ROMA 8
8
Roh Allah nen yega mutok eku dogorak wene
1Yogondak Kristus Yesus inom kunik mende eti, hukuman anggin mende eti inoba wurabigin dek arar o. 2Nir maduk ekwi ake paga hukum eti kanggu lagagu eti ar mende, hukum Roh Allah ekige eti, Ar Yesus Kristus eti ninom kunogo binaninggige paga, ninebe wender erogo binanggige o. 3Nir akuni mende ninobatne dekma, agama wene kindirik paga erurak ndak dek mende, Ar Allah nenar ekige o. Maduk ekwa obarne dek erogo bik yiluk, Allah nen Ar Akbur nir akuni ndak-ndak erogo lakbi wagagemo, maduk eku lagugwa mende obok ninoba dek erogo birige. 4Ar Allah etegerogon ekige etoma, hukum agama Yahudi wene kindirik yegerogon eku dogowak andarige mende eti, nir ninobabur akuni paga kwak dek ogwe, arte Roh Allah eti obarne paga eku dogorak ake kolkige o. 5Akuni nen akuni inobabur mende mban kalok, inobabur akuni paga mban erir lagwi, nen eberir lagu dogogun o. Ogwe, ir akuni Roh Allah yoraga mutok lagwi kalok, ir Roh Allah wadok mende mban eberir lagu dogogun o. 6Kir kiniliti paga, akuni inobabur mende nen wokerek nega kalok, kinebe kambugun o. Nen, kir kinilitimo Roh Allah nen yokeraga mutok erir lagwi kalok, kinebe Ar Allah kinom kiniluk dambulik pano dogogun o. 7Akuni ambi akuni inobabur wadok mutok eka kalok, ap eti Allah imbirak wim arar agarik o. Ap eti Allah nen yirige wene apma agarik dek o, nen Ar Allah awene abura tebe yi ligin mondok degar o. 8Ir akuni inobabur mende paga erir nugwi kalok, ir nen Ar Allah iliti yanggo lugun mondok dek o.
9Kir nen akuni inobabur mende paga erir nugwi mende eti, ekwi dek o. Tuguluk Ar Roh Allah nen ebebar kinilitimo dogolir erir nugwi, nen Ar wokerek nega dogogin o. Ap ambi Roh Kristus ilitimo dek kalok, ap eti Kristus amende dek o. 10Ogwe, Kristus iluk kinilitimo werek kalok, kinebe maduk onggo kambugun mende, Allah kinom pano kunik werekma, Roh Allah nen kir kiniluk pano dogorak ekinabigin o. 11#1Kor. 3:16Roh Allah Kristus warekma nen iluk ekdirige eti kinilitimo werek kalok, Ar Kristus warekma nen, iluk ekdirige werek eti nen, kir kinebe kambumo ogwe kiniluk ekinabigin o. Roh Allah kinom kinilitimo werek eti nen, kir kiniluk ekinabigin o.
12Eta ma, nawor nakbur ye eru nde eru yoma, nir nen eku dogorak mende mban ar o; Ogwe nir ninobabur agar taga mende wadok paga dek o; nir nen ninobabur agataga mende nen iliti wadok paga erir lagu dogorak degar o. 13Nenaluk kir nen kinobabur akuni agar taga mende paga erir lagwi kinalok, kir kiniluk dogogun dek o. Nen Roh Allah obarne paga perak, kir kinobabur akuni agar taga mende inobabur maduk mende eti warogo bugwi dogogun o. Eta paga nen perak, kir kinebe kiniluk pano dogogun o. 14Ir akuni Allah akburi mende, Roh Allah nen wogorek nega dogogin o. 15#Mrk. 14:36; Gal. 4:6 #Gal. 4:5-7 Roh Allah nen wokeragage eti, yedoman mende wokeraga dekma, ninobade yurak dek o. Roh Allah eti nen, kir Allah akburi erogo binagarigerek ma, Roh Allah obarne paga, nir nen “Nombae, Nombae o,” yiluk yoritagwi o. 16Roh Allah nen, roh nir mende eti imbirak nen, nir eti kir Allah akburi o yiluk, kenam erogo binanirtagwi o. 17Yogo, nir Allah akburi kalok, nir nen Ar Akburi inake eyakte pugurogo birige mende eti kodagun ar o. Nir nen Ar Kristus ninom, Ar ake pugurogo birige mende kodaganem, nir ninom kodagun o. Nir nen Kristus ake kener waku dogogun kalok, ar ninom wogok binanigin ar o.
Allah akburi wogokbagin wene
18Anggin panggin yogondak nir ninoba wurar taga yoma, an nakla paga nen andaga dogolir, nir onggo yabongga wokneragin mende imbirak ndak kaurak ndak dek negen ketaga o. 19O yoma obogar nen, Ar Allah Akbur eti nenggerogon kenam erogo bigin yiluk, ir nen torek inakla duktek mondogar agarik o. 20#Kej. 3:17-19Nenaluk agar taga yoma Ar Allah nen ugunar dek atawak nen yiluk dambe karige o, Ar nen wadok yirige paga degar o, Ogwe Allah nen we etegerogon ar dambe karige o. Etegerogon ar ogwe, inakla duktek dogorak mende yi o; 21O ambi wigin paga, o yoma obogar olin warogo burak ogwe ndiligin o, nen Ar Allah akburi inom inadik erogo baga, nen inebe wogok daga erigin o.
22Kwe ak il bagalek kener waritaga kwak, yogondak o yoma iliti ane nggu dagu yirtaga kertaga o. 23#2Kor. 5:2-4O yoma mban iliti ane yega dek o, nir inom ar nenggerogo etarugun yiluk niniliti ane yitagwi o. Nir Allah nen Roh Allah we alebagik wokneragage mende, ninebe obok wender erogo binangga, akburi erogo binangga eru torek agorik. 24Nenaluk nir nen ninakla oba mbektek mondok dogogun kalok, ninebe ndilninabigin o. Ogwe nir nen ninakla oba duktek mende eti ninil kigikdek arar kalok, eti nir nen ninakla oba duktek mende eti degar o. Nenaluk akuni ta nen kwak il karige mende eti, iliti oba mbektek mondok dogogin kogop? 25Nenaluk nir nen kodau mende eti ebe ninil kigikdek kalok, nir nen yanggo yiluk aruwam mondok torek dogogun o.
26Eta paga nen, Ar Roh Allah nen, nir yamak ninak nen yiluk wagage o. Nenaluk nir nen tamban mor-mor eru ninonggokdek kalok, Ar Roh eti nen, nir ninilimo wadok tebelek aborama mende eti, Ar Allah oba yegerogon yiluk nggino yorirtaga o. 27Ar Allah nen akuni iniliti eberkwi mende obok iluar, nenaluk ar Roh eti nen nir wadok mende yorirtaga eti paga ma o. Ar Roh nen wadok kertaga mende eti Ar ilu ar o; nen Roh eti nen Allah akburi inake paga, Ar Allah yori taga eti, Allah iliti wadok mende dirogo arar yori taga o.
28Ar Allah nen ye mende nde mende obok eka dogolir, ar akburi iliti kunik mende inake pano mende erogo wulaka, inayonggo bik andarige paga inayonggo bega erir taga o yiluk, ninilu aritaga o. 29Ir akuni Ar Allah nen migogo wogonakige mende etoma, o pagane nen, ir An Akbur Yesus Kristus eti ndak-ndak etaruak nen yiluk pulogo barigemo o. Etegerogon ma, Ar Akbur eti ogari inakla nen, Ar ebe alep mende arar ertagage o. 30Etegerogon ar, Ar Allah nen ir akuni inalep pulik mende Ar nen wai yoragage; nen ir wai yoragage mende eti, Ar inom pano dambulurak telek erogo bega, nen Ar Allah dogirtagama inom dogorak waganugun o.
Ar Yesus Kristus paga, Allah nen kinakba yirige wene
31Yogondak wene etoma obogar nenggerogon yurak kogop? Ar Allah nir ninom kunik werekma, ta nen kwak nir ninarik nen yiluk erigin kogop? 32Ar Akbur akba andalok dek, nir obok ninake paga birige o; Ma Ar amende ye mende nde mende amberak etoma wokneragin dek a? 33Nir Allah akburi uma mende ma, Allah nen ninerakde mbalkanem, ta nen tebel ninabigin? 34Akuni amberak nen nir ninenggadi warurak mende werek a? Ar Kristus Yesus nen nir ninerakde mbaligin o! Ar ebe arar kanggige, ar ebe warekma nen iluk erogo mendirige. Ar ebe Allah obarne paga agarik o. 35Ir amberak nen, Kristus nen inakba erugup o, yiluk ninaruan mbalurak ambi werek a? Nena paga ninaru mbalurak? Anggin-panggin a, mep dagik dagok nen a, ndugi ninakwi nen a, erom no nen a, nininggim dek nen a, kurumbi nen a? kamburak nen a? 36#Mzm. 44:23Alkitab mbalek paga yegerogon yirige o,
“Kar kake paga, domba waruok yiluk eritagwi kwak,
nir o kup keyam kambir tagama ari lalok agorik o.”
37Dek o! Etoma ninoba aga kigik, Ar nen nir ninebe iliti kunikma, nir eti ware mende erninaka agarik o! 38An ebebar andaktaga eti yegerogon, o yoma obogar, kamburak inom, niniluk dogorak inom, ap malaikat mende inom, inobatne pago mende inom, yogondak ya ninaruok yiluk mumer ninagwi mende inom, yabongga ninaruok yiluk mumer ninagun mende inom, o obarne werek amberak nen, ninarurak mende inom, 39ye mende nde mende mbogor taga werek mende inom, agar taga yoma werek mende inom, obarne werek amberak inom, etoma obogar nen, Ar Allah nen Ar Akbur Kristus Yesus Tuhan eti paga, nakburi wogonaki o yiluk yega kigik, ninaru mbalurak mende ambi mondok dek arar o.
Currently Selected:
ROMA 8: WLW
Highlight
Copy
Compare
Share
Want to have your highlights saved across all your devices? Sign up or sign in
