Bwøth Wøk 13

Thäk Ciik Møøk Kiper Ajwöm Cäŋa Pööth Thøøe Yie

1'Ba Wuuö Jwøk acäŋ cäänö ki Modhe ni kööe, 2ni «Cïp kaai moa näk cwøw bëët kur keerge jïra, ni beege kaai bëët moa lwaarø ki geni dï jø Icriel. Ki mana täge ki kany dhaanhø këël kaai mo lääc paac bëët, beege 'moa.»

3Køøre Modhe aköö jï jø Icriel, ni «Lääŋŋu dïcäŋa ööu wøk yie ki Ijep na näk po laŋ; kiper uuna käl Wuuö Jwøki wøk kaagø ki teek mare. Kiper manøgø nø, kär dee møø mo ree da thømmø mo cam dïcäŋögø. 4Dïcäŋi en yi dwääy mana cwøl na Abip, u tïŋŋö yie. 5'Ba kanyo ö Wuuö Jwøki noo kïth uuni yïth ŋøøp jø Keenan, ki jø Këth, ki jø Amör, ki jø Ëwi, ki jø Jeebuc, na kööŋe jï kwäyu kiper nee cïbe jïïu, ni beeye ŋöömma näk caak ki maar kïc päl yie, u doo tïïya tïïc man yi dwääni en. 6Nïne abïriiø u doo cama møø mo ree bäŋ thømmø, 'ba noo tïme na bïriet nïne wär tïme ni da ajwöma jï Wuuö Jwøk. 7Møø mo ree bäŋ thømmø wär tïme ni camma gø ki nïne abïriiø; ni kär dee møø mo ree da thømmø mo joot buutu; kär dee thømmø mo di joodø buutu thuwø këël kwöro bëëdu yïthge bëët. 8'Ba wär caan ŋati man nø jï wääde dïcäŋögø, ni kööe, ni ‹Man beeye kiper gïna tïïc Wuuö Jwøki kipera kanya ööa wøk Ijep.› 9Køøre gïnögø doo bëëdö na nyuudhi kaamar gïn mo otwöö ceŋŋu, ni caala gïn mo ena täärnyïmmu, nee ciik Wuuö Jwøk bëëde ni ena dhøgu, kiper mana ö Wuuö Jwøki na käl uuni wøk Ijep ki teek mare. 10Kiper manøgø nø, gïnögø dou gwøø ki kanya näk owäŋŋö ki yi cwiir cooth.

Ciik Kiper Kaai Mo Jø Icriel Ki Lääy Moge

11«'Ba kanyo ö Wuuö Jwøki noo kïth uuni yi ŋööm jø Keenan, kaawat mana kööŋe jïïu ki kwäyu, kanyo cïp gø jïïu, 12kaai moa näk cwøw bëët mo olwaarø ki ge dou cïba kur keerge jï Wuuö Jwøk, ni ö kaai mo lääc paac mou bëët moa näk cwøw ni tïmge na mo Wuuö Jwøk. 13'Ba kaa ma mar arëën dou wiilø ki nyidiel. 'Ba ni näk mo ba wiillu, ŋute dou meenø. 'Ba kaai mo jiy na näk wäätu bëët dou wïïla wøk.

14«'Ba yi nyïme, kanyo ö wäätu noo pëënyge uuni, ni köge, ni ‹?Gïn tiere aŋøøni?›, u doo köö jïge, ni ‹Wuuö Jwøk øøna käl wøk ki teek mare Ijep na näk po laŋ. 15Ni kanya ö Peerø na døøc cwïnye mo teek ni kweere ki man aaø, Wuuö Jwøk kaai moa näk cwøw bëët moa en yi ŋööm Ijep anääe, ni beege kaai mo jiy ki kaai mo lääc paac bëët. Kiper manøgø nø, waani kaai mo lääc paac moa näk cwøw bëët wø cïpwa cïbö no olämme jï Wuuö Jwøk, 'ba wäätwa moa näk kaai wø wïïlwa wøk.› 16'Ba kiper mana ö Wuuö Jwøki na käl øøni wøk Ijep ki teek mare, gïnögø doo bëëdö na nyuudhi kaamar gïn mo you twöö ceŋŋu, ni caala gïn mo ena täärnyïmmu.»

Kanya Ö Jø Icrielli Na Täkge Wääth Marge

17'Ba kanya ö Peerø na wec jø Icriel nee aacge, ge kär bwøth Jwøki ki jöör ŋööm Pilitin, këël na bëëde ni cäänna jöörögø; kiper mana kö Jwøki, ni «Beeye kiper nee jø Icriel acaacge ba wiilge ni døøge Ijep kanyo dee leny.» 18Kiper manøgø nø, Jwøk jiy abwødhe ki jöör dï paap ni ee meenø ni ge coonya Naama Kwaar. Ni ö jø Icrielli wøk ki Ijep ni ge cäädhi kaamar jiy mo cøøa baŋ leny.

19Ni ö Modhe ni lwør cuu Jocep, ni käär geni, kiper Jöcep jø Icriel awëëk kööŋ dïkwøŋ, ni kööe, ni «Ka adïëri møn, Jwøk ööa baŋu kuna køny uuni; 'ba kar kaaca nø, cuu 'moa wär kwanynyu kany ni källu geni.»

20Køøre jø Icriel atïŋŋö Cuköt ni tïïcge twïër marge Ëtham na en deŋ paap. 21'Ba Wuuö Jwøk cäädha nyïmge ki dïcäŋ ki yi pöölö mo ree ee wenyø, ni bwøtha geni ki jöö mano cørge, ni pööllögø liel kaamar maac ki wäär ni cïpö ki tar jïge, nee lønye jïge ki man cääthge ki dïcäŋ ki wäär. 22'Ba pöölö man wø nëëni ki dïcäŋ ni wø liel na maac ki wäär ree käre paanyø nyïm jø Icriel këët.

Currently Selected:

Bwøth Wøk 13: AnyuB

Highlight

Copy

Compare