Bwøth Wøk 5

Kanya Ö Peero Na Kwier Luum Modhe Ni Meet Tïïc Mar Jø Icriel

1Køøre cään Modhe ka Aran gena ci baŋ Peerø ni köge jïgø, ni «Gïna caan Wuuö Jwøki na näk Jwø Icriel beeye en, ena köö, ni ‹Wec jiya nee aacge nee tïïge ka ajwöma jïra dï paap.› »

2'Ba Peerø aköö, na «?Aŋø, Wuuö Jwøk aŋa ni wïnynya dwøre nee jø Icriel aacge en? Aani Wuuö Jwøk kuua, këël aani thuwø jø Icriel ba wëëga wääth nee aacge.»

3Køøre Modhe ka Aran aköö, ni «Jwø jø Ibaru#5:3 Ki kwör møøk jø Icriel di cwølø ni jø Ibaru. ree anyoodhe jïwa. 'Ba ennø, wa kwaya ïïni ki man aawa dï paap kany mo caath ka nïne adäk, nee wa cïpwa ko olämme jï Wuuö Jwøk na näk Jwøwa, kiper nee ba kän bäätwa ki täwe mo leth wala leny.»

4'Ba nyeny Ijep aköö jïge, ni «Nyie Modhe ka Aran, ?aperŋø na mänu jiy ki man tïïcge tïïe moge? Cou døøu baŋ tïïe mou.» 5Ni cäŋ Peerø köö, ni «Neennu, kawaane jø tïïe moa can dï paani atïmö ni thööth. 'Ba ennø, u tïïya jiy nee tïïe moge wecge.»

6'Ba na poode na dïcäŋögø kiree, Peerø akän wøk ki ciik jï jø wø käär tïïe ni wø wëëk jiy tïïc, ki jøøa näk wïth jø tïïe, ni kööe, 7ni «Kär nou kännö ki juuk beel mo wø tïïc thuube ki ge jï jøøgø këët kaawat mana dïkwøŋ; beerra man cige keerge nee känge ki juuk beel. 8'Ba kwään thuube mo poot caala kwään moa dïkwøŋ wär manynyu bäätge, ni kär nou känna wøk rege, këël aciel. Kiper geni ge jägö, ni beeye tiere ni jwöŋge enø, ni köge, ni ‹Wa wec nee wa ciwa kuna cïpwa ko olämme jï Jwøwa.› 9Beerra man tïm tïïci ni päl bäätge, nee tïïge ni bäŋ jwöm røk, kiper nee ba cätge ki luup mo oballe jaak.»

10Køøre jø wø käär tïïe, ki jøøa näk wïth jø tïïe, gena aa wøk ni caange gø jï jiy, ni köge, ni «Man beeye dwør Peerø, ena köö, ni ‹Aani a ba cïpi jïïu ki juuk beel këët. 11Cou ni cääu ki juuk beel keeru kanyo jïtu yie jaak; 'ba bäŋ gïn mo käla wøk ri tïïc maru.› » 12Køøre jiy akeethø dï ŋööm Ijep bäre nee ge känge ki juuk beel. 13Ni ö jø wø käär tïïe ni lacge ge, ni köge, ni «Thööru tïïc mana näk omanynyø bäätu ki dïcäŋ man nø, kaawat mana wara bëëde ni di kännö jïïu ki juuk beel.» 14Køøre thuwø, wïth jø tïïe na näk jø Icriel, na näk orøøny jic Peerø mo wø käär tïïe nee bëëtge na wïthge, atïmö ni ge di pöötö ni ge di pëënynyö, na «?Aperŋø na ba thööru kwään thuube moa näk okwaanø ya awääre wala dïcäŋi, kaawat mana wara kwøŋu tïïc cøøn?»

15Køøre wïth jø tïïe moa näk jø Icriel gena öö ni jwöŋge dëër Peerø, ni köge, na «?Aperŋø na tïïyï teeŋ gïn dëëtwa, wa na laaŋe moï ii? 16Bäŋ juuk beel mo wëëk laaŋe moï, 'ba ge poot köö ki waani, ni ‹Tïïyu thuube.› Ennø, wa na laaŋe moï wa di pöötö; 'ba bääyö manøgø beeye mar jiyï ki dëëtge kiree.»

17'Ba Peerø aköö, ni «Uuni u jägö, u jägö døc kiree; ni beeye tiere ni kööu enø, ni ‹Wa wec nee wa ciwa kuna cïpwa ko olämme jï Wuuö Jwøk.› 18'Ba ennø, cou ni tïïu; kiper juuk beel bäŋgø mo di cïbö jïïu, 'ba kwään thuube poot pääŋŋu pääŋö na karge.»

19Ni ö wïth jø tïïe moa näk jø Icriel ni putge gø ŋäc ni bëëtö marge leth møn kiper acaan jïge, ni «Kär nou känna wøk ri kwään thuube moa näk omanynyø kiper dïcäŋ man nø.» 20'Ba kanya duuge wøk ki baŋ Peerø, gena røømmø ki Modhe ka Aran na näk køya geni. 21Ni kö wïth jø tïïe moøgø jï Modhe ka Aran, ni «Wuuö Jwøk luubö manøgø oraaŋe bäätu ni ŋøl uuni wøk, kiper mana tïïyu wa kaamar gïn mo ŋwäänynye raac ki jï Peerø ki jø kööre moe, ni cïbu tøøŋi ceŋge nee wa 'näkge.»

22Køøre Modhe adøø baŋ Wuuö Jwøk ni kööe, ni «Wui Kwäärö Wuuö Jwøk, ?aperŋø na tïïyï teeŋ gïn ni raac en dëët jøøi ii? ?Aperŋø na jääŋŋï aani thuwø? 23Ni këël kanya ööa baŋ Peerø na cääna ki nyeŋŋï, ena cäŋ tïïö ki gïn mo raac dëët jøøi ii; 'ba ïïni jøøi kärï kønyø na bäre.»

Currently Selected:

Bwøth Wøk 5: AnyuB

Highlight

Copy

Compare