SASUWANG 35

Atorang u l᷊ou Sabati

1I Musa nangomol᷊i kaul᷊i u bangsa Israel bou e'e nangul᷊i si sire, “I'i parenta ngu Mawu guna ngi kumu: 2#Sasu. 20:8-11, 23:12, 31:14-15, 34:21; Im. 23:3; Sau. 5:12-14 Pia nungu l᷊ou guna ngu muhal᷊i, kateho l᷊ou kapitunge e'e l᷊ou guna ngu mangindul᷊e, l᷊ou ko l᷊abo ko nitani su Mawu. I sai ko muhal᷊i su l᷊ou Sabati mambeng ihukung pateng. 3Su l᷊ou e'e i kumu ta botonge mundaki putung su wal᷊engu.”

Sasumba guna ngu Kema ngu Mawu

(Sasu. 25:1-9)

4I Musa nangul᷊i su kaul᷊i u bangsa Israel, “Kiri'i parenta ngu Mawu: 5Wawako sasumba su Mawu. I sai ko kumanoa naunge mambeng mangonggo wul᷊aeng, sal᷊aka dang witu; 6heka leneng ko al᷊usi, heka wol ko biru, ungu dang mahamu, heka bou ruku u kambing; 7pisi ngu domba ko ese ko nilaburang mahamu, pisi ko al᷊usi, kau akasia, 8l᷊ana guna ngu sol᷊o, manga rampa guna ngu l᷊ana upacara dang guna ngu dupa ko mawungi; 9permata delima dang permata ko wal᷊inge guna ngu il᷊ighahi su pakeang efod dang tataka roko ngu imam ko l᷊abo.”

Manga kakakoa u Kema ngu Mawu

(Sasu. 39:32-43)

10“Kaul᷊i u base ko pilesa bou tal᷊oara i kumu mambeng sumongo mukoa kaul᷊i u ko niparenta ngu Mawu, e'e ko: 11Kema, dang atu l᷊au u tatakae, kakai dang kasonge, manga kau sal᷊awo, rihi tukari dang sampehie; 12Wantal᷊i u Pudadiandi dingang kau ghaghual᷊enge, tatakae dang heka tatimbukunge; 13meda dingang u kau ghaghual᷊enge, kaul᷊i u sal᷊iumpuhi dang boroti l᷊ahaghesi 14l᷊aeri u sol᷊o guna ngu mupakasua dingang u sal᷊iumpuhi sol᷊o dingang u l᷊anange; 15mesba tampa panutungang dupa dingang u kau ghaghual᷊i, l᷊anisi u upacara, dupa ko mawungi; pampele guna ngu tukari u Kema. 16Mesba guna ngu korbang tutungang dingang u manga wiwihi bou witu, kau ghaghual᷊eng dingang u kaul᷊i u sal᷊iumpuhie, bak tampa u panguhaseng dingang u l᷊ampahie, 17manga pampele guna ngu lilahie, manga rihi dingang u l᷊ampahie, pampele tukari sasukang u salasari, 18manga papasi dang manga tal᷊i guna ngu Kema dang guna ngu salasari; 19pakeang nggaweti guna ngu manga imam su tempo ngi sire muhal᷊i su kamari susi dang pakeang taniang guna ngu imam Harun, dang manga anae.”

Bangsa Israel numbawa sasumba ngi sire

20Bou e'e kaul᷊i u taumata ngu Israel ko nukomol᷊i se'e nukaesi, 21dang i sai-sai ko nukumanoa naunge, mumbawa sasumba su Mawu guna ngu mupakaimuti Kema ngu Mawu. I sire l᷊ai mumbawa kaul᷊i u guna ngu nggaweti dang kakoa u pakeang u imam. 22I sai-sai ko mo, maning manga ko ese arako l᷊ai manga kowawine, sumongo mumbawa lapaneti l᷊al᷊ighahi, anting-anting, sinsing, hante dang kaul᷊i u haghi l᷊al᷊ighahi wul᷊aeng guna ngu isumba su Mawu. 23Apang taumata ko pia heka leneng al᷊usi, heka wol ko biru, ungu arako mahamu, heka bou ruku u kambing pisi ngu domba ko ese ko nilaburang ko mahamu, arako pisi ko al᷊usi, mangonggo barang e'e. 24Apang taumata ko botonge mangonggo sal᷊aka arako witu, numbawa guna ngu Mawu. Kere'e l᷊ai nikoa u manga taumata ko pia kau akasia guna ngu hal᷊i e'e. 25Manga kowawine ko pande manenung numbawa banang leneng ko al᷊usi dingang u banang wol ko biru, ungu dang mahamu ko seng nikoa i sire. 26I sire l᷊ai nanenung banang bou ruku u kambing. 27Manga pangaha numbawa permata delima dang manga permata ko wal᷊inge guna ngu il᷊ighahi su efod, dang tataka roko. 28I sire l᷊ai numbawa manga rampa dang l᷊ana guna ngu sol᷊o, l᷊ana upacara dang dupa ko mawungi. 29Kaul᷊i u taumata ngu Israel dingang kal᷊ahang u naung numbawa sasumba ngi sire su Mawu guna ngu hal᷊i ko niparenta ngu Mawu si Musa.

Manga base ko nipuhal᷊i pukoa Kema ngu Mawu

(Sasu. 31:1-11)

30Bou e'e i Musa nangul᷊i su taumata ngu Israel, “Mawu seng namile si Bezaleel ana i Uri, pung i Hur, bou suku ngi Yehuda 31dang nangonggo si sie dingang u kawasang-E.#35:31: kawasang-E arako roh-E. Mawu Ruata nangonggo si sie titong, kapapande dang kakapilesa su l᷊al᷊ung kaul᷊i u haghi ngu hal᷊i ko masasidada, 32guna ngu mukoa gambari ko mupake kapapande, dang mukoa e'e dingang mupake u wul᷊aeng sal᷊aka dang witu, 33guna ngu mangehoghi watu permata ko sarung ipakahoro, guna ngu mamakang kau dang guna ngu kaul᷊i u haghi ngu hal᷊i ko matahuki ko wal᷊inge. 34Si Bezaleel dang i Aholiab, ana i Ahisamakh bou suku ngi Dan, Mawu nangonggo u kapapande guna ngu manintiro ngu titong si sire su taumata ko wal᷊inge. 35I sire nionggol᷊ang u kapapande su l᷊al᷊ung u kaul᷊i u haghi ngu hal᷊i ko nikoa u mapapande mamakang, mugambari hal᷊i dang mapapande ngu mangauhi leneng ko al᷊usi, wol ko biru, ungu dang mahamu, dang heka ko wal᷊inge. I sire e'e ko mugambari ko pande dang botonge mukoa kaul᷊i u haghi ngu hal᷊i.

Currently Selected:

SASUWANG 35: PLT

Highlight

Copy

Compare