ROMA 7
7
Kwe waganggwi mende wene mbalek paga walkigik wene
1Nawor nakbur wae! Kir obogar wene hukum apma dogolir erir tagwi kinilu o. Ma, ir akuni hukum inoba wurar taga eti, ir akuni iniluk mende mban hukum inoba wurataga mende o. 2Wene oba lirogo negen yi o, ir kumi ap waganek mende eti, hukum ake paga, ir ap waganek mende eti, ar ebe iluk welaga kalok mban apma dogirtagwi o. Ogwe ap agun waganek mende eti arar kangga kalok, kwe eti hukum ake paga kede warek mende aburak nen pigalogo wundigin o. 3Kwe eti agun iluk kigik, ap adik ambi imbirak kagar-kagar ekwi kalok, ar kwe eti mbainak eke yugwi o. Nen, agun arar wartaga kalok, kwe eti wene oba dek o, wender erek agarik o. Ar nen ap adik ambi waganigin kalok, mbainak eke yorugun dek o. 4Nawor nakbur, kir eta ndak-ndak dogi tagwi o. Ir agama Yahudi inawene kindirik abura welagugwa mende, arar wartagagup mo o. Kir kinebe Kristus ebe paga kunogo binagarigemo, kir kinebe Ar amende werek o. Ar ebe warekma nen iluk wulkige mende nen, iluk agage paga, nir niniluk pano dogowak yiluk, Ar Allah nen wokninakige. 5O pagane etoma ninobabur akuni agataga mende inobabur paga erir nugu lagagumo. Nir agama wene kindirik abura paknarek werekma, niliti ye wadok nde wadok maduk mende eberkwi welagagu. Eta ekwi paga kambir lagu lagugwa o. 6Ogwe, nir yogondak ya agama Yahudi mende hukum abura kede warek werek dek o. Hukum wene kindirik alep mende tebelogo binaniluk welagage mende ake, nir arar wartagagu o. Nir nen hukum alep mende ake eku lagagu ndak-ndak apma agorik dek o. Yogondak nir ninobabur ngger mende, Roh Allah nen yorneraga mutok eku dogowok o.
Wene kindirik inom nen maduk mende inom wene
7 #
Kel. 20:17; Ul. 5:21 Eta kalok, nir nen nenggerogon yurak? Agama Yahudi inawene kindirik eti maduk a? Mondok dek o! Wene kindirik hukum eti nen ar, maduk mende yi o, yiluk an emeknirige o. Hukum Agama wene kindirik eti nen, wadok nggirik eti maduk o yiluk emernirige o, nen dek dogolepma, wadok nggirik eti maduk o edo yiluk nunggukdek dogolep o. 8Hukum agama wene kindirik paga, ye maduk nde maduk eru ninilitimo kerok yiluk, an wadok nggirik erogo banirtaga o. Nenaluk, hukum agama wene kindirik dek dogolepma, maduk dek ar dogorak o. 9O pagane etoma, an nen hukum agama wene kindirik uwakma dogoluk dek o. Ogwe hukum agama awene kindirik wagagemo, maduk ambik ekulagagu mende telekma atuk, 10nen an wartagagi arar o. Eti paga, hukum agama wene kindirik eti nen, alep niniluk erinaburak ake andarigerek ogwe, nen tuguluk an wataru mende bi wagagemo o. 11#Kej. 3:13Hukum Agama awene kindirik eti paga nen, an enggal yoniru inom nen an narurak mende inom telek erogo wogorigemo o.
12Hukum agama wene kindirik etoma, edo Ar Allah nen arar wulkigemo, Nen hukum edo wene adik ndak dombok kindirira etoma, Ar Allah nen ar wulakigemo o. Ma, wene ebe mor ndak-ndak nen pano mende mban arar o. 13Yogo eta, pano eti nen an narurak mende ndak kogop a? Mondok dek o! Ar maduk eti nen ar wartagwi mende edo eti unggi warir taga o. Wene pano mende eti ekwi paga, maduk eti nen an wartarurak mende noba kenam aga, tuguluk ar maduk eti obabur mende telekma mbek togo ertagage o. Nen Allah Ane yirige eti paga, maduk eti mondok maduk mende arar o, yiluk kenam agage o.
Akuni na'ir ka'ir dogirtagwi wene
14Nir obogar nen ninilu eti, hukum agama Yahudi inawene kindirik eti, Roh Allah nen wogoragage mende ogwe, an nebe akuni nobarne dek mende arar o. Nen an maduk ayedoman dogowak nen yiluk, nonggo mbalogo baninggigemo o. 15#Gal. 5:17Nenaluk an nen nena erir lektaga mende etoma nakla andau ndak dek o. Ye wene nde wene an nen eru wadok kertaga mende etoma, an nen erurak ndak dek o. Ogwe ye wene nde wene an nen erurak na'ir andaga mende etoma mban, an nen erirtaga o. 16Yogo, an nen erurak na'ir andaga mende mban erir laga kalok, wene ebe eta paga, an nen hukum agama Yahudi inawene kindirik eti ebebar pano yiluk yirtaga o. 17Eta, an nen eka dek mende, ar maduk nurtaga labek mende eti nen ar erir lektaga o. 18An nakla etoma, pano mende ambi mondok dek o yiluk eti an nilu o; ebe eta an nobabur akuni agar paga mende endago paga eka agarik o. Nenaluk an niliti paga nen, pano eru wadok werek mende, an nen pano erurak ndakdek ernabi taga o. 19An nen pano eru wadok andaga mende eti an nen ekidek o, ogwe nen maduk an na'ir mende mban an nen erurak ernaka agarik o. 20An nen an eru na'ir andaga mende eka nalok, eta ebe an nen eka dek mende, maduk mende nur paga dulik eti nen etnaka agarik o.
21Yogo, wene enggen yurak ebe eti, ar hukum yi ar unggune atuk dogogin o: etama nen, an nen pano mende erurak wadok andaga kalok, we maduk erurak mende eti mban nilka paga agarik o. 22Nen niniliti paga nen, hukum Allah mende ar wadok andaga agarik o. 23Ogwe An nilitimo etoma, wene adik obarne werek mende weregar o. Wene ebe eti hukum an nilitimo paga nen, wene hukum ebe mende yi o yiluk, yonega talek mende eti werek o. Etama, an nakla paga agarik mende eti, hukum maduk edo eti paga kede warek agarik o. 24-26Yogo, an agarik ebe enda. An naklanggar paga nen hukum Allah Wene mutok laurak eka mende, nobabur akuni paga endago mende eti nen kwak, maduk apma bani lek taga o. An yi bulartagin mende arar o! An nagakdo yi nen kambir tagama wornarek unggi lektaga yi, ta nen an endak nabigin o. Ar Allah nggain wi wa o! Ar Yesus Kristus paga nggweru, Ar Allah nen an ndilnabigin o.
Currently Selected:
ROMA 7: WLW
Highlight
Copy
Compare
Share
Want to have your highlights saved across all your devices? Sign up or sign in
