ki køør man nø, oŋäyï døøc ni beeye aani na Wuuö Jwøk.» Ennø, pïï mo naam ogøøa ka athøra man ni cera en, nee tïmge na remø. 18Ni ö reci moa en yi naam ni thøwge, ni tïm naammi ni ŋwääö no okwäk; ni tïme ni teek jï jø Ijep ki man mäthge ki pï naamøgø.› »

19Køøre Wuuö Jwøk aköö jï Modhe, ni «Caanï jï Aran ni kööï, ni ‹Lwør athøra marï ni rwieyï cerï bäät pï Ijep bëët, ni beege näm moge, ki nyeŋŋi moge, ki puri moge, ki kwöra näk pïï ocooŋ yïthge bëët, kiper nee tïmge na remø; ni ö kwöra näk yïthge da pïï dï ŋööm Ijep bäre ni tïmge na remø, këël pïï moa en yïth dääe moa näk tïïc ka jenni wala moa näk tïïc ka kïte bëët.› »

20Ni ö Modhe ka Aran ni tïïcge gø kaawat mana caani ya Wuuö Jwøki jïge. Ni ö Aranni ni tïŋ athøra maal ni gøøc pïï moa en naam nyïm Peerø ki jø kööre moe, ni ö pïïyi moa en yi naam manøgø ni tïmge na remø. 21Ni ö reci moa en yi naam manøgø ni thøwge, ni tïm naammi ni ŋwääö no okwäk, ni tïm jø Ijepi ni ba løny jïge ki man mäthge ki pï naamøgø. Ni ö pïïyi moa en yi ŋööm Ijep bäre ni put tïmö na remø.

22'Ba ajuuk mo jø Ijep gena tïïö ki jap ajuuk ni ŋwaalge ŋïï manøgø; ni ö Peerø ni bëëde ni cwïnye poot teek ni käre luumge wïnynyö, kaawat mana kwøŋi ya Wuuö Jwøki caan jï Modhe. 23Køøre Peerø ree aløøe ni døø paare ni bäŋ gïn mo ee lääŋŋö kiper gïnögø. 24Ni ö jø Ijepi bëët ni kunyge ki ïïdhi deŋ naam nee jïtge ki pïï mo maathge, kiper mana tïme ni ba løny jïge ki man mäthge røk pï naam. 25Ni tïm nïne na abïriiø ki mana ö Wuuö Jwøki na gøøc naam.

Currently Selected:

Bwøth Wøk 7: AnyuB

Highlight

Copy

Compare