SASUWANG 34
34
Darua watu pamohekang ko wuhu
(Sau. 10:1-5)
1Bou e'e Mawu nuhengetang si Musa, “Pakangko watu dua ngkompeng e'e kere horo. Su watu e'e Ia sarung mamohe u manga didato ko musul᷊ung dingang ko ene su watu ko seng nihosiu e'e. 2Panadiako dol᷊ou mal᷊ukari tarai sumaka Wul᷊uri Sinai dang pupasaruang u Ia su wawo u wul᷊uri e'e. 3Ta botonge sarang singkatau tumuhu dingangu arako ene su tampa ko wal᷊inge bou wul᷊uri e'e. Manga sapi dang manga domba ta botonge iwala kumang ruku su wanggili u wul᷊uri e'e.” 4Bou e'e i Musa sau namakang watu darua, dang ndai nal᷊ou mal᷊uka-l᷊ukari niwawae nusumaka sarang wul᷊uri u Sinai kere ko niparenta ngu Mawu si sie.
5Kuteu nul᷊umintue Mawu #34:5: Mawu: Tuhunge 3:14. su l᷊al᷊ung u simbau winawa, I Sie kararisi dingang i Musa su tampa e'e, dang nangul᷊i areng-E ko susi e'e, ko Mawu. 6#Sasu. 20:5-6; Rek. 14:18; Sau. 5:9-10, 7:9-10Bou e'e Mawu nusumahe su tingo ngi Musa dang nangul᷊i, “Ia Mawu, e'e ko Mawu Ruata ko napene u kasasana u naung dang napene u kakindaghi-E. Kakindaghi-Ku tumaniu maul᷊i, Ia satia dang ta maehong muwawal᷊uang. 7Ia tatapi kumindaghi u hiwunge hintou #34:7: hiwunge hintouarako hiwu ngu taumata. dang mangampung u pusansal᷊a dang dosa, arawe taumata munsal᷊a tinga-tingari ta Daku il᷊iu bou hukumange, dang Daku ihukung l᷊ai manga ana dang manga pung sarang hintou katilunge l᷊au u kapae ual᷊ingu dosa ngu ghaghurang i sire”.
8Su orasi e'e l᷊ai, i Musa nusuba nanumba. 9Angkunge, “Mawu, kamangkeng i Kau tinga-tingari mal᷊uasi si sia, ia mukahioro, kere botonge Mawu tumuhu dingang i kami. Bangsa i'i tingari makitihi, kateho ampungeko kal᷊al᷊ai dang dosa ngi kami dang tarimako i kami kere umati-U sisane.”
Pudadiandi nikoa ko wuhu
(Sasu. 23:14-19; Sau. 7:1-5, 16:1-17)
10Angkung u Mawu si Musa, “Orasi i'i Ia mukoa pudadiandi dingang u bangsa Israel. Su tingo ngu mata ngi sire Ia sarung mukoa manga kal᷊aherang ko mborong ta paghisa l᷊ai nikoa su tal᷊oara u manga bangsa sude'e su dunia. Kaul᷊i u bangsa sarung makawua manga tatia ko makal᷊aherang ko Daku koateng, watu'u Ia, Mawu sarung mukoa patiku ko tumanie makal᷊aherang si kumu. 11Tuhukeko manga atorang ko Daku ionggo si kumu l᷊ou i'i. Ia sarung manguseri bangsa Amori, Kanaan, Het, Feris, Hewi dang Yebus su tempo ngi kumu mangansing tamai. 12Kumbahang mukoa diandi dingang u kaul᷊i u taumata ko songong i kumu, watu'u hal᷊i e'e makoa sasaung ko makapate si kumu. 13#Sau. 16:21Inau kumbahang mukoa kere'e, kateho hakako manga mesba ngi sire, ghaghoroko manga tugu susi ngi sire, dang tuwangko manga rihi Asyera, barhala ngi sire.
14Kumbahang manumba mahang mawu, watu'u Ia Mawu, ko Mawu Ruata ko mandiri ipusul᷊ung maning l᷊ai dingang u apa. 15Kumbahang mukoa pudadiandi dingang u bangsa wanua e'e; watu'u su tempo ngi sire manumba dang mangonggo korbang su manga mahang mawu ngi sire, i sire sarung muhawu si kumu, dang i kumu sarung tumuhu. 16Kamangkeng manga ana i kumu mukawing dingang kowawine raghi, i sire sarung l᷊okeng u manga kowawine e'e tadeau manintang u Ia dang manumba manga mahang mawu ngi sire.
17 #
Sasu. 20:4; Im. 19:4; Sau. 5:8, 27:15 Kumbahang mukoa dang manumba mahang mawu bou logam.
18 #
Sasu. 12:14-20; Im. 23:6-8; Rek. 28:16-25 Putinaungko Sal᷊iwang u Boroti Takoae kaboe. Musul᷊ung ko Daku niparenta si kumu, i kumu mambeng kumang boroti takoae kaboe salama ngu pitu l᷊ou su wul᷊ang Abib, watu'u su l᷊al᷊ung wul᷊ang e'e i kumu manintang u Mesir.
19 #
Sasu. 13:2
Apang ana ko ese ko iyakang dang binatang ko ese ko kahimotongange nihana e'e ko koa-Ku, 20#Sasu. 13:13kateho i kumu mambeng manubusi ana u keledai ko kahimotongange nipahana dingang mangonggo sasumba simbau ana u domba guna ngu gaghantie. Kamangkeng i kumu mandiri manubusi, l᷊ehi u keledai e'e mambeng bareng i kumu. Apang ana ko ese ko iyakang mambeng tubusang i kumu.
Takoae ko sarang singkatau l᷊ai ko botonge musumongo si Sia kamangkeng ta mumbawa sasumba.
21 #
Sasu. 20:9-10, 23:12, 31:14-15, 35:2; Im. 23:3; Sau. 5:13-14 Pia nungu l᷊ou guna ngu muhal᷊i, kumbahang muhal᷊i su l᷊ou kapitunge, maning l᷊ai e'e su l᷊al᷊ung tempo ngu mamongkari tana arako manipo.
22 #
Im. 23:15-21,39-43; Rek. 28:26-31 Putinaungko Sal᷊iwang u Manipo su tempo ngi kumu manita manipo l᷊uange kahimotongange bou gandung. Putinaung ko l᷊ai Sal᷊iwang Raseng u Raung su panginsueng u taung, tempo ngi kumu manipo manga wua.
23Pakatilu sintaung kaul᷊i u taumata kol᷊aese mambeng sumongo manumba si Sia, Mawu Ruata ngu Israel. 24Suhoro u Ia manguseri manga bangsa bou tingongu dang Daku l᷊oaheng tampa ngi kumu, takoae sarang singkatau l᷊ai sarung wahani mangaho wanua ngi kumu su tempo ngi kumu matamai guna ngu mutinaung Sal᷊iwang u Boroti ko Takoae Raginge, Sal᷊iwang u Manipo dang Sal᷊iwang Raseng u Raung.
25 #
Sasu. 12:10
Su tempo ngi kumu mangonggo binatang l᷊uhatang, kumbahang isumba manga apa ko nikoa pia kaboe. Binatang ko nihata guna ngu korbang mamantughi Paska, mambeng pakasue huwi e'e l᷊ai, ta botonge pia l᷊umbeinge sarang ndai mal᷊ou.
26 #
Sau. 14:21, 26:2 Sintinia taung i kumu mambeng mumbawa sarang wal᷊e ngu Mawu Ruatangu l᷊uang u himotonge bou tanau.
Ghisi ngu ana u domba arako ana u kambing ta botonge isasa dingang u ake susu ngi mae.”
27Angkung u Mawu si Musa, “Woheko manga didato e'e, watu'u punguang su didato e'e Ia mukoa pudadiandi dingangu dang dingang u bangsa Israel.” 28Paupul᷊o su l᷊ounge paupul᷊o su huwinge i Musa natana se'e dingang Mawu, dang kal᷊iwueng u e'e i sie ta nukumang l᷊au u ta nanginung. Manga didato ngu pudadiandi e'e, ko parenta mapul᷊o bou Mawu Ruata niwohe su kompeng u watu.
I Musa nurumusung bou Wul᷊uri u Sinai
29 #
2Kor. 3:7-16
Su tempo ngi Musa nurumusung bou Wul᷊uri u Sinai numbawa parenta mapul᷊o e'e, pahesie nusuminang watu i sie nudidato dingang Mawu, kateho i Musa sisane wugha himoneu pahesie nusuminang. 30I Harun dang kaul᷊i u kawanuange nakawua himoneu i Musa nusuminang pahesie dang i sire mataku sumandighie. 31Kateho i Musa nukui si sire, kuteu i Harun dang kaul᷊i u pangaha i sire nusumandighi si sie, dang i Musa nudidato si sire. 32Bou e'e kaul᷊i u kawanua ngu Israel nukomol᷊i nul᷊iku si sie, dang si sire kaul᷊ie i Musa nangul᷊i kaul᷊i u parenta ko nionggo u Mawu si sire su wawo u Wul᷊uri Sinai. 33Nasue bou nudidato dingang i sire, i Musa nanaka pahesie dingang u heka. 34Sintinia su tempo ngi Musa nusumu su l᷊al᷊ung u Kema ngu Mawu mudidato dingang Mawu, heka e'e iwukange sarang i sie sumuwang. Tuhue i sie nangul᷊i su bangsa Israel kaul᷊i u manga tatanata ngu Mawu, 35dang i sire nakawua pahesi Musa nusuminang. Kuteu nitakae sau pahesie sarang tempo ko tuhue kamangkeng i sie mudidato sau dingang Mawu.
Currently Selected:
SASUWANG 34: PLT
Highlight
Copy
Compare
Share
Want to have your highlights saved across all your devices? Sign up or sign in
