SASUWANG 38

Mukoa mesba guna ngu korbang tutungang

(Sasu. 27:1-8)

1Bezaleel nangal᷊a kau akasia, bou e'e nikoae mesba guna ngu korbang tutungang. Mesba e'e pia wukunge, nandue l᷊au wunahie taha dua meteri dua senti, dang range'e simeteri tilu senti. 2Suapang wukunge rasi nikoateng sasungenge ko nasimbau dingang u mesba e'e. Kaul᷊i e'e nilapisang u witu. 3Nikoatenge l᷊ai manga kawali, sikopi, manga wohosi, manga poroki dang tampa u putung. Kaul᷊i u sal᷊iumpuhi e'e nikoa bou witu. 4Nikoae soma kawa bou witu ko nil᷊iwung su mesba su wal᷊ang u mesba, range'e stenga bou range u mesba. 5Bou e'e nikoatenge pa wukal᷊a guna ngu kau ghaghual᷊enge su wukunge pa su wal᷊ange. 6Kau ghaghual᷊eng e'e nikoa bou kau akasia ko nilapisang u witu. 7Bou e'e kau ghaghual᷊eng darua e'e nitaho su l᷊al᷊ung u manga wukal᷊a su sindihange dua mbuka ngu mesba e'e. Mesba e'e nikoae bou pupal᷊i dang bageang l᷊al᷊unge pia manga l᷊ohange.

Mukoa bak witu

(Sasu. 30:18)

8 # Sasu. 30:18 Bezaleel nukoa bak witu l᷊ampahie witu. Bak e'e bou manga sahuming koa u manga wawine ko mutatangkiang su tukari u Kema ngu Mawu.

Salasari Kema ngu Mawu

(Sasu. 27:9-19)

9Bezaleel namagari salasari Kema ngu Mawu dingang u pampele bou heka leneng ko al᷊usi. Su simbuka ngu timuhi, nandue paupul᷊o pa su meteri, 10nituilang u duampul᷊o rihi witu, nahia u l᷊ampahie witu, dingang u kakai dang kakaie bou sal᷊aka. 11Su simbuka ngu sawunahi nikoa musul᷊ung kere'e l᷊ai. 12Su simbuka ngu wahe nitaingang u pampele kanandue duampul᷊odua su meteri, ringang u rihinge mapul᷊o dang mapul᷊o l᷊ampahie; kakai dang sasumpue nikoa bou sal᷊aka. 13Su simbuka ngu raki, ko pia tukari, wunahi u pampele'e l᷊ai duampul᷊odua su meteri. 14-15Su kuihi kuaneng tukari e'e nitaingang u pampele, taha nungu meteri nungu senti nandue, dingang u rihi tatilu dang tatilu l᷊ampahie. 16Kaul᷊i u pampele ko nul᷊iku salasari nikoa bou heka leneng ko al᷊usi. 17L᷊ampahi u manga rihinge nikoa bou witu, arawe kakai, sasumpue dang pusu u rihinge nikoa bou sal᷊aka. Kaul᷊i u rihi nal᷊iku su salasari e'e nupusasumpu simbau dingang ko wal᷊inge dingang u kakaie sal᷊aka. 18Pampele tukari salasari e'e nikoa bou leneng ko al᷊usi ko nitenung dingang u wol ko biru, ungu dang mahamu l᷊au u nil᷊ighaheng dingang u suji. Nandue sio meteri dang range'e dua meteri, musul᷊ung dingang u pampele ngu salasari. 19Pampele u tukari e'e nituilang u rihi pa dingang u pa l᷊ampahie witu. Kaul᷊i kakai, tataka pusue dang kakaie nikoa bou sal᷊aka, 20kateho manga papasi guna ngu Kema dang guna ngu pagari nikoa bou witu.

Logam ko nipake su l᷊al᷊ung u Kema ngu Mawu

21I'i ko rekenang u logam ko nipake su l᷊al᷊ung u Kema ngu Mawu, tampa u watu darua dingang mapul᷊o parenta ngu Mawu Ruata e'e nireso. Rekenang e'e su parenta ngi Musa dang nisusung u manga taumata ngu Lewi ko kahal᷊ie su l᷊al᷊ung u parenta ngi Itamar, ana i imam Harun.

22Bezaleel ana i Uri, pung i Hur bou suku ngu Yehuda, nukoa kaul᷊i u ko niparenta ngu Mawu. 23Musasumbalange, I Aholiab ana i Ahisamakh bou suku ngi Dan, ko singkatau mangangeta, mananipiri, dang mukakoa heka leneng ko al᷊usi, l᷊au u wol ko biru, ungu dang mahamu.

24Wul᷊aeng ko nisumba su Mawu guna ngu Kema ko susi kaul᷊i-ul᷊ie sihiwu su kilonge, nitimbang tumuhu timbangang ko ipake su Kema ngu Mawu. 25#Sasu. 30:11-16Sal᷊aka ko nikarea bou rekenang u bangsa Israel ul᷊ie tiluhiwupauhasutilumpul᷊o su kilonge nitimbang tumuhu timbangang ko ipake su Kema ngu Mawu. 26#Mat. 17:24Ul᷊ie e'e musul᷊ung dingang u apa ko niwaehi kaul᷊i u taumata ko kawawohe su l᷊al᷊ung u rekenang e'e. Apang taumata mamaehi hariga ko nitantu, nitimbang tumuhu timbangang ko ipake. Su l᷊al᷊ung u rekenang kawawohe nunguhasutatilu su hiwunge l᷊imahasul᷊imampul᷊o taumata ko ese umurie su wawo u duampul᷊o su taunge. 27Bou sal᷊aka e'e tiluhiwupauhasu su kilonge nipake guna ngu pukoa mahasu l᷊aumpahi u rihi Kema ngu Mawu dang heka l᷊ahumping tukarie. Apang l᷊ampahie buhae tilumpul᷊opa su kilonge. 28Bou l᷊umbei ngu sal᷊aka e'e, ul᷊ie tilumpul᷊o su kilonge, Bezaleel nukoa manga sasumpue dang manga kakai guna ngu manga rihinge, dingang u tataka pusu u manga rihi e'e. 29Witu ko nisumba su Mawu kaul᷊ie duahiwupauhasuduampul᷊ol᷊ima su kilonge. 30Witu e'e ipake guna ngu pukoa l᷊aumpahi tukari u Kema ngu Mawu, mesba dingang u manga kawa ko nianang bou witu, kaul᷊i u sal᷊iumpuhi mesba, 31l᷊aumpahi pampele ngu salasari nal᷊iku dang tukari, kaul᷊i u papasi u Kema dang salasari nal᷊iku.

Currently Selected:

SASUWANG 38: PLT

Highlight

Copy

Compare