ROMA 9
9
Allah akburi denek mende inom dogorak wene
1An Kristus nimbirak werekma wene yigi ya nenggal dek, ebe wene arar yokeragin o. Ar Roh Allah nen an woknarek nega ma, an nane yokerar taga yoma, niliti pano mende paga arar yokerar taga o. 2An niliti wartega dogolir, nakla buru-buru ernaka agarik eti, 3ir akuni an nogari inake paga arar o. Nenaluk, ir inake paga, Ar Allah nen an pudulogo bangga, Kristus nimbirak kunik eti weralogo banengga erurak eti wadok ar o. 4#Kel. 4:22Ir inebe akuni pulik mende, Allah nen ir inebe Ar akburi erogo baga, Obarne inil kowak yiluk ekige ar o. Ar awene ir inoba warogo bega, hukum agama wene kindirogo wogoraga, kir nen tamban eruwok nen yiluk kalok yegerogo eku dogorak yiluk emeriraga, tuguluk Ar Allah nen yabungga wokeragin mende yegerogo o yiluk, Ar Ane amburu wogoraga ekige o. 5Ir inebe nir ninumbui paga wigalek mende. Nen Ar Kristus eti akuni paga endago ake yumo, ir mende ap kebe paga wigalek o. Ar ebe nggain nggok mende ar dogowak o. Ar Allah endaga ar nggok lektek mende dogogin o! Amin.
6An nakla paga nen, Ar Allah wene warogo birige eti, dek aga yiluk yega dek mende, ir Israel mende obogar AR Allah akburi yiluk pulinabukdek o. 7#Kej. 21:12Abraham umbui mende obok dambuk togon Allah akburi dek o. Ar Allah nen Abraham yoga dogolir, “Isak umbui endago mban kar kumbui yugu dogogun o,” yiluk yorige o. 8Ebe eta Abraham umbui wigalek mende, Ar Allah akburi mende etarurak eti, Ar Allah Ane yirige mutok endak tagwi mende mban o, nen Abraham umbui wigalek obogar dambuk leger etegerogo dek o. 9#Kej. 18:10Nenaluk Ar Allah nen wene warogo birige yegerogon, “O ambi mirik paga, An koba warigin o, nen ar Sara ak ap ambi endarigin o,” yiluk yirige.
10Nen, ambi yi inom, Ripka elege wadigi mban mbere ap ambi akburi, ar Isak nir ninomba eti akburi endaginarkige. 11Elege wadigi mbere eti awan endak tagikdek dagik, Allah nen yabongga etaru mende obok kolkigemo. Ar Allah nen kolkige eti, akuni nen ekwi paga dek, arte Ar Allah nen inayonggo bega paga lakigik arar o. Ir Ripka agwi eti nen, maduk erugun pano erugun eti auwan ekwi dek kigik, 12#Kej. 25:23Ar Allah nen Ripka yoga dogolir, “Anggok kwak nen, aworak apma mende eyabu eka dogogin o,” yiluk yorigemo o. 13#Mal. 1:2-3Alkitab mbalek paga, Ar Allah nen yegerogon yirige o, “Ar Yakub eti An niliti kunik o, ogwe ar Esau eti perak, An na'ir o,” yiluk yirige o.
14Yogondak wene nggaruk togon enggen negen nenggerogon yuwok? Ar Allah nen eta nggodo ekigemo a? Eta Ar Allah nen nggodo eru dek arar o! 15#Kel. 33:19Nenaluk Ar Allah nen Musa yoga dogolir, “An nen ap ambi pano erogo bik andalok ma, An nen ar oba pano erogo bigin o, nen An ap ambi niliti kunik erik andalokma, An nen niliti kunik erigin o,” yiluk yorige o. 16Yogo, Allah nen erik yiluk, akuni nen ekwi paga dek, akuni nen kwakwi paga degar o. Nen, ebe Ar Allah adik iliti nen mirinaka paga arar etarir taga o. 17#Kel. 9:16Alkitab mbalek paga nen, “Allah ap Mesir mende endaga mbogor yoga dogolir, ‘An nen wene ambi andagi yi ar ernok nen yiluk, menogo bagarigimo o. Ebe kar eka paga, An nobatne wuka inom, nendaga inom, o kuri ya nda etoma, ir obogar inilu aruwak nen yiluk bagarigi o,’” yiluk yirige o. 18Yogo ebe eta, Ar Allah nen ap ambi niliti kunik erik andaga kalok, iliti kunik eginaka o. Nen, Allah nen ap ambi iliti akber eruwak andaga kalok, ebe iliti akber ar erigin o.
Allah anini inom nen Allah iliti pano inom wene
19Yogo, kir nen an yonugu dogolir, “Eti kalok, nenaluk Ar Allah nen kir akuni yoma maduk o, yiluk yokerataga? Akuni nen Allah ekanem aru mbalurak ndak a?” 20#Yes. 29:16, 45:9Ogwe, kir kinebe akuni agartaga mende o! Kir nen Allah ane paga, wene onggo dago-dago yorurak mondok ndak dek o! Pot bunga nen ar akuni pot bunga agabak kigirkige mende yoga dogolir, “An ya nenggerogon ernaken yiluk yorurak ndak a?” 21Ar akuni pot bunga agabak kigirke werek eti, agar nggakbok eti yi ndak-ndak erik andalok ekanem, ta nen maga yorurak o? Agar ambi mende ar ogwe, ar akuni erir taga werek eti nen, pot bunga eti inebe mbere eka dogolir, ambi pano mondok eka, nen ambi kwak maduk negen eka erigin o.
22Allah nen eta ndak-ndak erirtaga o, Ar nen anini wuk togo inoba bega, obarne nggwik togo inil kowak nen yiluk inugur daga erirtaga o. Ir ar anini erakwi mende, hukuman inoba wurabu yamak daga erir taga o. 23Ar Allah nen, nir ar iliti kunik mende eti, ye mende nde mende adeknggen werek mende nggilu-nggilu erogo wokneragin o. Nir adeknggen mende etoma kodawak nen yiluk, pulogo binanir taga o. 24Nir yi arar wai yoneragage, ir Yahudi mende mban dek mende, ap inalebunu adik mende inom ar wai yoragage o. 25#Hos. 2:23Buku nabi Hosea nen mbalkige paga, Ar Allah nen yega dogolir,
“Akuni an inakburi dek mende,
An nen ir ‘An nakburi’, yiluk yoragin o.
26 #
Hos. 1:10
Nen o ambi mo nggoma kwak etoma, ‘Kir Ar Allah iluk mende akburi dek yoragun ogwe,’
ir akuni etoma mende etoma, Ar Allah iluk mende akburi, o yiluk yoragu dogogun o.”
27 #
Yes. 10:22-23
Ap nabi Yesaya ane obarne erogo ap Israel mende yoraga dogolir, “Akuni Israel mende kinebe, todi mbili talek mende ogwe, we mbere ar mban kinagap endarigin o. 28Tuhan nen hukuman o agartaga yoma muk wurabi warigin arar o.” 29#Yes. 1:9Yesaya nen ambi yegerogo yirige, “Ar Allah obarne ambik nen, nir wigaluwak nen yiluk dambek dinanilep dek dogolep ma, nir yoma o Sodom Gomora ndak-ndak ar etatep o,” yiluk yirige o.
Allah wene Pano Wene paga, Allah akburi inom kunogo baurak wene
30Yogo, wene nggaruk togo enggen yokerak o. Ap inalebunu Yahudi mende dek, adik mende nen Allah inom dambuluwok yiluk kwakikdek mende, Ar Allah nen ir ar inom pano dambuluok yiluk ekige mo o. 31Nen, ir akuni Yahudi mende nen, Ar Allah inom pano dambuluwok yiluk, hukum agama wene kindirogo wogoragage paga, kwarir nugwi mende, Ar Allah inom dambul kikdek arar o. 32Nenaluk ir Yahudi mende nen, Allah inom dambul kikdek? Ir nen Allah oba iniliti nen panggolkikdek paga, ir inakla andalok erir lagwi paga, Ar Allah inom pano dambulkikdek o. Ir nen “Yugum paga inoyok abir diktogo watagu lagugwa o.” 33#Yes. 28:16Yugum eti ake, Alkitab paga yegerogo mbalek werek o,
“Yi dikbini o, O Sion etoma yigom ambi bigimo o,
nen eti paga akuni inoyok abir diktogo watawak nen yiluk bigimo;
yigom ebe eti nggok mende arar o, ma paga akuni nen watagu dogogun o.
Ma, ir akuni nen ar oba panggolumo, kir watagun mondok dek o.”
Currently Selected:
ROMA 9: WLW
Highlight
Copy
Compare
Share
Want to have your highlights saved across all your devices? Sign up or sign in
