ROMA 10
10
1Nawor nakbur ae wa! An nen akuni an mende yoma ndilinaburak niliti mondok kunik dogolir, kup keyam ir inake Allah nggino yorir taga o. 2An nen ebebar yumo, ir nen iniliti aganggen kerok togo, Allah ake yabu erirtagwi o. Ir iniliti aganggen kerok togo ekugwa etoma, Ar Allah ane eruwak andage paga negen kedaga dek o. 3Ir akuni nen yegerogo ekwi kalok, Ar Allah eti akuni inom pano dambulurak eti, ir inonggokdek o. Nen, ir nen, Allah yegerogon erurak yirige mende mutok ekidek, ir inakla andagetek paga mutok eku lagugwa paga, inom dambulkikdek welagugwa o. 4Hukum agama wene kindirik wene eti, Ar Kristus nen arar oba kunggige o. Etama, akuni nen Kristus oba ebebar andalok ane waganggwi dalok, Allah inom pano dambulugun o.
Ndilninaburak wene yirige eti, ir akuni obok inake yirige wene
5 #
Im. 18:5
Ar Musa nen, ir akuni Allah inom dambulurak inom nen inebe pano dogorak inom edo eti, hukum agama wene kindirik eti dik togo ekwi paga arar o yiluk diru mbalkige o. 6#Ul. 30:12-14Ogwe ir akuni nen, Ar Allah oba ebebar andalok um palkwi kalok, Allah inom pano dambulurak yirige o. Ma Alkitab mbalek paga nen yirige eti,“(Ar Kristus mbogor paga nen wolok wura warurak paga). ‘Ta kwak nen mbogor taga dagi ligin yiluk kakla eberugup o?’ yiluk yirige o. 7Eti ndak-ndak, ‘Kar ta nen kwak akuni kambiluk wura tagama wuragin o?’ yiluk yirige eti, (Wene enggen eti, Ar Kristus warek ma nen, iluk erogo wolok dagi warigin yiluk yirige o.)” 8Ebe yegerogo yiluk yirigemo: “Allah Awene eti kinom korogar werek o; ebe kinande paga arar, nen kiniliti mo arar werek o.” Wene ebe yi arar, nir nen wigalir lektagwi o. Wene yi akuni nen ebebar o, yiluk inakla ebebar andalok waganurak o. 9Nenaluk, nogar kar kane paga nen “Yesus eti Tuhan o,” yiluk yega, nen kiliti paga nen Yesus eti Allah nen warek werekma mende iluk erogo mendirige o yiluk, ebebar andaga kalok, kar kebe ndilkodagin o. 10Nenaluk akuni iniliti paga nen ebebar andagwi paga, Ar Allah nen ar yi An nimbirak pano agama o yiluk, ar ebe waganigin o. Nen akuni inande paga nen bagalkwi paga, ar ebe ndilkodagin o. 11#Yes. 28:16Alkitab mbalek paga nen mbalek wene yi o, “Ir akuni ebebar andagun mende eti, inenggadi arugun dek o.” 12Wene eti ir Yahudi mende inom, ir akuni Yahudi dek mende inom, obogar dambulik inake arar o. Ar Allah ebe ambiar, ir akuni obogar mende Tuhan arar o. Ar ye mende nde mende nggino yogwi dalok, adeknggen ambik kado milogo wogoragin o. 13#Yl. 2:32Alkitab mbalek paga nen yega dogolir, “Ir akuni obogar inane paga nen Tuhan wae, yiluk endaga mbalkwi kalok, ir inebe ndilinabigin o.”
14Ogwe ir akuni nen, Ar Tuhan endaga mbalugun eti nenggerogo, ir nen ebebar andagikdek kalok? Nen ir nen ebebar andaurak eti nenggerogon, Ar Abok mende ir inaruk kolalkikdek kalok? Nen Ar Tuhan abok kolalurak eti nenggerogon, ir akuni nen yoragikdek kalok? 15#Yes. 52:7Nen ir akuni wene yora laurak eti nenggerogon, ir eti wene yora lani o yiluk lakbagikdek kalok? Ma Alkitab paga yegerogon diru mbalek werek, “Allah Ane Pano Wene wolok wagugwa mende eti, pano mondok arar o!” 16#Yes. 53:1Ogwe, wene Pano Wene eti akuni obogar nen waganukdek o. Ma wene eti ake paga, ar Yesaya nen yega dogolir, “Tuhan wae, nir wene yoragwi mende eti tani nen waganugun kegen?” yiluk yirige o. 17Eti paga nen, ir akuni nen wene ebebar andagwi eti, ir nen wene eti inaruk kolaldiluk kalok arar o. Ma nen ir akuni nen Ar Kristus ebebar andagun eti, ir akuni nen wene Ar Kristus abok yoragun kalok arar.
18 #
Mzm. 19:5
Ogwe, an kinok wokinar taga o. Ir akuni nen wene eti mondok inonggokdek a? Ebebar kwak eti inilu o! Alkitab paga yegerogo mbalek agarik,
“Ir inane nggomokwi mende eti, o kuri yanda obogar inaruk kolkugwa o.
Ir wene mbalkwi mende agar irip paga kudi obogar inaru kulkugwama o.”
19 #
Ul. 32:21
An nen kinok ambi yega agarik o: ir Israel mende auwam inonggokdek a? Wene kinok yigi yi onggo, ap Musa nen ndak alebagik yuwak o. Ma wene ar Musa nen yirige mende yi o, “Allah nen yegerogo yirige.
An nen, kir ir akuni An nakburi dek mende eti inoba uwa biluk dogorak erkinaka,
An nen ir akuni inakla nggagalek dek mende inoba, kinanini aruwak nen yiluk erkinaka erigin o.”
20 #
Yes. 65:1
Nen ar Yesaya kwak telekma bugarogo arar yirige o. Ar nen yega dogolir, “Allah nen wene yegerogo yirige,
‘Ir akuni An kwak nakikdek mende, ir obogar ninom abuk arugun o,
nen akuni An naginok waganggikdek mende, An nen ir inil nawak nen yiluk inuguk dagin ar o.’ ”
21 #
Yes. 65:2
Eta mende, ir Israel mende inake, ar Yesaya nen yega dogolir, “Allah nen wene yegerogo yirige, ‘Akuni iniliti mbuk, inaruk dogu mende inoba, An ninggi inoba lagabek kigik, o arar ki aga o.’”
Currently Selected:
ROMA 10: WLW
Highlight
Copy
Compare
Share
Want to have your highlights saved across all your devices? Sign up or sign in
