KARARIADI 11
11
Manara ngu Babel
1Su titae, manga bangsa su kal᷊abo u dunia kitang pia wahasa simbau dang didato ngi sire ko musul᷊ung. 2Su tempo ngi sire nul᷊umal᷊eng nangal᷊ing sarang simbuka ngu raki, i sire nurating su l᷊ewae simbau su Babilonia, bou e'e natana su se'e. 3I sire nangul᷊i singkatau su ko wal᷊inge, “Maite i kite mukoa watu tela dang tutungang sarang pakakitihi.” Dingang kere'e i sire pia watu tela guna ngu watu ngu wal᷊e l᷊au teri guna ngu rarikenge. 4Angkung i sire, “Maite i kite mupararisi soa dingang u manarae simbau ko pusue murating u l᷊angi, tadeau i kite tumeleng dang ta mukal᷊iaesi su kal᷊abo dunia.”
5Kuteu Mawu nul᷊umintu nutuhung soa l᷊au manara ko kahikoa u taumata. 6Bou e'e I Sie nuhengetang, “I sire i'i bangsa simbau dingang u wahasa simbau, dang i'i mbuhue tita u manga karaki i sire. Takoae l᷊iwue nge l᷊ai i sire sarung makakoa apang ko ikao i sire. 7Mapiang i kite l᷊umintu dang mungal᷊imbuhung wahasa ngi sire tadeau i sire ta makahingang l᷊ai simbau dingang ko wal᷊inge.” 8Kere Mawu nangaesi si sire sarang kal᷊abo u dunia. Bou e'e i sire nangiro nupararisi u soa e'e. 9Watu e'e soa e'e nisigho Babel, #11:9: Babel: su l᷊al᷊ung u wahasa Ibrani didato i'i raringihang kere didato ko mangal᷊enge “nukal᷊imbuhung”. Ual᷊ingu soa e'e Mawu nangal᷊imbuhung wahasa ngu kaul᷊i u bangsa dang bou tampa e'e i sire nipukaesi u Mawu sarang kal᷊abo u dunia.
Hintou ngi Sem
(1Taw. 1:24-27)
10I'i hintou ngi Sem. Dua taung bou l᷊uwa ko l᷊abo, su tempo ngi Sem umurie mahasu su taunge, i sie nakahombang singkatau ana ko ese arenge i Arpakhsad. 11Bou e'e i sie mborong nuwiahi l᷊imahasu su taunge l᷊ai, dang nakahombang manga ana ko wal᷊inge.
12Su tempo ngi Arpakhsad umurie tilumpul᷊ol᷊ima su taunge, i sie nakahombang ana ko ese, arenge i Selah. 13Bou e'e i Arpakhsad mborong nuwiahi pauhasutatilu su taunge l᷊ai, dang nakahombang manga ana ko wal᷊inge.
14Su tempo ngi Selah umurie tilumpul᷊o su taunge, i sie nakahombang ana ko ese, arenge i Eber. 15Bou e'e i Selah mborong nuwiahi pauhasutatilu su taunge l᷊ai, dang nakahombang manga ana ko wal᷊inge.
16Su tempo ngi Eber umurie tilumpul᷊opa su taunge, i sie nakahombang ana ko ese, arenge i Peleg. 17Bou e'e i Eber mborong nuwiahi pauhasutilumpul᷊o su taunge l᷊ai, dang nakahombang manga ana ko wal᷊inge.
18Su tempo ngi Peleg umurie tilumpul᷊o su taunge, i sie nakahombang ana ko ese, arenge i Rehu. 19Bou e'e i Peleg mborong nuwiahi duahasusio su taunge l᷊ai, dang nakahombang manga ana ko wal᷊inge.
20Su tempo ngi Rehu umurie tilumpul᷊odua su taunge, i sie nakahombang ana ko ese, arenge i Serug. 21Bou e'e i Rehu mborong nuwiahi duahasupitu su taunge l᷊ai, dang nakahombang manga ana ko wal᷊inge.
22Su tempo ngi Serug tilumpul᷊o su taunge, i sie nakahombang ana ko ese, arenge i Nahor. 23Bou e'e i Serug mborong nuwiahi duahasu su taunge l᷊ai, dang nakahombang manga ana ko wal᷊inge.
24Su tempo ngi Nahor umurie duampul᷊osio su taunge, i sie nakahombang ana ko ese, arenge i Terah. 25Bou e'e i Nahor mborong nuwiahi mahasumapul᷊osio su taunge l᷊ai, dang nakahombang manga ana ko wal᷊inge.
26Suapang i Terah umurie pitumpul᷊o su taunge, i sie nakahombang ana tatilu, e'e ko i Abram, i Nahor l᷊au i Haran.
Hintou ngi Terah
27Ko i'i hintou ngi Terah: I Terah iyamang i Abram, i Nahor l᷊au i Haran. I Haran pia anae ko ese, arenge i Lot. 28I Haran nate su wanuange sisane, su Ur su Babilonia, su tempo ngi yamange mborong wiahi. 29I Abram nukawing dingang i Sarai, dang i Nahor nukawing dingang i Milka ana kowawine ngi Haran. I Haran mborong pia anae ko ese ko wal᷊inge arenge i Yiska. 30Arawe i Sarai ko wanto.
31I Terah nanintang u soa ngu Ur su Babilonia singkahindo dingang i Abram anae, i Lot punge, l᷊au i Sarai manuhange, kawing i Abram. I sie pia pandunge makoa sarang soa ngu Kanaan. Kateho suapang nurating u Haran, i sire natana pai se'e. 32Dang su se'e l᷊ai i Terah nate su tempo ngu umurie duahasulima su taunge.
Currently Selected:
KARARIADI 11: PLT
Highlight
Share
Copy
Want to have your highlights saved across all your devices? Sign up or sign in