Bwøth Wøk 14
14
Kanya Ö Peerø Na Läp Køør Jø Icriel
1'Ba Wuuö Jwøk acäänö ki Modhe, ni kööe, 2ni «Caanï jï jø Icriel nee døøge ŋäthge mëëth ni tïïcge twïër marge nyïm Pii-Ayröt, yïthakic Migdöl ki Naama Kwaar; u doo tïïö ki twïër bäät Naama Kwaar ni dïët ki Baal-Dhapön. 3Kiper Peerø oköö ni jø Icriel thääyö dï paap jaak, ni geno ciel paapi dïër. 4Køøre aani cwïny Peerø odøøya mo teek, ni läm køøru. 'Ba aani teek mara onyoodha ki ri Peerø ki lwaak mar leny mare bäre; ni ö jø Ijepi ni putge gø ŋäc møn ni beeye aani na Wuuö Jwøk.» Ni ö jø Icrielli ni døøge ŋäthge keda mana caani ya Wuuö Jwøki jïge.
5'Ba kanya caani jï Peerø nyeny Ijep ni jø Icriel anø jöömmö, eni ki jø kööre moe acaara marge awiilge kiper jø Icriel, ni köge, na «?Agïnaŋø na tïïø en? ?Aŋø, jø Icriel awiiø møn ki man ba tïnyge øøni këët?» 6Køøre Peerø jääy mare man wø tut okwëënyi ajiiŋŋe, ni aae ki lwaak mar leny mare na aciel; 7ni lwør jïëthe mo wø tut okwëënyi mo ojierø ma dïpe abïciel, ki jïëthe mo Ijep møga bëët mo wø tut okwëënyi, ni jääy man nø kwäärö mare ena bääte. 8Ni ö Wuuö Jwøki ni døøc cwïny Peerø nyeny Ijep mo teek, ni ö Peerø ni läp køør jø Icriel, ni jø Icriel cäädhi ni cwïnyge da cer. 9'Ba jø Ijep aläp køør jø Icriel ko okwëënyi mo Peerø bëët ki jïëthe moe mo wø tut okwëënyi, ki jø okwëënyi moe, ki lwaak mar leny mare, ni maage ge bäät Naama Kwaar kanya näk twïër marge ege tïïö yie nyïm Pii-Ayröt na näk dïët ki Baal-Dhapön.
10'Ba kanya tïm kar Peerø ni cään ki geni, jø Icriel alwïthö, ni jootge jø Ijep ni lämma køørge, ni putge lwäyö døc kiree; ni ö jø Icrielli ni jwöŋge jï Wuuö Jwøk. 11Køøre gena köö jï Modhe, na «?Aŋø, beeye kiper mana bäŋe bwör Ijep na kälï waani wøk nee wa thøøwa dï paabi en? ?A teeŋ gïnaŋø na tïïyï dëëtwa na kälï waani wøk jaak ki Ijep en? 12?Aŋø, kärwa caanø jïrï na bëëde kanya enø Ijep, ni köwa, ni ‹Wec wa nee jø Ijep tïnywa›? Kiper doo beerra eni jïwa ki mana dewa jø Ijep tïnynyö jaak ki man thøøwa dï paabi en.»
13'Ba Modhe aköö jï jø Icriel, ni «Käru lwäyö; cuŋŋu karu ni neennu køny mar Wuuö Jwøk mano tïïe kiperu dïcäŋi en; kiper jø Ijep moø neetu dïcäŋi yøø, ge ba cäŋu neennø këët na bäre bäre. 14Wuuö Jwøk okëëdi kiperu, 'ba uuni u doo bëëdö mëëth jaak.»
15Køøre Wuuö Jwøk aköö jï Modhe, na «?Aperŋø ni jwöŋï dëëra en? Caanï jï jø Icriel nee pööthge nyïmge. 16'Ba ïïni, kwany athøra marï ni rwieyï gø bäät Naama Kwaar, ni pääŋŋï pïï ki dïge, nee jø Icriel pööthge ki dï Naama Kwaar kanya no otal. 17'Ba aani cwïny jø Ijep odøøya mo teek møn ni lämge køør jø Icriel; 'ba aani teek mara onyoodha ki ri Peerø ki lwaak mar leny mare bäre, ki jïëthe moe mo wø tut okwëënyi, ki jø okwëënyi moe. 18Køøre oput jø Ijepi ŋäc møn ni beeye aani na Wuuö Jwøk, kanyo nyoodha teek mara ki ri Peerø, ki jïëthe moe mo wø tut okwëënyi, ki jø okwëënyi moe bëët.»
19Ni ö nyïïatwiel maalli mar Jwøk, na näk cäädha nyïm lwaa Icriel, ni paany ree ni ci ŋäthge; ni ö pöölö ni daak ree nyïmge ni cuŋŋe ŋäthge, 20ni tïme ni ena yïthakic lwaa Ijep ki lwaa Icriel. Ni bëët pöölö manøgø ni piny ee tïïö na muudhö ki baŋ jø Ijep, ni poot cïpö ki tar ki wäär jï jø Icriel. Ni put tïmö ni ba løny jï jø Ijep ki man öge kany mo cään ki jø Icriel dïwäänögø bäre.
Kanya Cääth Jø Icrielli Ki Kany Mo Otal Yi Naam
21Køøre Modhe cere arwiee bäät Naama Kwaar; ni ö Wuuö Jwøki ni dwøk naam ŋääe ki køør jamø mana teek na tïïe nee kwöde ki yi wäär bäre, ni kwönni ki jï løø kur tuul-cäŋ, ni ö pïïyi ni pääŋge rege, ni ö naammi ni tale. 22Ni ö jø Icrielli ni cørge dï naam ni ge cäädhi ki kanya no otal, ni pïï cuŋŋi kaamar dëër øtø bäät cämge ki bäät cwïcge.
23Køøre jø Ijep aput läpö ko okwëënyi mo Peerø bëët, ki jïëthe moe mo wø tut okwëënyi ki jø okwëënyi moe, ni cige køørge ni ge cøra dï Naama Kwaar. 24'Ba na tïme na köök gwïën, Wuuö Jwøk lwaa leny mar jø Ijep aneene ki yi pöölla näk liel kaamar maac ki wäär, ni kier wï lwaa leny mar jø Ijep. 25Ni ö Wuuö Jwøki ni twöc tiet jïëthe moge mo wø tut okwëënyi, ni tïïc ge ni ba cäädhi ni beyø. Køøre jø Ijep aköö, ni «Beerra man daaø røgø buut jø Icriel, kiper Wuuö Jwøk cwaga geni ni këëdö ki øøni.»
Kanya Mut Lwaa Leny Mar Peerø Yi Naam
26Køøre Wuuö Jwøk aköö jï Modhe, ni «Rwiec cerï bäät Naama Kwaar, kiper nee pïï duuge bäät jø Ijep, ki bäät jïëthe moge mo wø tut okwëënyi ki jø okwëënyi moge.» 27Ni ö Modhe ni rwiec cere bäät Naama Kwaar, ni ö naammi ni døø kare ki bäc øw kaa mana bëëde dïkwøŋ. 'Ba kanya ö jø Ijepi na reŋge ni ge ŋwieya pïï moa ö bäätge, Wuuö Jwøk jø Ijep amaa dï naam. 28Ni ö pïïyi ni duuge ni mwønyge jïëthe mo wø tut okwëënyi ki jø okwëënyi, këël lwaa leny mar Peerø bäre na cäädhö køør jø Icriel dï Naama Kwaar; ni bäŋgø mo odööŋ këël aciel dïge.
29'Ba jø Icriel acäädhö ki kany mo otal dï Naama Kwaar, ni pïï cuŋŋi kaamar dëër øtø bäät cwïcge ki bäät cämge. 30Dïcäŋeca Wuuö Jwøk jø Icriel akønye ceŋ jø Ijep, ni ö jø Icrielli ni jootge dëët jø Ijep moa no othøw deŋ Naama Kwaar. 31'Ba kanya ö jø Icrielli na jootge teek Wuuö Jwøk na dwøŋ na nyoodhe dëët jø Ijep, gena put lwäyö ki Wuuö Jwøk, ni ŋääthge Wuuö Jwøk ki dhaanhnhe ma Modhe.
Currently Selected:
Bwøth Wøk 14: AnyuB
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Ethiopia
